Traballo Ruido,Relatos de Guerra por Daniel Carcamo Avalo..pdf
Crea o teu museo/REDEMUSEÍSTICA DE LUGO
1. CREA O TEU MUSEO
Xustificación
A misión da Rede Museística Provincial inclúe amosar e visibilizar a importancia dos
museos como referentes para a consolidación da identidade cultural da nosa
comunidade.
Nos museos da Rede non só conservamos, expoñemos e difundimos o noso
patrimonio, senón que queremos expandir e compartir o concepto de museo coa
axuda das comunidades ás que representamos. Deste xeito traballamos para
proxectar a propia cultura fóra das nosas fronteiras mentres tendemos lazos co
exterior para enriquecernos a través dun intercambio cultural continuo.
Na Rede consideramos ademais que un museo é un espazo que lle pertence á todas e
todos, un espazo para idear, soñar e medrar sen esquecer de onde vimos. É por iso
que lanzamos este proxecto destinado a que os colexios creen con nós o seu propio
museo vital e patrimonial.
Obxectivos
Con este proxecto quérese achegar o concepto de museo aos centros educativos de
toda a provincia, entendendo as escolas como parte integrante da nosa comunidade,
pois son creadoras e transmisoras do noso patrimonio e a nosa cultura.
Contando coa axuda dos educadores da Rede, os colexios participantes explorarán a
idea do patrimonio desde un punto de vista activo, identificando e seleccionando os
elementos que conforman a súa propia identidade para crear con eles un museo vivo
e único a partir das achegas dos alumnos.
Contemporaneamente e a raíz das propostas das escolas participantes abrirase un
diálogo cultural con outros países, especialmente con Italia,onde se establecerá unha
colaboración con institucións educativas e museísticas para a realización de proxectos
paralelos a “Crea o teu museo”.
Abordarase ademais o rol que desenvolven a creatividade e a arte na creación de
cultura, polo que se contará coa participación de artistas que contribúan a nutrir de
contidos as propostas museísticas das escolas.
2. Metodoloxía e desenvolvemento
Os educadores dos catro museos da Rede Museística Provincial acudirán aos colexios
que o soliciten para traballar na construción dun museo propio, aportando materiais de
traballo, asesoramento e seguimento.
A Rede Museística porá a disposición dos centros participantes unha plataforma de
asistencia dixital que se encargará tamén da difusión das propostas e engadirá
información sobre os resultados dos proxectos, a súa xeolocalización mais material
multimedia específico.
A plataforma dixital servirá así mesmo de enlace cos proxectos levados a cabo
paralelamente en Italia e ficará a disposición dos artistas dixitais que colaboren coas
propostas.
Finalmente a continua actualización da devandita plataforma virtual consentirá a
avaliación do impacto e o os resultados acadados polo proxecto a longo prazo.