1. RESUMO TEMA 3 SOCIAIS 6º
O ser humano interfire nos procesos naturais do planeta ao explotar recursos naturais
(minerais, madeira, auga, alimentos, enerxía...) Este impacto no medio natural acrecentouse
a partires do S. XVIII, debido ao aumento da poboación mundial e á Revolución Industrial.
Recursos naturais son os elementos que se dan de xeito natural no medio e que o ser
humano pode empregar para o seu beneficio. Poden ser renovables (non se esgotan dado
que se rexeneran) ou non renovables (non dá tempo a que se rexeneren; esgotaranse).
Dentro dos recursos renovables distinguimos os ilimitados (podemos usar canto queiramos
que non se esgotarán; por exemplo, a luz do Sol).
Os recursos naturais, segundo o seu uso, poden ser:
-Materias primas: substancias que se sacan da natureza para o seu aproveitamento
(madeira, minerais, produtos agrícolas...)
-Fontes de enerxía: empregadas para obter enerxía para transporte, industria ou fogares
(petróleo, luz do Sol, vento, carbón...).
As materias primas divídense con frecuencia nas seguintes categorías:
-Orixe animal, como a carne, a pel, a seda ou as graxas animais.
-Orixe vexetal, como a madeira, o algodón, o liño, as froitas, as verduras ou os cereais.
-Orixe mineral, como o petróleo, o carbón, o granito, o ferro, o aluminio ou o ouro.
-Orixe líquida ou gasosa: como a auga, o hidróxeno ou o aire.
Tipos de contaminación
-Contaminación atmosférica: é a alteración da composición normal do aire pola
liberación de substancias químicas e outras partículas. A destrución dos bosques tamén
incrementa a contaminación do aire, pois estes axudan reducindo o dióxido de carbono.
-Contaminación da auga: a súa contaminación altera as condicións en que viven os
diferentes animais e vexetais que dependen dela para a súa subsistencia. Os océanos reciben
a maior parte dos desperdicios humanos, a través de ríos e augas subterráneas.
-Contaminación do solo: vese moi alterado polos produtos químicos e outras filtracións.
Isto afecta a moitos animais e sobre todo nas plantas, que obteñen nutrientes baixo terra.
Axentes contaminantes.- o principal motivo son os residuos das actividades humanas.
-Residuos urbanos: os seres humanos xeramos refugallos alá onde vivimos. Parte deles
son orgánicos (non moi malos, xa que son biodegradables). Outros, levan axentes químicos,
certos metais ou compoñentes que non se degradan (máis perigosos).
-Residuos industriais: ás veces, os residuos xerados nas industrias inclúen metais pesados,
gases moi tóxicos ou lixo radioactivo.
-Residuos agrícolas: nas últimas décadas o emprego de fertilizantes químicos, pesticidas e
herbicidas está a ter un impacto considerable no devandito medio.
O crecemento da poboación mundial e a Revolución Industrial, que fixo se empregase
cada vez máis carbón e petróleo, aceleraron o proceso de contaminación.
Debemos loitar por conseguir un desenvolvemento sostible. Isto consistiría en seguir
progresando sen estragar o planeta, o que non poría en risco a xeracións futuras.
Un cambio climático é unha variación sostida do clima respecto ao que era habitual con
anterioridade.
O noso planeta rexistrou moitos cambios globais do clima ao longo da súa historia, como
por exemplo as glaciacións, que supuxeron un descenso da temperatura en toda a Terra.
Actualmente estamos a vivir un cambio que supón o incremento da temperatura e que se
coñece como "quecemento global". A diferenza deste cambio con outros anteriores é que o
cambio se está dando moi rápido (en décadas, no canto de milenios).
Causas do cambio
Estas alteracións na temperatura do planeta non son naturais, senón que derivan de
certas consecuencias da actividade humana e da contaminación, por iso son tan
aceleradas. Entre as principais causas estarían as emisións de dióxido de carbono á
atmosfera (sobre todo polo uso de combustibles fósiles como o petróleo) ou a deforestación
(as árbores axudan a controlar a cantidade de dióxido de carbono no aire).
O CO2 (dióxido de carbono) é tan problemático porque incrementa o que se denomina
"efecto invernadoiro", que consiste en que parte da calor derivada da radiación solar que
entra na terra é retida pola atmosfera. Este non é o único gas de efecto invernadoiro. O
óxido nitroso ou o metano que se desprenden en actividades como a agricultura ou a
gandería tamén teñen ese efecto.
CONSECUENCIAS DO CAMBIO CLIMÁTICO: a curto prazo, incremento da temperatura media
do planeta e da auga, e desxeo dos polos, co correspondente incremento do nivel da auga.
A longo prazo, podería darse un anegamento de zonas costeiras baixas, aumento das zonas
desérticas do planeta, desaparición de especies...