1. PAUTAS PARA REALIZAR UN COMENTARIO DE TEXTO FILOSÓFICO
0. Introdución: Que é un comentario do texto?
Un comentario de texto adoita consistir na lectura dun texto co obxecto de
captar o seu significado, analizalo e expoñer, nunha redacción estruturada e
coherente, a explicación do seu contido.
Comprender un texto significa entender as ideas expresadas nel polo autor,
relacionar estas ideas cos coñecementos que xa temos, e ser capaces de xerar
unha opinión ao respecto.
Na comprensión do texto interveñen varios factores:
1. A capacidade lectora que teñamos baseada tanto na axilidade no acto
de ler, coma no grao de comprensión do vocabulario que dispoñamos.
Se carecemos de axilidade lectora, deberemos solucionalo canto antes
practicando a lectura en xeral. Se carecemos de comprensión de
vocabulario, deberemos utilizar o dicionario co fin de clarificar todos os
termos que non coñezamos.
2. Os coñecementos que teñamos respecto ao autor do fragmento, do
problema ou tema presentado e tamén sobre outros autores que teñen
relación con el, aínda que non expresen a mesma opinión.
1. Pasos para realizar un comentario de texto
Un comentario de texto debe seguir unha serie de pautas:
1. Lectura comprensiva do texto
Le atentamente o texto. Non repares no tempo; asegúrate de que
comprendes ben o texto. Subliña todos os termos ou ideas que te parezan
relevantes. Realiza notas ao marxe ou esquemas que nos permitan precisar:
a) O tema ou idea principal, isto é, o problema (no noso caso filosófico)
sobre o que versa o texto. Truco: imaxínate que llo tés que contar a un/unha
compañeiro/-a nunha ou dúas palabras).
b) As teses principais, é dicir, as posturas que defende o autor.
c) A estrutura do texto, dividíndoo en partes (pero sen obsesionarse con
elo).
d) Os conceptos (filosóficos) máis relevantes.
2. Redacción do comentario
Tendo diante o esquema, como axuda para ter identificados os principais
elementos do texto, e como guía que nos garante unha certa orden e
coherencia no comentario, debe abordarse a redacción do comentario de texto,
atendendo as seguintes recomendacións [Aínda que a orden do comentario
pode variar, e vós tedes que buscar a vosa, recoméndovos esta]

2. 1) Contextualización do texto: contextualizar o autor na súa época, na
corrente filosófica á que pertence. Contextualizar o texto na obra do autor e
na problemática xeral filosófica. Falar das influenzas que recibe o autor.
2) Análise estrutural que inclúa:
A idea principal.
As ideas secundarias.
A articulación no texto.
3) Análise semántica: precisión dos conceptos fundamentais (significado
que ten no autor do texto).
4) Explicación e desenvolvemento da temática do texto.
5) Valoración crítica tanto formal como de contidos.
6) Proxección histórica do autor ou das ideas sostidas no texto.
Ten en conta que:
Debe ter unha redacción sinxela, clara e organizada.
Debe demostrar comprensión do texto e presentar unha explicación
axeitada do seu contido.
Debe ter un carácter persoal e fluído.
Debe utilizar recursos de comentario: citas (sempre entrecomiñadas),
conexións contextualizadoras, referencias bibliográficas,...
E lembra que...
o Tés que redactar o comentario como se fose a ser lido por
alguén que non tivese coñecemento algún do tema.
o Debes evitar parafrasear o texto e dar rodeos innecesarios
sen explicalo.
o O texto non é un pretexto para falar de calquera cousa que
teñamos memorizada.