Fábules humanes ye un conxuntu afilvanáu de narraciones breves nes que l’autor busca una manera d’amañar les esmoliciones de la so esistencia cotidiana, los trabayos y los díes d’una vida desordenada, al través del filtru de la lliteratura y de la memoria. Escamplen estes hestories del mundu de los vivos, los muertos, les pantasmes, el discursu que principien los suaños y les fontes, los llibros, les señaldaes comunes a tolos seres humanos. La sorpresa o el plasmu nun siempre son los protagonistas que lleven la sonrisa o’l preste final del llector, alcuando son malpenes los filos de la trama que caltienen esa necesidá, tan vieya ente los homes y muyeres, de pasar el tiempu y aguardar el momentu nel que too fina, contando histories y atendiendo pa elles como si fueren propies.
Fábules humanes ensaya un formatu de narración breve qu’afale al llector a compartir la emoción y alcuando’l sentíu del humor colos que fueron escritos estos cuentos enfotaos en consiguir esa collaboración fundamental de la segunda persona a la que van dirixíos y ensin la que nun había tener sentíu obra lliteraria nenguna. Esti llibru, como toos, ye una propuesta de complicidá ente dos partes: autor y llector.
Pablo Antón Marín Estrada (Sama, Llangréu, 1966) ye autor de diversos llibros de poesía y narrativa. El so últimu títulu publicáu ye’l conxuntu de relatos Un palaciu enllenu d’ortigues (Suburbia, 2014).
Arriendes de narrador, Pablo Antón Marín Estrada ye también periodista, traductor, lletrista musical y activista en tolos campos de la cultura asturiana. El llinguaxe cenciellu y la claridá son beneficios colos que Pablo Antón Marín nun va dexar de regalar nunca a los sos llectores. L’autor ye dueñu d’un universu propiu de referencies: el pasáu —delles veces tráxicu y delles veces máxicu—, la señaldá, el tiempu fuxío, pero tamién esos mundos perdíos na historia d’una vida, eses vides que pasen y desapaecen al par nuestru de contino.
3. 12
L’ADORAOR Y LA MANO
Acudiera al Centru d’Arte Contemporáneu pa asistir a
aquella perfomance d’un artista multidisciplinar eslovacu,
non tanto por que m’interesara la so obra como porque se
publicitara la sesión como un homenaxe a Ramón Gómez
de la Serna. Sentía el comiciu de saber de qué manera
podía influyir nun señor de la Eslovaquia un vanguardista
tan netamente castizu como’l gran Ramón.
Criáu nuna villa pequeña del vai del Nalón y avezáu a
buscar caminos imposibles metanes la cotolla del monte
o ente los fayeos más impenetrables, carezo de talu sentíu
de la orientación en ciertos espacios urbanos como los ae-
ropuertos internacionales o los centros d’arte contempo-
ráneu –inda estos últimos seyan provinciales o autonómi-
cos–. A ésti, en concretu, yá fuera media docena de veces y
toles seis me perdiera pelos sos ravesosos llaberintos.
Nun tuvi meyor suerte na presente ocasión pa topar la
sala na que l’artista, de nome Roman Kosice, diba enta-
mar el so homenaxe performativu al divertíu santón de
la Cripta del Pombo. A la fin, después de dar munches
vueltes y pasar alcuando hasta tres veces pel mesmu pa-
siellu, crucéme con un rapaz col pelo teñío de verde y un
polu de Fred Perry del mesmu tonu (el típicu conserxe
d’un Centru d’Arte Contemporáneu, pescudé), que con
muncha amabilidá indicóme’l camín a siguir.
4. 13
Por mor del mio alloriu algamé la sala –una especie de
palombar, al que se xubía per una escalerina de caracol–,
de la que yá escomenzara la sesión. Les lluces taben apa-
gaes y la oscuridá yera absoluto a nun ser un rellumín de
lluz rosa que se proyectaba en techu de la sala. Gracies a
esa regaya de mínima claridá pudi aldovinar al públicu,
un par de docenes de persones, unes sentaes en suelu y
les más echaes pámpana arriba. Igüaben un semicírculu y
nel centru había un puntu tiráu en decúbitu supinu, colos
brazos en cruz y la cabeza metida dientro una descoma-
nada mazcarona. Llevaba puestu un arnés. Dende les cua-
tro esquines de la saluca remanecía un ruidu machacón
y amoriante, asemeyao a ciertos palos minimalistes de la
música ellectrónica.
El runrún españó de sópitu nuna ximuestra de terre-
motu sonoru y una suerte de grúa mangada nel techu es-
comenzó a llevantar al home de la mázcara y los brazos
en cruz… Vímoslu ascender como un acróbata de circu,
a modino, mientres el rellumu de lluz rosa fundíase con
una proyección en blanco y negro na mesma pantalla del
techu. Bien lluego reconocí nes imáxenes la perfoman-
ce de Ramón, col estanque del Retiro de fondu, de «El
Orador y la Mano». Falaba l’autor de les gregueríes del so
monóculu ensin cristal y les coses que podía ver al través
d’él. Después púnxose asonsañar el cacarexu de les pites
«al final de una tarde caliginosa» y después el mesmu son
notra tarde calorienta d’agostu.
Entendí por qué casi tolos espectadores taben echaos:
yera la única manera de disfrutar del espectáculu ensin aca-
5. 14
bar col pescuezu y les cervicales estrozaes. Espanzurriéme
tamién y vi cómo l’artista taba yá a cuatro dees del techu,
nel que’l gran Ramón, con esparabanes de charrán de fe-
ria, sacaba del bolsu d’atrás del pantalón un guante cinco
talles más grande del que-y correspondiera: «es la mano
convincente», declaraba. Y como si esa fuere la conseña
pa qu’escomenzaren a pasar coses estraordinaries y pro-
dixoses naquella Cueva de Montesinos del arte más ac-
tual, sentí la prosimidá física de dalguién y qu’una mano
–ensin guante–, sunpunxe femenina pola delicadeza cola
que s’esnidiaba, foi posar na mio pierna.
Un nuevu terremotu solmenó dende los bafles de les
cuatro esquines y diome tal sustu que nun tuvi valor pa
virar la cabeza a ver qué clas de gárgola o medusa me taba
confundiendo, de xuro, cola so pareya. Miré pa enriba en-
sin mover un músculu y namás entós me decaté de lo que
representaba el mazcarón del artista colgáu: yera una ties-
ta de páxaru, pudiere ser d’una palomba. Agora enarquia-
ba los brazos como un nadador d’estilu mariposa ensin
agua nun xestu qu’entendí como’l d’adorar o face-y la fola
a la imaxe de Ramón. Pa entós la mano misteriosa fuera
espurriéndose como una culiebra pela pierna y allegába-
se a esa rexón tan íntima que gobierna yá na entepierna,
propiamente dicha. Agora sí tenía de vírame, caballero-
samente, pa esclaria-y a la propietaria de la mano la so
confundidera. Volvió impidímelo otra descarga decibélica
y un manancial de lluces parpaguiantes qu’enfocaben al
eslovacu alló nos altos. L’artista descansara de la fatigosa
adoración y acababa de sacar nun sé de ónde un plátanu
6. 15
rematáu nun cabu como’l de la vela famosa de Gómez de
la Serna. Escomenzó llambelu a pocoñinos, después me-
tiólu na boca nun actu que yera a toles lluces –aquelles
escases y parpaguiantes que lu allumaben– una verdadera
felación, remató papándolu a bocaos nel mesmu momentu
en que la proyección se terminaba con un fundíu en negru.
Foi neses cuando la mano misteriosa se me quitó
d’enriba p’aplaudir, como les manes de les dos docenes
d’espectadores presentes na perfomance de Roman Kosice,
que saludaba al respetable esnalopiando colos brazos allá
nes altures.