1. As máquinas compostas
Cales son os seus compoñentes?
As máquinas compostas son máquinas formadas por unha serie de pezas.
Moitas destas pezas poden ser máquinas simples.
Elementos fixos
Os elementos fixos dunha máquina son aqueles que lle serven de soporte.
Dentro destes elementos atopamos:
- A carcasa, que protexe o interior da máquina.
- A estrutura, sobre a que se apoian os demais elementos.
- Os circuítos, que conducen a enerxía.
- Os indicadores e pantallas, que mostran información sobre a máquina.
Motor
O motor é a parte da máquina que produce o movemento. Existen diferentes
tipos de motores segundo o elemento que proporciona o movemento á
máquina:
- O motor de combustión utiliza combustibles fósiles para funcionar.
- O motor eléctrico utiliza enerxía eléctrica procedente da rede eléctrica
ou de baterías.
- As turbinas proporcionan á máquina movemento a partir do vento ou da
auga.
- Os de tracción animal funcionan debido á forza que achega un animal.
- Os de accionamento manual ou a pedais funcionan grazas á forza dunha
persoa.
Elementos móbiles
Os elementos móbiles ou operadores mecánicos son aquelas pezas que
transmiten o movemento do motor a toda a máquina. Estes elementos
móbiles adoitan ser máquinas simples.

2. Son elementos móbiles as rodas, os eixes, as correas que unen dúas rodas e
transmiten o seu movemento, as pancas, os resortes, as manivelas e as
cremalleiras que se unen a rodas dentadas ou a outras cremalleiras.
Sensores
Os sensores son elementos que permiten á máquina recibir información
tanto da propia máquina como do exterior. Existen diferentes tipos de
sensores segundo o que captan. Así, temos sensores de temperatura, de luz
e de infravermellos. Tamén é un sensor a antena, que fai posible recibir
información do exterior.
Circuítos de alimentación e control
Os circuítos proporcionan enerxía ou diferentes elementos á máquina e
controlan o seu funcionamento. Hai distintos tipos de circuítos:
- Os circuítos de auga están formados por tubos polos que circula auga cara
a diferentes partes da máquina.
- Os circuítos de aceite son condutos por onde circula o aceite que lubrica a
máquina.
- Os circuítos eléctricos transmiten a enerxía pola máquina e agrupan os
elementos de control.
- Os programadores son circuítos que transmiten información desde un
computador a outros circuítos para indicar o funcionamento da máquina.
Se necesitas información adicional, podes consultar o interactivo sobre o
funcionamento de dúas máquinas compostas que o Goberno de Canarias
ofrece no seu portal [ver].