1. EQUIPO DE DINAMIZACIÓN DA LINGUA GALEGA
CEIP PONTE DOS BROZOS
CURSO 2013 – 2014
Manuel María Fernández Teixeiro, o noso poeta da Terra Cha, morreu o 8
de setembro de 2004 na cidade da Coruña. No 2014, cúmprense 10 anos do seu pasamento e por este
motivo o Equipo de Dinamización da Lingua Galega quixo facerlle unha pequena homenaxe
propoñéndovos a ilustración dalgúns dos seus poemas coa actividade Ilustramos poemas de Manuel
María.
Queremos darvos as grazas a todas e todos os que ides participar nesta homenaxe. Manuel
María tiña dous amores Saleta e Galicia, gustaríanos que o compromiso e a defensa de Manuel
María co país e a lingua o fixerades voso. El loitou toda a súa vida para que a cultura do noso
país non
quedara no esquecemento non fagamos nós que a súa loita morra con el.
Sei dun país...
Sei dun país que existe e non existe:
é unha patria terreal e humana
que envellece comigo día a día.
Teño na lembranza o seu recendo
a terra húmida, rosas e loureiro.
Habito as súas cidades exemplares
feitas de amor, dor e pedra gra
con árbores e rúas silandeiras
que van desembocar a prazas íntimas
de nomes de estrela ou andoriña.
Nos meus ollos levo as súas paisaxes,
a máxica xeometría das súas casas,
o seu ceo limpo, azul‐grisento,
sucado de leves nubes camiñantes,
de brétemas vagas como anceios
e luceiros que queiman como brasas.
Nos meus ouvidos gardo o son sutil
do vento cantando nos carballos,
o musical murmurio dos seus ríos,
o berro escuro e forte dos seus mares
e os versos que din as arboredas.
Esta patria existe. Eu vivo nela.
Non ten odios, rancores nin envexas.
Nunca souben, nin sei, o nome seu.
Mais cando desexo nomear a este país
os meus beizos énchense de luz
e, dende o fondo do ser, digo: SALETA.
O camiño é unha nostalxia (1985)
2. EQUIPO DE DINAMIZACIÓN DA LINGUA GALEGA
CEIP PONTE DOS BROZOS
CURSO 2013 – 2014
A continuación tedes unhas pautas para a realización da actividade:
Ilustración DOS Poemas
O traballo de ilustración dos poemas de Manuel María levarase a cabo no 2º
trimestre, dende o luns 20 de xaneiro até o luns 31 de marzo. Despois destas datas non se actualizaran os
poemas nin se recolleran ilustracións.
Queremos ter listo o libro para a semana das Letras Galegas, por iso vos pedimos que vos axustedes ás datas de
entrega.
As ilustracións e o poema deben ir en folio diferente.
O folio para a ilustración en orientación vertical, preferiblemente,
Se cada nena/o fai o seu debuxo, facede unha selección previa e mandar só como moito entre 6 e 8 por aula. A
selección última a fará o EDLG.
Se alguén decide facer unha ilustración por cada estrofa do seu poema, tede en conta a lonxitude do poema e que
ao mellor si é moi curto non é posíbel poñer varios debuxos na mesma páxina.
Detrás da ilustración escribide o nome do poema e da obra á que pertence e o nome do neno/a ou da aula que fixo a
ilustración.
Se facedes o favor, mandádeme por correo a letra do poema, o nome e a obra á que pertence, facilitariádesme
moito o traballo.
Os debuxos dáme igual como mos mandedes, o que queira en papel e ao que lle apeteza xa escanados.
No mes de marzo contaremos cunha Exposición sobre Manuel María que nos vai prestar a Fundación Manuel
María. A exposición estará no pavillón do 3º ciclo, no espazo que hai preto das aulas de 5º de E. Primaria.
3. EQUIPO DE DINAMIZACIÓN DA LINGUA GALEGA
CEIP PONTE DOS BROZOS
CURSO 2013 – 2014
Tedes a vosa disposición unha pequena biografía sobre Manuel María elaborada
polo EDLG.
Se algún de vós realiza algún traballo ou mural sobre o autor gustaríanos que nolo fixerades chegar ou que nos
mandedes fotos.
Moitas grazas polo voso traballo.
O EDLG