Discursu de

1. [Discursu del presidente del Comité Revolucionariu de la República
Independiente d’Obreros y Campesinos d’Asturies, Belarmino Tomás, tres
alcordar colos militares republicanos dirixíos por Franco, y en calidá de
Comandante del Exércitu Roxu d’Asturies, la rendición de la revolución
asturiana d’Ochobre de 1934]
Discursu de Belarmino Tomás nel balcón del Conceyu de Sama
18-10-1934
Collacios, soldaos roxos: equí ante vós, ensin nenguna medrana, seguros de que supimos
cumplir el mandatu que mos confiastis, venimos a da-vos cuenta de la murnia situación en que
cayó'l nuesu gloriosu movimientu insurreccional. Vamos da-vos cuenta de les conversaciones
sosteníes por nós col xeneral del exércitu enemigu, lo mesmo que de les bases propuestes por
ésti y que tenemos d'aceptar si queremos la paz.
Tenéi en cuenta, queríos collacios, que la nuesa situación nun ye otra que la d'un exércitu
vencíu. Vencíu momentáneamente. Toos, absolutamente toos, supimos responder como
correspuende a trabayadores revolucionarios. Socialistes, comunistes, anarquistes y obreros
ensin partíu, empuñamos les armes pa lluchar contra'l capitalismu'l 5 d'ochobre, fecha
memorable pal proletariáu d'Asturies.
Nun somos culpables del fracasu de la insurrección, puesto que nesta rexón supimos
interpretar el sentir de la clas trabayadora, que supo demostrar la so voluntá con fechos
concretos. Nun sabemos quién o quiénes fueron los culpables del fracasu del nuesu
movimientu. El tiempu va dexar que tou esto póngase en claru. Lo que sí podemos dicir ye que
nel restu de les provincies los trabayadores nun respondieron como yera'l so deber. Y ante
esta abstención, el Gobiernu pudo combatinos, non ensin antes tener que movilizar cerca de
cuarenta mil homes armaos colos medios de guerra más modernos y perfeccionaos.
Namá la nuesa rexón aguanta y llucha contra l'exércitu y el Gobiernu de la burguesía. El restu
de la península nun da señales de vida no qu'a la insurrección refierse, magar en delles
provincies foi declarada la fuelga xeneral, pero ensin pasar a más.
La llucha nun se plantegó como les necesidaes esixíen. Esistía y esiste la medrana de coyer les
armes, y esta medrana, por non llamalo traición, ye la que determinó precisamente'l fracasu
del nuesu movimientu, tan valientemente y con tanto heroísmu sosteníu equí per espaciu de
quince díes. Tenemos fusiles, ametralladores y cañones, pero fáltanos lo esencial, que son les
municiones. Nun disponemos d'un solu cartuchu. Nos nuesos frentes los soldaos roxos vense
obligaos a sostener l’avance enemigu, emplegando pa ello la dinamita. Namái con esto pueden
los soldaos roxos tener a raya al exércitu adversariu. Como vais entender, esta situación nun
puede enllargase un día más, pos disponese a aguantar significa'l ser achaplaos polos nuesos
enemigos y ser pasaos a cuchiellu. Nenguna ayuda podemos esperar del proletariáu del restu

2. de la península, ya que ésti nun ye más qu'un meru espectador del movimientu d'Asturies, y
ante esta situación nun ye posible siguir lluchando por más tiempu coles armes na mano.
L'artillería enemigo ta emplazada y dispuesta a destruyir los nuesos pueblos. Naide meyor que
nós puede saber los estragos causaos pola aviación. Si camentamos ensin apasionamientu,
vamos ver que namá se nos ufierta un camín: entamar la paz. Pa ello consultemos a los
Comités Revolucionarios esistentes, asina como a los xefes de grupu, que s'axuntaron nos
campos de batalla y dieron la so opinión. L'alcuerdu adoptáu por unos y otros, xuntu col
Comité Rexonal, foi'l de tramitar la paz. Asina se fixo y he equí les bases presentaes pol xeneral
López Ochoa.
(...)
Collacios: Si creéis que somos unos traidores, como dalgunos manifiesten, pegáinos un tiru, o
facéi con nós lo que meyor vos paezca. Pero nun sigáis virtiendo sangre cuando yá toles
posibilidaes d'ésitu tán perdíes. Nun mos negamos a lluchar y siguiríamos coles armes na mano
hasta derramar la nuesa última gota de sangre, siempres qu'el nuesu sacrificiu viérase
compensáu col trunfu de la nuesa insurrección n'Asturies y nel restu de la península. Pero lo
que nun podemos almitir y claramente manifestar, ye siguir gastando un momentu más les
nueses fuerces en devanéu.
Nun ye de cobardes deponer les armes cuando claramente vese que ye segura la derrota,
derrota que nun puede considerase como tal si pensamos na potencialidá del nuesu enemigu
según nos medios y les armes qu'ésti tuvo qu'emplegar pa combatinos. Naide, absolutamente
naide, va poder borrar de la hestoria lo que significa la nuesa insurrección. Reflexonemos pos,
collacios, y vais entender los nuesos razonamientos. La llucha ente'l capital y el trabayu nun
terminó nin va poder terminar en cuantes que los obreros y llabradores nun sían dueños
absolutos del Poder. El fechu d'entamar la paz colos nuesos enemigos nun quier dicir que
reneguemos de la llucha de clases. Non. Lo que güei faemos ye a cencielles un altu nel camín,
nel cual vamos iguar los nuesos erros pa nun volver cayer nos mesmos, procurando coles
mesmes entamar la nuesa segunda y próxima batalla, que tien de rematar nel trunfu total de
los esplotaos.
Conocemos l'ensañamientu con que vien actuando l'exércitu enemigu. Los crímenes, los
atracos, los robos y les violaciones tán a la orde del día del Terciu y los Regulares. Ante'l
mesmu xeneral López Ochoa foi espuestu por nós tou esto. Contestónos que nun taba
enteráu, pero que de ser ciertu tomaría midíes por que estos fechos nun se repitan. Nun
sabemos si tomó midíes series sobre'l particular. De palabra díxonos que sí. (*)
Tamién alcordemos, como yá vos dixi, que nun habría represalies. Yo creo, y conmigo el restu
de los collacios de los Comités, que nengún casu tenemos de faer de lo que sobre esti
particular díxonos el xeneral enemigu. El criteriu de los Comités ye qu'una vegada fracasáu'l
movimientu y alcordada la paz los más comprometíos pónganse a salvo, y non yá los
comprometíos, sinón toos cuantos puedan y tomaren parte nesti heroicu movimientu
revolucionariu.

3. Namás dicímos-vos, collacios, sobre esti particular, siendo nuesa última palabra una viva a los
valientes trabayadores d'Asturies y a la Revolución Social.
(*) La represión y abusos militares dexaron más de 5.000 deteníos, torturaos y desapaecíos
n’Asturies nos meses posteriores.