1. Sr. Conselleiro de Cultura, Educación e Ordenación Universitaria
Xunta de Galicia
As persoas que subscriben a presente, e que máis abaixo asinan, na súa calidade de
estudantes de Conservación Restauración de Bens Culturais na ESCRBCG, e en
representación da asemblea de alumnado do centro,
SOLICITANLLE unha entrevista coa finalidade de trasladarlle o desexo unánime da
comunidade educativa que representamos de que no curso escolar 2013-2014 as
ensinanzas artísticas superiores da Comunidade Autónoma de Galicia se adscriban ao
sistema universitario galego, e, en consecuencia, se poñan en marcha os mecanismos
para que o alumnado que no curso escolar 2010-2011 se matriculou nunhas
ensinanzas de grao reciba ao finalizar os seus estudos unha titulación de grao.
Debemos trasladarlle a nosa inquietude diante do feito de que a equivalencia
prevista entre as titulacións superiores e as de grao é unha norma española, non
europea, que pode traer consecuencias nefastas na nosa mobilidade e no
recoñecemento dos nas nosas titulacións en Europa e en España, onde en numerosas
ocasións a titulación universitaria é a única que computa para acceder a determinadas
becas, postos e concursos, pois a titulación superior se considera un mérito. España é
un dos poucos países europeos que mantén esa duplicidade de titulacións, pois na
inmensa maioría dos países europeos os títulos das artísticas superiores son
expedidos polas universidades, medida que beneficia aos naturais de cada país. No
noso país semella que se quere prexudicar aos naturais en beneficio dos comunitarios.
Por todo iso, e para acabar coa nosa permanente discriminación negativa
(becas, residencias, axudas ao transporte, Erasmus, estudos de posgrao....),
solicitamos esa entrevista, e facémolo tamén en nome das nosas nais e pais, irmáns e
irmás, familiares, veciños e veciñas, amigas e amigos, que non son quen de entender
como un problema de tan doada solución se demora no tempo, e cando ademais
todos os sectores implicados manifestan un consenso total.
Finalmente debemos trasladarlle a nosa plena confianza nas comunidades
educativas das que formamos parte para desenvolver ese proceso de adscrición e
posterior integración, pois tanto as direccións dos centros, como o profesorado e o
alumnado, saberán asumir co maior grao de rigor e responsabilidade todos os retos
que esa nova etapa lles demande e nos demande.
Agardando as súas novas, e pedíndolle se sume ao consenso que fomos construíndo
nestes meses, reciba un cordial saúdo.
En Pontevedra, a 15 de Maio de 2013