Tsab ntawv xov xwm Kav Tos Liv.

3. PHIAJ NRHIAV ZAJ
COV ZAJ
PHAB
Nthuav Zaj Nyeem Hnub Chiv
Yes Xus sawv rov los 1
Tus tsim pom tab sis nws ntseeg mas nws txoj hmoov zoo 3
Vaj Qhia Lus Ntuas
Cov ntseeg nqua hu kom tiv thaiv Tswv Ntuj kev tshwm sim nyob ntawd 6
Ua tim khawv txog Yes Xus nyob hauv lub neej tsob hwb lwm tus 7
Peb tsum raws Yes Xus xws li niam Mab Liab 8
Leej Pleev sawv rov los, ua kom peb tsis tag kev vam khom 9
Xov Xwm
Kev thaj yeeb muaj zog dua tsov rog 10
Vaj Qhia Fas Ntshis Kus mus tsham Is Lav teb 11
Hmoob Kav Tos Liv kawm txog lub neej tom qab tuag tas 12
Kev Ntseeg Kav Tos Liv
Tswv Ntuj qhia qhov tseeb rau tib neeg 13
Huab Tais, yog koj xav, mas koj ua kuv huv tuaj yeej tau! 15
Ntxiv Txoj Kev Ntseeg
Lis Piam Ntshiab (Holy Week) 17
Caij Hla (Passover) 21
Tham Txog Hmoob
Hmoob teev xwm kab 22
Kev ntseeg thiab kab lis kev cai 24

4. LIAJ LUV TSEB NPLEJ (16.03.2021-15.04.2021) | 1
Thawj hnub pib lub lis piam, thaum sawv
ntxov, ntuj tsis tau kaj, Mab Lias Mas Ntas Las
mus tom ntxa. Nws pom daim txiag zeb
tshem ntawm lub ntxa lawm.
Mab Liab Mas Ntas Las khiav mus cuag Xis
Moos Pob Zeb thiab lwm tus thwj tim, uas
yog tus Yes Xus nyiam. Nws hais rau nkawd
tias “Lawv nqa Huab Tais tawm hauv ntxa
lawm, peb tsis paub xyov lawv coj nws mus
tso qhov twg lawm.”
Pob Zeb tawm plaws mus, lwm tus thwj tim
kuj tawm plaws thiab, nkawd mus tom ntxa.
Nkawd ob leeg ua ke khiav mus, tab sis lwm
tus thwj tim khiav nrawm dua Pob Zeb, nws
khiav ua ntej, nws xub mus txog tom ntxa.
Nws khoov mus xauj, nws pom tej hlab ntaub
nyob ntawd; tab sis nws tsis chaws mus hauv.
Ces Xis Moos Pob Zeb lawv tus thwj tim qab
mus txog, nws chaws mus hauv lub ntxa. Nws
pom cov hlab ntaub nyob ntawd, hos daim
ntaub qhwv taub hau kauv cia nyob lwm
qhov, tsis xyaw cov hlab ntaub.
Ces lwm tus thwj tim uas xub mus txog
ntawm lub ntxa mam li chaws mus hauv.
Nws pom ces nws ntseeg. Vim lawv tseem tsis
tau to taub tias Yes Xus yuav sawv hauv cov
tuag rov los raws li Ntawv qhia. (Z20:1-9)
Nyob ntiaj teb no yam xwm loj tshaj thiaj
yog qhov tias Huab Tais Yes Xus sawv rov
qab los. Txij hnub ntawd los mas ntau txhiab
plhom leej neeg ntseeg txog Yes Xus, thiab
rau siab ua raws li Yes Xus qhia.
Kwv tij, thawj hnub lawv muab Yes Xus tua
nyob saum Ntoo Cuam. Thaum tsau ntuj
lawv txo Yes Xus lub cev coj mus zwm ntxa.
Hnub peb, thaum sawv ntxov, ib cov poj
niam mus tom Yes Xus lub ntxa. Lawv pom
Yes Xus lub ntxa khoob lug, tsis muaj Yes
Xus lub cev nyob hauv lawm. Lawv tsis nco
qab tias ua ntej no Yes Xus xub tau hais tias
nws yuav sawv rov qab los. Lawv tsuas xav
tias muaj neeg nyiag Yes Xus lub cev mus
lawm. Cov poj niam ua xyem xyav, lawv dauv
muag ntsia hauv av. Ces ib sij huam lawv lub
tswv yim pom kev meej kawg, lawv pom Yes
Xus sawv rov los raws li nws xub hais tseg.
YES XUS SAWV ROV LOS
HNUB CHIV HLA Tus sau: TP. Txawj Foom (2009)

5. 2 | (LIAJ LUV TSEB NPLEJ (16.03.2021-15.04.2021)
Cov poj niam pom tej xwm zoo li ntawd lawv
rov los hais rau Yes Xus cov thwj tim tias Yes
Xus sawv rov los lawm. Tab sis cov thwj tim
tsis ntseeg. Lawv tsuas xav tias cov poj niam
hais lus ntseeg tsis tau.
Pob Zeb xav paub tias tej xwm ntawd yog
zoo li cas tiag, nws nyob tsis taus, nws maj
zeem mus tom Yes Xus lub ntxa. Zam kuj
mus thiab.
Zam hluas dua Pob Zeb, mas nws xub khiav
mus txog lub ntxa ua ntej, tab sis nws tsis
tau chaws mus hauv lub ntxa. Pob Zeb tuaj
txog nws chaws mus hauv lub ntxa, nws pom
lub ntxa khoob lawm. Tsis muaj Yes Xus lub
cev nyob hauv lawm. Nkawd pom cov ntaub
qhwv Yes Xus lub cev nyob hauv pem teb li
qhov qub, tsis pov tseg dog dig. Nkawd
mem tau tias yog muaj tub sab nyiag Yes
Xus lub cev tiag, mas tsis phim lawv yuav
xub muab cov ntaub qhwv tuag hle. Yog
lawv hle, mas lawv puas yuav rov tso kom
zoo li qub.
Txij thaum Yes Xus tuag los txog rau hnub
ntawd, mas ob tug thwj tim tsis tau xav ib
zaug txog Yes Xus lo lus uas nws xub hais
tias nws yuav sawv rov qab los. Tab sis nyem
no Zam pom tej ntawd mas nws pib ntseeg
tias Yes Xus sawv rov los. Hos Pob Zeb, mas
nws tsis pom qab xav li cas txog tej xwm
ntawd. Zam yog tus thwj tim uas Yes Xus
nyiam, zam kuj nyiam Yes Xus thiab. Vim
nws nyiam Yes Xus tas siab mas nws thiaj
xub mem tau tias Yes Xus sawv rov qab los
lawm, ces nws xub ntseeg.
Kwv tij, Huab Tais Yes Xus tuag thiab sawv
rov los raws li Ntawv Ntshiab sau tseg, nej
twb tau hnov Huab Tais Yes Xus tej lus
ntawd tib yam li Zam lawm thiab. Nej yuav
ntseeg txog Yes Xus tib yam li Zam, nej tso
siab rau Huab Tais Yes Xus, ces nej yuav tau
txoj sia nyob mus li, nej yuav nrog Huab Tais
Yes Xus sawv rov los nyob hauv hnub ntiaj
teb kawg mog!
+++++++++++++++++++++
Vaj Qhia Fas Ntshis Kus ua Tswv Cuab hauv lub txoos teev Ntuj Hnub Chiv
Nqaum Nplooj nyob hauv Tuam Tsev Teev Ntuj hwm Leej Ntshiab Pob Zeb, Vas
Tis Kas. Xyoo no ncaj rau Hnub Chiv tim 28 lub 3 hlis.
(Vam txog: www.vaticannews.va)

6. (LIAJ LUV TSEB NPLEJ (16.03.2021-15.04.2021) | 3
Tib hnub ntawd thaum tsaus ntuj, uas yog
thawj hnub pib lub lis piam, cov qhov rooj
hauv qhov chaw cov thwj tim nyob kaw tas,
vim lawv ntshai cov Yus Das. Yes Xus los
sawv hauv nruab nrab, nws hais rau lawv tias
“Nej nyob kaj lug.”
Thaum Yes Xus hais lo lus ntawd tas, nws
muab nws ob txhais tes thiab nws phab tav
rau lawv saib. Cov thwj tim pom Huab Tais,
lawv zoo siab kawg. Yes Xus rov hais rau
lawv tias “Nej nyob kaj lug ! Kuv xa nej mus
xws li Leej Txiv xa kuv tuaj.”
Yes Xus hais li tas, nws tshuab pa rau lawv,
nws hais rau lawv tias “Nej txais Leej Ntuj
Plig Ntshiab. Nej daws txhaum rau leej twg,
mas nws cov txhaum yuav daws. Nej tsis
daws leej twg cov txhaum, mas nws cov
txhaum yuav nyob.”
Tos Mas yog ib tug hauv pab Kaum Ob, nws
tseem hu ua Dis Dws Mos thiab. Thaum Yes
Xus tawm los, mas nws tsis nrog cov thwj tim
nyob. Lwm cov thwj tim hais rau nws tias
“Peb pom Huab Tais lawm !”
Ces Tos Mas hais rau lawv tias “Yog kuv tsis
pom lub qhov txhab ntsia hlau nyob hauv
nws ob txhais tes, yog kuv tsis muab kuv tus
ntiv tes ntxig lub qhov ntsia hlau, thiab yog
kuv tsis muab kuv txhais tes rau ntawm nws
phab tav, mas kuv tsis ntseeg.”
Yim hnub tom qab, cov thwj tim rov nyob
hauv tsev dua. Tos Mas kuj nrog lawv nyob
thiab. Cov qhov rooj puav leej kaw tas. Yes
Xus tawm los sawv hauv nruab nrab, nws
hais rau lawv tias “Nej nyob kaj lug !”
Ces Yes Xus hais rau Tos Mas tias “Cev koj
ntiv tes rau ntawm no, koj ntsia kuv ob txhais
tes. Cev koj txhais tes los, muab rau hauv kuv
phab tav. Koj txhob ua neeg tsis ntseeg ntxiv,
koj ntseeg mog.”
Tos Mas teb rau Yes Xus tias “Kuv tus Huab
Tais, Kuv tus Tswv Ntuj.”
Yes Xus hais rau Tos Mas tias “Vim koj pom
kuv, mas koj thiaj ntseeg. Cov uas tsis tau
pom tab sis lawv ntseeg, mas lawv txoj
hmoov zoo.”
Yes Xus tseem tau ua lwm cov cim ntau nyob
ntawm cov thwj tim xub ntiag, uas tsis tau
muab sau rau hauv phau ntawv no. Tau
muab cov cim no sau tseg kom nej ntseeg
tias Yes Xus yog Leej Pleev, Tswv Ntuj Leej
Tub. Nej ntseeg ces nej yuav muaj txoj sia
nyob hauv nws lub npe. (Z20:19-31)
Kwv tij Hmoob, zaum puav peb kuj zoo li
Tos Mas, peb tau xav tias kheev kuv lam
TUS TSIS POM TAB SIS NWS NTSEEG MAS NWS TXOJ HMOOV ZOO
LIS PIAM 2 CAIJ HLA Tus sau: XH. Yaj Nom Thoob (2009)
Thoob

7. 4| LIAJ LUV TSEB NPLEJ (16.03.2021-15.04.2021)
pom Yes Xus xws li cov thwj tim pom, mas
kuv yuav ntseeg xwb xwb li.
Kwv tij sawv daws, thov kom peb xav txog
Yes Xus lo lus, uas hnub no nws hais rau Tos
Mas tias “cov tsis pom hos lawv xub
ntseeg mas lawv txoj hmoov zoo” Peb
paub li no lawm peb txhob ua xyem xyav,
peb yuav cia li zoo siab ntseeg txog Yes Xus
mog!
Tau muaj 2000 xyoos tas los no, Yes Xus
txais lub cev los ua neeg, nws tuaj qhia Tswv
Ntuj txoj kev cawm, rau ntiaj teb neeg. Peb
paub tias Yes Xus yog Tswv Ntuj Leej Tub
tiag nws txais kev tuag. Peb hnub Yes Xus
sawv rov los. Tej xwm no txheej neeg thaud
lawv paub zoo ces thiaj muaj neeg coob
coob yeem tuag ua tim khawv zeem tseeb
txog Yes Xus.
Xws li xyoo 117, nyob hauv lub nroog Lis
Yoos nyob Fab Kis teb, Cov nom tswv thiab
cov pej xeem huab hwm ua hmoov loj kawg,
lawv ua ntau yam ua si, nyob hauv lawv lub
tshav ua si. Thaum ntawd lawv txhob txwm
ntes ib pab neeg ntseeg Ntuj. Lawv ntes cov
tswv tsev thiab cov qhev huv tib si. Lawv
muab cov qhev tsim txom kom cov qhev
liam ub liam no txog lawv cov tswv ntseeg
Yes Xus. Muaj tej tus qhev, lawv kuj lam tau
lam liam thiab tiag.
Ces lawv tsim txom ib tug ntxhais qhev
nyuam qhuav txais lub Cim Ntxuav, nws lub
npe muab ntxeev ua lus Hmoob mas hu ua
Dawb. Lawv ua phem kawg rau Dawb, tiam
sis Dawb siab tawv thiab Leej Ntuj Plig tuaj
pab nws, ces nws teb rau cov neeg tsim
txom nws hais tias “Kuv yog ib tug ntxhais
ntseeg Ntuj! Nyob hauv peb cov neeg, tsis
muaj ib tug ua ib qho phem dab tsi.”
Lawv muab Dawb tsim txom npaum li cas los
Dawb teb li qhov qub. Cov tswv tsev ua Ntuj
kev cai pom lawv tus ntxhais txib ua siab loj
zoo li ntawd mas lawv qhuas kawg,
Nyob hauv lub tshav ua si, tib lub sij hawm
ntawd cov nom tswv xub muab txim rau tus
Tswv Qhia Pos Tees uas nws laus laus lawm.
Lawv hu tej tus pej xeem ntxub cov neeg
ntseeg Ntuj los ncaws tus Tswv Qhia thiab
ntaus tus Tswv Qhia. Lawv ua tej tus neeg
tsis paub hwm tej tus neeg laus. Thaum tus
Tswv Qhia yuav tuag, lawv coj nws mus kaw
cia hauv tsev loj faj, ces nws tseem nyob tau
ob hnub ntxiv, nws thiaj mam tuag.
Tus me ntxhais Dawb thiab tus Tswv Qhia
Pos Tees ua siab loj zoo li ntawd mas tas cov
neeg ntseeg Yes Xus thiaj xav tuag ua tim
khawv xws li lawv tus Tswv Qhia Pos Tees.
Thaum lawv mus txog qhov chaw lawv yuav
tuag, mas lawv zoo siab lawv luag nyav, lawv
saib cov hlua khi lawv tes lawv taw yog zoo li
ib co npauj nyiag npauj kub. Ntawv hais tias
lawv lub cev tsw qab cuag li muab tshuaj los
pleev. Ces nyob hauv lub tshav ua si, tas
tsoom sid ntsia cov tub rog tsim txom Yes
Xus cov tim khawv. Cov tim khawv nyob
hauv lub tshav muaj 50 leej. Qee tus cov tub
rog muab nplawm tas zog kom tuag, qee tus
lawv muab ntsia nyob saum ntoo cuam, qee
tus lawv muab txiav taub hau, qee tus lawv
muab rau cov tsiaj qus tom. Lawv tseem
nrhiav tej zaj tswv yim txawv txhia zaus kom
tau tsim txom cov neeg ntseeg Yes Xus.
Lawv muab tej txoj saw hlau los hlawv liab
liab ces lawv muab los khaub zig cov neeg

8. LIAJ LUV TSEB NPLEJ (16.03.2021-15.04.2021) | 5
ntseeg lub cev, cov neeg ntseeg ntawd lawv
tej tawv txoom zom zaws tsw kub hnyiab
ntxiag mus thoob lub tshav ua si.
Thaum lawv ua zoo li ntawd rau cov neeg
ntseeg Ntuj, mas lawv rov muab tus ntxhais
Dawb los khi rau ntawm ib tug ncej nyob
hauv nruab nrab lub tshav, lawv xav tias
nyiaj Dawb pom nws cov huab tais thiab nws
cov neeg ntseeg Yes Xus tuag zoo li ntawd
mas nyiaj Dawb yuav ntshai ces Dawb yuav
thim txoj kev ntseeg Ntuj. Tiam sis Dawb
nyob ntawm nws tus ncej zoo li nyob saum
ntoo cuam, nws hais lus nrov nrov thov Ntuj
pab cov neeg raug luag tsim txom, ces sawv
daws haj yam ua siab loj dua. Thaum tshuav
Dawb tib leeg xwb mas lawv muab hlua los
nplawm nws tas zog, ces lawv muab Dawb
los cuam rau hauv ib daim txiag thiab lawv
muab nws txhiab nyob saum lub cub tawg.
Dawb tseem tsis tau tuag, ces lawv thiaj
muab nws los qhwv rau hauv ib lub vas thiab
lawv tso nws rau ntawm ib tug heev nyuj
xub ntiag, tus nyuj muab Dawb ncaws tej
niag teg pov rau saum Ntuj. Dawb tseem ua
pa, cov tub rog thiaj muab Dawb caj dab
txiav.
Ntawv hais tias tas tsoom neeg tau pom
Dawb raug txom nyem loj luaj li ntawd, mas
tab yog cov neeg teev dab los lawv qhuas
tias nws lub siab loj tiag thiab ntseeg Ntuj
zoo.
Thaum lawv muab cov neeg ntseeg Yes Xus
tua tas zoo li ntawd mas lawv tseem muab
cov neeg tuag ntawd lub cev los hlawv ua
tshauv thiab muab pov tseg rau hauv tus
niam dej Loos.
Ob txhiab xyoo dhau los no kuj muaj ntau
leej neeg mob tau ntsib Yes Xus ces Yes Xus
kho mob rau lawv. Nyem no Yes Xus mus
saum Ntuj lawm. Nws tsis yees tawm tuaj
rau peb pom, tiam sis nws kuj nrog peb
nyob, peb tso siab tias Yes Xus tseem nrog
peb nyob ua peb luag. Nws tseem pab cov
neeg vam txog nws. Tab txawm hnub no
peb tsis tau pom Yes Xus tim ntsej tim muag
tiam sis peb paub tias Yes Xus nrog nraim
peb mus li.
Kwv tij, nej rov xav txog Yes Xus lo lus tias
Cov tsis pom, lawv xub ntseeg, mas lawv
txoj hmoov zoo, thaum nej to taub lo lus
no lawm, nej txhob ua siab hnyav, nej cia li
tig los ntseeg txog Yes Xus.
Nej hais rau Yes Xus tias “Huab Tais, thov koj
pab kuv kom kuv paub koj zoo zuj zus, ces
kuv yuav hu koj ua kuv tus Huab Tais! Kuv
Tus Tswv Ntuj! ib yam li koj cov thwj tim xub
tau hu koj.”
+++++++++++++++++

9. 6 | LIAJ LUV TSEB NPLEJ (16.03.2021-15.04.2021)
Hnub tim 17 lub 3 hlis no Vaj Qhia Fas
Ntshis Kus xaus nws cov lus hauv kev thov
Ntuj koom nrog Peb Leeg Huab Tais txog
Leej Ntuj Plig Ntshiab cov hauj lwm.
Nyob hauv hnub no mas Vaj Qhia muab kev
tseem ceeb rau Leej Ntuj Plig Ntshiab txoj
hauj lwm. Vaj Qhia hais tias “Leej Ntuj Plig
Ntshiab yog thawj lub txiaj ntsim Tswv Ntuj
pub rau cov ntseeg txog nws. Leej Ntuj Plig
Ntshiab tshoj cov ntseeg lub siab kom qhib
txais Leej Pleev thiab pom zoo kom peb tsa
ncauj thov kev pab ntawm Leej Txiv.”
Vaj Qhia muab cov lus hauv Koom Txoos
Kav Tos Liv Kev Ntseeg los nthuav tias Leej
Ntuj Plig Ntshiab yog tus tshoj peb kom
thov txog Huab Tais Yes Xus. Tsis tas li
ntawd, Koom Txoos kuj qhia peb kom thov
Leej Ntuj Plig Ntshiab los tshoj peb lub siab
kom nyiam thov Ntuj ua ntej thiab tom qab
peb yuav ua ib yam dab tsi.
Vaj Qhia nthuav ntxiv tias Leej Ntuj Plig
Ntshiab txoj hauj lwm yog hais kom peb nco
ntsoov tias Huab Tais Yes Xus nrog peb
nyob txhua lub sij hawm thiab txhua qhov
chaw. Yes Xus Pleev tsis nrug deb ntawm
peb, Huab Tais Yes Xus nrog nraim peb,
Huab Tais Yes Xus niaj hnub qhia kom peb
hloov siab tshiab.
Muaj cov ntseeg coob leej, tsis hais cov txiv
neej los poj niam, lawv thov Leej Ntuj Plig
nqes los nyob hauv lawv raws li lawv zaj
thov.
Vaj Qhia thiaj hais kom peb nrhiav Tswv
Ntuj, tiv thaiv Tswv Ntuj kev tshwm sim nyob
hauv lub Moo Zoo, nyob hauv lub Cim Yug,
thiab nyob ntawm cov neeg vam txog nws,
puav tam li cov nplaim tawv zais.
Vaj Qhia hais ntxiv tias kev ua kom Tswv
Ntuj kev tshwm sim nyob ntawd txawm muaj
txoj sia nyob mas yog cov ntseeg thawj txoj
hauj lwm, vim yog lub teeb tsom kev kaj
nyob hauv nruab hnub thiab hmo ntuj ua
ntej yuav muaj lub Cim Yug nyob txawm
hauv Kav Tos Liv lub tsev tsam phooj.
Vaj Qhia cov lus kaw hauv hnub no mas Vaj
Qhia hais tias Leej Ntuj Plig Ntshiab yog tus
Xib Hwb qhia kev thov Ntuj rau cov ntseeg,
yog tus kws txuj nyob hauv kab ke thov Ntuj.
Leej Ntuj Plig Ntshiab ua kom muaj ntau txoj
kev thov Ntuj txhawv nyob hauv sawv daws.
“Nyob hauv lus tshav ntshiab huv tsis muaj
chaw kawg no, txuas muaj ib tug Tswv Ntuj,
yog Peb Leeg Huab Tais hauv kev nyiam,
yog tus pub kom cov neeg sib txawv muaj
tsim sib npaug.”
+++++++++++++++
COV NTSEEG NQUA HU KOM TIV THAIV
TSWV NTUJ KEV TSHWM SIM NYOB NTAWD
Tus txhais: Txawj Tsav Meej Mom Lauj
Thoob

10. LIAJ LUV TSEB NPLEJ (16.03.2021-15.04.2021 | 7
Lis Piam 5 hauv Caij Plaub Caug, Vaj Qhia
Fas Ntshis Kus tau nthuav txog nqe lus hauv
Ntawv Moo Zoo tias muaj ib cov Hes Las
mus cuag Fis Lis Pos kom lawv tau ntsib
Huab Tais Yes Xus. Cov Hes Las tus yam
ntxwv yog tus piv txwv hais txog cov neeg
nyiam nrhiav Huab Tais Yes Xus.
Nyob hauv Is Tas Lias teb mas tseem hwv
rov qab siv tsab cai txwv tsis pub neeg tuaj
sib txoos ua npoj ua pawg, ces Vaj Qhia Fas
Ntshis Kus thiaj rov ntuas sawv daws nyob
hauv kab sab online dua. Vaj Qhia cov lus
yog kom cov ntseeg sawv daws ua txoj hauj
lwm pab coj lwm tus los ntsib thiab paub
txog Huab Tais Yes Xus.
Zam Ntawv Moo Zoo, zaj 12 nqe 23-24
Huab Tais Yes Xus hais tias “Txog lub sij
hawm uas Neeg Leej Tub yuav txais koob
meej… yog lub noob nplej uas poob rau
hauv av tsis tuag, mas nws nyob nws ua ib
lub noob twm zeej. Hos yog nws tuag mas
nws txi txiv ntau.”
Vaj Qhia hais tias Huab Tais Yes Xus lo lus
no yog Huab Tais Yes Xus qhia tias nws yog
lub noob nplej zais ntshis txaus siab tuag
kom txi txiv ntau. Vaj Qhia kom sawv daws
ntsia tus Ntoo Cuam ces yuav paub thiab
nkag siab txog lo lus no.
Vaj Qhia hais tias Ntoo Cuam tau txia ua cov
ntseeg lub cim qhia txog Huab Tais Yes Xus
rau lwm tus, tshwj xeeb tshaj mas yog hauv
thaj tsam cov neeg tsis tau paub txog txoj
kev teev hawm Tswv Ntuj.
Vaj Qhia nthuav ntxiv tias Ntoo Cua qhia
txog Tswv Ntuj kev nyiam, kev tsob hwb, kev
txhiv tib neeg thiab ib yam tseem ceeb tshaj
mas yog Ntoo Cuam yog tsob ntoo muaj sia.
Nyob hauv neeg tiam no, sawv daws xav
pom Huab Tais Yes Xus ua ntej lawv mam
ntseeg. Li ntawd, cov ntseeg tsum ua tim
khawv txog Huab Tais Yes Xus nyob hauv
lub neej tsob hwb lwm tus. Vaj Qhia thiaj
ntuas tias peb raug hu los tseb lub noob sib
nyiam nyob hauv peb cov hauj lwm, tsis yog
hauv peb lo lus xwb.
Tswv Ntuj lub txiaj ntsim ua kom peb txi txiv,
txawm yuav nyob hauv thaj chaw lwm to
taub peb yuam kev, hauv kev txom nyem,
los yog hauv kev iab hiam, los yog hauv kev
haub ntxias.
Thaum lub noob yuav tuag yog lub caij txoj
sia yuav tawg paj txi txiv dua tshiab. Yam no
yog kev tuag thiab ke ciaj sia txoj kab ke. Li
ntawd, peb thiaj chwv tau kev xyiv fab thiab
kev nyiam tseeb lub txiv raws li Tswv Ntuj
tus xom lees, yog: kev khaub zig, kev khuv
leej, thiab hlub mos nyoos.
++++++++++++++++++++++
UA TIM KHAWV TXOG YES XUS NYOB HAUV LUB NEEJ TSOB HWB LWM TUS
Tus txhais: Txawj Tsav Meej Mom Lauj
Thoob

11. 8 | LIAJ LUV TSEB NPLEJ (16.03.2021-15.04.2021)
Nyob hauv Hnub Chiv Nqaum Nplooj xyoo
no Vaj Qhia Fas Ntshis Kus pib nws cov lus
hauv kab ke thov Ntuj tias “Xyoo no yog
xyoo tim ob uas peb txais lub Lis Piam
Ntshiab nyob hauv kev kab mob sib kis.”
Vaj Qhia Fas Ntshis Kus hais tias tej zaum
sawv daws yuav muaj lus nug tias nyob hauv
lub caij ntxhov quas niab li no, Huab Tais
Tswv Ntuj tab tom ua dab tsi?
Lo lus teb yog: Huab Tais Yes Xus txaus siab
txais tus Ntoo Cuam. Tsis yog Huab Tais Yes
Xus txais kev phem sab cev nqaij nyob hauv
caij kab mob sib kis xwb, Huab Tais Yes Xus
tseem txais tej kev phem nyob hauv sab
ntsuj plig thiab; vim kev phem siv lub caij
nyoog no los tseb lub noob tag kev cia siab,
kev vam khom thiab kev cov nyom rau hauv
neeg ntsuj plig.
Yog li ntawd, peb yuav ua li cas? Niam Mab
Liab ua tus qauv rau peb tias kom raws Huab
Tais Yes Xus qab mus.
Niam Mab Liab ris nws qhov kev mob, qhov
tsaus nti thiab ntxhov siab, nws raws nraim
Leej Tub txoj kev txom nyem, nws tsij taws
kom txoj kev ntseeg kev tso siab lub cub
tawg cig ntsa iab nyob hauv nws lub siab.
Vaj Qhia hais tias “Tswv Ntuj lub txiaj ntsim
pab kom peb taug txoj kev no tau.” Thiab
Vaj Qhia txhab zog rau cov ntseeg kom taug
txoj kev txom nyem no tau, yog tsum khuv
leej thiab mus nyob ze kev txom nyem
ntawd.
Muaj tej zaug peb yuav rov nug tus kheej
tias ‘Ua cas ho yog kuv?, xws li Xis Moos Xis
Nes Las tus raug yuam los kwv Yes Xus tus
Ntoo Cuam.
Vaj Qhia nthuav tias lub sij hawv ntawd, peb
yuav ntsib lub txiaj ntsim peb tau txais nyob
hauv kev ua zoo.
Vaj Qhia ntuas sawv daws kom thov niam
Mab Liab pab vim niam Mab Liab yog tus
taug txoj kev no ua ntej peb sawv daws.
PEB TSUM RAWS YES XUS XWS LI NIAM MAB LIAB
Tus txhais: Txawj Tsav Meej Mom Lauj

12. LIAJ LUV TSEB NPLEJ (16.03.2021-15.04.2021) | 9
Hnub Chiv Hla xyoo no yog ncaj rau tim 4
lub 4 hlis, Vaj Qhia xa lus rau tsoom neeg
thoob ntiaj teb tias hnub no peb ua hmoov
tsuj xeeb nco txog yam xwm pab kom peb
tsis tag kev vam khom: yam xwm ntawd yog
Huab Tais Yes Xus yeej kev tuag sawv rov
los.
Hnub no cov ntseeg thoob ntiaj teb yuav
tshaj lub moo zoo tias “Yes Xus tus raug
ntsia saum Ntoo Cuam, nws sawv rov los
lawm, As Les Lus Yas.”
Hnub Chiv Hla yog hnub Huab Tais Yes Xus
sawv rov los, yog hnub tshaj txog txoj kev
vam khom thiab kev nplij siab.
Lo lus hauv Hnub Chiv Hla yog lo tias “Tsis
muaj tus twg tuag ces yuav sawv rov los tau,
tsuas muaj Huab Tais Yes Xus tib leeg xwb.”
Vaj Qhia ntxiv lus tias Leej Txiv Tswv Ntuj tsa
Huab Tais Yes Xus sawv, vim Huab Tais Yes
Xus ua rau Leej Txiv txoj kev npaj cawm ntiaj
teb neeg tiav tuaj nyob hauv nws lub nra ris
peb kev qaug zog, kev mob, ris peb cov
txhaum, thiab ris peb txoj kev tuag. Li ntawd,
Leej Txiv Tswv Ntuj thiaj tsa Huab Tais Yes
Xus nyob siab thiab muaj sia nyob mus li;
Yes Xus Pleev thiaj yog peb tus Huab Tais.
Huab Tais Yes Xus cov qhov txhab yog lub
cim cav txog txoj kev nyiam mus tas ib
txhiab ib txhis. Li ntawd, tus twg nyob hauv
kev ntxias mas nws yuav los nkaum nyob
hauv Leej Pleev, nws thiaj yuav tau txais kev
vam khom lub txiaj ntsim ces nws yuav tsis
tag kev vam khom.
Vaj Qhia hais ntxiv tias Leej Pleev yog tus
pub kev vam khom thiab kev nplij neeg rau
cov raug kev txom nyem hauv zim txwv no.
++++++++++++++++++++++
LEEJ PLEEV SAWV ROV LOS, UA KOM PEB TSIS TAG KEV VAM KHOM
Tus txhais: Txawj Tsav Meej Mom Lauj

13. 10 | LIAJ LUV TSEB NPLEJ (16.03.2021-15.04.2021)
Vaj Qhia Fas Ntshis Kus hais cov lus no nyob
hauv lub nroog Mos Xus uas raug kev piam
sij loj tshaj nyob Is Lav teb. “Kev thaj yeeb
muaj zog dua tsov rog”. Zaum no yog thawj
zaug Vaj Qhia mus tsham Is Lav teb thiab
nws mus saib lub nroog Mos Xus uas nyob Is
Lav qaum teb. Vaj Qhia xav mus txhawb dej
siab rau tsoom pej xeem thiab thov Ntuj pub
rau cov neeg tuag.
Vaj Qhia Fas Ntshis Kus hnov cov Mawv Xis
Lim thiab cov neeg ntseeg nyob hauv lub
nroog Mos Xus piav txog lawv lub neej uas
raug cov Islam kav, Vaj Qhia foom hmoov
zoo rau lawv. Lawv cog lus tias lawv yuav
sawv ntawm plua tshauv thiab ua kom kev
phooj ywg ruaj khov. Kev sib ntaus sib tua
thiab sib ntxub ntxaug nyob hauv Tswv Ntuj
lub npe, mas yog ib qho txhaum loj.
Vaj Qhia Fas Ntshis Kus hnub nyoog 84
xyoos lawm, nws pom tej vaj tse piam sij
puas ntsoog thiab lub tsev teev Ntuj uas yav
tag los nyob hauv lub nroog Mos Xus xyoo
2014-2017. Tus Tswv Qhia nyob hauv lub
nroog Mos Xus hais rau Vaj Qhia tias :
“Peb yuav tsis siv txoj cai koom tshaj, peb
yuav tsis muaj kev sib tawg thiab tsis muaj
kev nyiag noj nyiaj txiag”. Lub nroog Mos
Xus raug kev piam sij loj yog xyoo 2017,
xyoo uas cov tub rog Is Lav caum tua cov
Islam. Vaj Qhia caij nkoj cua kiv ntas mus rau
lub nroog Mos Xus, Vaj Qhia pom tej kev
piam sij ntawd, zoo cuag li av qeeg nyob ib
ncig nws, thiab nws thov Ntuj rau tas cov
neeg ciaj thiab neeg tuag nyob hauv lub
nroog.
+++++++++++++++++++++
XOV XWM KEV THAJ YEEB MUAJ ZOG DUA TSOV ROG
Tus txhais: Lis Maib
(Daim duab no thau los ntawm: www.cdn.cnn.com)

14. LIAJ LUV TSEB NPLEJ (16.03.2021-15.04.2021) | 11
Hnub tim 5 lub 3 hlis no, Vaj Qhia Fas Ntshis
Kus sawv kev mus tsham Is Lav teb. Vaj Qhia
hais tias “Ntev heev lawm, kuv xav ntsib
tsoom pej xeem uas lawv raug kev kub
ntxhov, kuv xav ntsib cov neeg ntseeg uas
lawv zoo siab tuag nyob Has Nplas Has thaj
av thiab nrog rau lwm cov thawj coj kev teev
hawm. Peb yuav tshais ruam ua ke thiab ua
kwv tij nyob hauv peb txoj kev teev hawm.”
Ua ntej Vaj Qhia kev thov Ntuj yuav mus
tsham Is Lav teb, Vaj Qhia xub hais txog cov
xov xwm kub ntxhov nyob Mias Mas teb uas
ua rau neeg tuag coob leej. Thov kom cov
tub ntxhais hluas nyob hauv lub teb chaws
Mias Mas sib koom tes sib hlub, thiab muaj
kev cia siab txog yav tom ntej. Kev sib ntxub
thiab kev tsis ncaj ncees, kom hloov los ua
kev sib haum xeeb.
Nyob hauv kev thov Ntuj, Vaj Qhia hais muaj
ib lub ntsiab lus tias ua ntej peb yuav paub
Huab Tais Yes Xus, mas Huab Tais Yes Xus
hais tias ‘peb tsis paub tias kev thov Ntuj
yog li cas’. Qhov no yog qhov Yes Xus cov
Thwj Tim thov kom Yes Xus qhia rau lawv.
Qee zaus kev thov Ntuj ua kom peb paub
txog tib neeg kev txom nyem xws li tus
thawj tub rog Los Mas thov kom Yes Xus
mus kho nws tus tub. Vim tus thawj tub rog
tsis paub yuav thov Ntuj li cas, tab sis Yes
Xus yog lub qhov rooj uas coj peb nrog
Tswv Ntuj tham.
Hnub Vaj Qhia mus txog tuam ceeb Npes
Des, mas muaj tus thawj pwm tsav thiab cov
tub tseem hwv tos txais zoo kawg. Muaj cov
tub rog ntau txhiab leej saib xyuas kev ruaj
ntseg nruj kawg, vim Vaj Qhia yog tus thawj
coj ntawm lub Koom Txoos Los Mas Kav Tos
Liv nyob thoob ntiaj teb.
Vaj Qhia mus tsham Is Lav teb, yog vim nws
xav txhawb lub zog pub rau tsoom pej xeem.
Yav tag los Is Lav teb raug xwv txheej los los
ntawm tsov rog thiab kev caws hoob pob
tua neeg loj kawg. Vaj Qhia tau mus tsham 4
lub nroog tseem ceeb thiab raug kev piam
sij loj nyob Is Lav teb. Tshwj xeeb mas yog
lub nroog Nas Ntsas uas nyob qab teb thiab
lub nroog Mos Xus uas nyob Is Lav qaum
teb.
++++++++++++++++++
VAJ QHIA FAS NTSHIS KUS MUS TSHAM IS LAV TEB
Tus txhais: Lis Maib

15. 12 | LIAJ LUV TSEB NPLEJ (16.03.2021-15.04.2021)
Khej Me (Thaib teb)- Txiv Plig Nkaus Ntis Os
(Rev. Claudio Bertuchor) tus tswj lub koom
haum Os Npav sab Thaib teb thiab Los Tsuas
teb tuaj qhia txog lub neej tom qab txoj kev
tuag rau cov thawj coj Hmoob Kav Tos Liv
hauv Cheeb Koom Txoos Nas Qhoos Xas
Vaav 2.2
Tim 19 lub 3 hlis xyoo 2021 no, Txiv Plig
Txawj Pov (Rev. Ongart Kaser) tus Leej Choj
saib xyuas cov ntseeg hauv zos Khej Me tau
caw Txiv Plig Nkaus Ntis Os tuaj qhia txog
lub neej tom qab txoj kev tuag rau cov thawj
coj Hmoob ntseeg Ntuj nyob ib ncig zos
Khej Me, xws li: Fib Xaim, Nav Qhab, Nav
Xais, thiab Qham Qhaus.
Kev qhia zaum no mas vim muaj Hmoob Kav
Tos Liv ntau leej tsis to taub tias raws txoj
kev ntseeg Ntuj mas kev tuag thiab lub neej
tom qab ntawd yog zoo li cas tiag, lawv xav
tias tib neeg yog tuag lawm ces yuav mus
cuag poj cuag yawm thiab rov los thawj
thiab duab tshiab raws li Hmoob ib txwm
ntseeg los.
Dhau ntawd, Hmoob xav tias thaum ib tug
twg tuag lawm mas nws yuav mus ua neej
nyob dab teb, nws tseem tshaib nqis xws li
thaum muaj sia, ces Hmoob thiaj tuaj nyuj
laig dab thiab hlawv ntawv nyiaj ntawv kub
rau coj mus siv.
Txiv Plig Nkaus Ntis Os hais tias raws txoj
kev ntseeg Ntuj mas Tswv Ntuj muab av los
puab ua neeg thiab tshuab pa kom neeg
muaj sia tuaj. Thaum neeg tus plig tawm
hauv neeg lub cev mas neeg thiaj yuav tuag.
Tus qauv rov mus ua av, hos tus plig rov mus
cuag Tswv Ntuj vim tus plig yog Tswv Ntuj li
pa.
Thaum neeg tuag lawm, tsis muaj qhov
tshaib thiab nqhis lawm, tab sis neeg yuav
mus rau teb chaws them txim. Yam peb ua
tau pub rau cov tuag mas yog kev thov Ntuj
thiab ua cov hauj lwm zoo pub rau lawv.
Tom qab kev kawm tiav tas, cov thawj coj
sawv daws kuj tau sib tuav xam hais txog
Hmoob Kav Tos Liv cov kab ke pam tuag tias
yuav ua li cas thiaj muaj tus txheej txheem
thiab tus lwj lwm kom zoo xws tib yam thiab
haum rau lub Koom Txoos Kav Tos Liv.
HMOOB KAV TOS LIV KAWM TXOG LUB NEEJ TOM QAB TUAG TAS
Tus sau: Txawj Tsav Meej Mom Lauj

16. LIAJ LUV TSEB NPLEJ (16.03.2021-15.04.2021)| 13
Tswv Ntuj puas tau qhia tej yam rau ob
niam txiv hauv paus As Das thiab Es Vas?
Tswv Ntuj tau qhia yawg As Das thiab pog Es
Vas tias Tswv Ntuj yog tus tsim tas puas tsav
yam thiab kav tas puas tsav yam. Tswv Ntuj
tau muab tas puas tsav yam tsiaj txhu thiab
xyoob ntoo rau tib neeg los yug tib neeg
txoj siab Tswv Ntuj tau qhia As Das thiab Es
Vas tias, nkawd yuav mloog Tswv ntuj cov
lus qhia ces nkawd yuav tsis tuag ; nkawd
yuav muaj ib hom txoj sia nrog Tswv Ntuj
nyob mus li.
As Das thiab Es Vas puas tau mloog Tswv
Ntuj lo lus qhia?
As Das thiab Es Vas tsis tau mloog Tswv Ntuj
lo lus qhia. Phau Ntawv Ntshiab siv ib zag
paj lug qhia tias As Das thiab Es Vas mloog
tus dab phem txias ua nab tuaj ntxias nkawd
kom nkawd noj ib lub txiv ntoo uas Tswv
Ntuj txwv tsis kheev noj. Nkawd xav ua ob
tug paub txuj npaum li Tswv Ntuj. Ces
nkawd noj lub txiv.
Tswv Ntuj muab txim zoo li cas los nplua
As Das thiab Es Vas?
Tswv Ntuj hais rau As Das thiab Es Vas
nkawd yuav tsum khwv ua num thiaj tau
txhiam xws txaus yug siav. Nkawd yuav txawj
mob mob txawj tuag. Tab sis yav tom ntej
muaj ib tug yuav pab ntiaj teb neeg kom
ntiaj teb neeg tau kev yeej dab phem.
Tswv Ntuj cog lus zoo li cas rau yawg Nos
Hes?
Tswv Ntuj cog lus tias nws yuav tsis rov
rhuav ntiaj teb neeg ib zaug. Neeg lub siab
pheeb rau txoj kev ua txhaum. Tab sis muaj
lub ntiaj teb nyob txawm ntev li cas mas kuj
yuav muaj qoob loo, muaj caij no caij sov
ntev li cas. Ntiaj teb neeg yuav huam vam
mus puv ntiaj teb. Tswv Ntuj tsa zaj sawv
haus dej ua lub cim tias nws nrog lub ntuj
lub teb cog lus.
Ntiaj teb neeg muab hlob xws li lub caij lawv
ua pej thuam Npas Npes. Cov coj ntiaj teb
xav ua ib haiv neeg ntse thiab muaj peev
xwm loj luaj li Tswv Ntuj. Tab sis, vim ntiaj
teb neeg nyiam kev ua txhaum mas Tswv
Ntuj yuav ua kom ntiaj teb neeg tawg mus
ua ntau haiv neeg.
Cov lus uas Tswv Ntuj nrog Nos Hes cog
yuav kav ntev li cas?
Cov lus uas Tswv Ntuj nrog Nos Hes cog
yuav kav mus txog lub caij uas lub Moo Zoo
ri mus txog tas txhia haiv neeg. Tswv Ntuj
pub txiaj ntsim rau cov neeg ncaj nrhiav kev
paub Tswv Ntuj thiab mloog Tswv Ntuj.
Thaum Huab Tais Yes Xus Pleev tuaj txog
cov haiv neeg nyob ntiaj teb nws sau Tswv
Ntuj cov me nyuam sib ncaim rov los ua ib
pab ua Tswv Ntuj haiv neeg.
Tswv Ntuj tau hais dab tsi rau Has Nplas
Has?
Tswv Ntuj xav sau ntiaj teb neeg sib ncaim
rov los ua ib pab ib pawg, Tswv Ntuj thiaj
hais rau Has Nplas Has kom nws tso nws txoj
kev teev nws cov dab tseg, kom nws teev
Tswv ntuj tib leeg, ces Has Nplas Has yuav
ua txiv rau ntau haiv neeg, tas txhia haiv
neeg nyob ntiaj teb yuav txais ib txog
TSWV NTUJ QHIA QHOV TSEEB RAU TIB NEEG
Tus sau: TP. Nyiaj Pov (1998)

17. 14 | LIAJ LUV TSEB NPLEJ (16.03.2021-15.04.2021)
hmoov zoo nyob hauv Has Nplas Has. Cov
haiv neeg nyob ntiaj teb, thaum lawv txiav
siab ntseeg txog Tswv Ntuj thiab tso siab rau
nws Leej Tub Yes Xus Pleev, lawv los cuag
Has Nplas Has tsoom xeeb ntxwv nyob hauv
Yes Xus lub Koos Txoos.
Tswv Ntuj tau hais dab tsi rau haiv neeg
His Xas Lais?
Cov His Xas Lais yog Has Nplas Has tsoom
xeeb ntxwv. Tswv Ntuj npo cov His Xas Lais
ntawm txoj kev ua ib haiv neeg qhev. Tswv
Ntuj tshaj nws 10 lo lus qhia rau Mais Xes
thiab rau nws haiv neeg His Xas Lais nyob
ntawm lub Roob Xis Nais. Tswv Ntuj nrog
tsoom His Xas Lais cog lus. Tsoom His Xas
Lais cog lus tias lawv yuav mloog thiab teev
Tswv Ntuj tib leeg. Tswv Ntuj cog lus tias
nws yuav txuag nws haiv neeg mus, tsis pub
kom nws haiv neeg yaj ntshis.
His Xas Lais yog haiv neeg ua Tswv Ntuj Leej
Choj. Haiv His Xas Lais yog haiv neeg uas
Tswv Ntuj tau xub hais lus rau. His Xas Lais
yog tsoom neeg ntseeg cov tij laug. Haiv
neeg His Xas Lais tau tos ntsoov txog Leej
Pleev uas yuav tuaj tsim txoj kev nrog Tswv
Ntuj cog lus tshiab.
Tus tuaj qhia Tswv Ntuj cov lus kom
thoob plaws rau ntiaj teb neeg yog leej
twg?
Tus tuaj qhia Tswv Ntuj cov lus kom thoob
plaws rau ntiaj teb neeg yog Yes Xus. Yes
Xus Pleev yog Tswv Ntuj Leej Tub yug los ua
neeg. Yes Xus yog Tswv Ntuj Lo Lus. Yuav
tsis muaj lwm tus tuaj qhia ib lo lus tshiab
ntxiv txog Tswv Ntuj vim Huab Tais Yes Xus
yog Tswv Ntuj Lo Lus yug los ua neeg nrog
peb nyob.
Peb cov neeg ntseeg txog Yes Xus puas to
taub Yes Xus cov lus tas huv si?
Peb cov neeg ntseeg yuav tsum kawm Yes
Xus cov lus lub ntsiab tob mus txog hnub
ntiaj teb neeg dua tas lawm.
+++++++++++++++++++++++
Xyoo 1985 Vaj Qhia Zam Paj Lug Ob hu 100 tawm tus
Tswv Qhia tuaj sab laj nyob Los Mas, lawv tsim ib phau
ntawv tshiab ntim lub Koom Txoos Kav Tos Liv txoj kev
ntseeg.
Xyoo 1991 Vaj Qhia Zam Paj Lug Ob thiaj tso lus kom
luam phau ntawv hu ua “Lub Koom Txoos Kav Tos Liv
Txoj Kev Ntseeg” los yog ‘Catechism of the Catholic
Church’.
Xyoo 1998 Txiv Plig Nyiaj Pov pib txhais cov ntsiab lus
ua lus Hmoob thiab tshaj tawm hauv xov tooj cua ‘Zoo
Tswv Zov Yaj’ thawj zaug yog tim 21 lub 1 hlis 1998
(Vam txog cov lus qhib phau ntawv Koom Txoos Kav Tos
Liv kev ntseeg lub ntsiab)

18. LIAJ LUV TSEB NPLEJ (16.03.2021-15.04.2021) | 15
Hnub no Huab Tais Yes Xus hnov tus neeg mob
ruas lo lus thov tias “Huab Tais, yog koj xav
mas koj ua kuv huv tuaj yeej tau!” Yes Xus
cev tes tuav nws thiab hais tias “Kuv xav li
no: koj huv tuaj mas!“ Tam sim ntawd tus
mob ruas tso nws tseg, nws cia li huv tuaj.
(MT8: 1-4)
Cov kwv tij hnub no peb yuav zoo siab
khaws tej qib lus tseem ceeb hauv Ntawv
Ntshiab tseg. Yog tej qib lus uas qhia peb
tias “Huab Tais Yes Xus khuv leej neeg tas
nrho.”
Lo lus nug tias: hauv Ntawv Moo Zoo puas
muaj 2-3 zag lus uas qhia peb tias Huab Tais
Yes Xus nrog ib cov neeg koom siab koom
ntsws, ces Huab Tais mam li pab txhawb nqa
lawv lub neej?
Yeej muaj ntau zaj qhia peb txog qhov
ntawd. Nyob hauv lub zos Nas Ees, “luag tab
tom kwv ib tug tuag tawm tuaj txog qhov
ntawd, yog ib leeg tub twm zeej. Hos leej
niam yog ib tug poj ntsuam. Huab Tais pom
tus poj ntsuam, Huab Tais khuv leej nws.
Huab Tais hais rau nws tias niad! koj txhob
quaj. Ib ntsis Yes Xus hais ib lo lus tias tus
hluas, kuv hais rau koj, koj sawv mas! Ces tus
tuag cia li sawv zaum thiab nws pib hais lus”
(LK7: 11-17)
Hauv lwm lub zos, uas hu ua Npes Tas Nias,
“Yes Xus tus phooj ywg Las Ntxas Los kuj tau
tas sim neej. Nws twb zwm ntxa tau 4 hnub
lawm. Las Ntxas Los kuj muaj ob tug muam
yog Mab Liab thiab MasTas. Thaum Yes Xus
pom Mab Liab quaj thiab cov Yus Das uas
nrog Mab Liab tuaj, sawv daws quaj, mas Yes
Xus tu siab kawg nyob hauv nws nruab
siab….. Muaj ib daig txiag zeb kaw lub rooj
ntxas ces Yes Xus hais kom lawv tshem daim
txiag zeb. Ib ntsis Yes Xus hu ib suab nrov
nrov tias Las Ntxas Los, koj tawm los nraum
no! Tam sim ntawd Las Ntxas Los cia li tawm
plaws los kiag” (Zam11: 1-44)
Cov kwv tij, Yes Xus khuv leej tus poj
ntsuam, Yes Xus tu siab kawg nyob hauv
nws nruab siab. Ntawv Ntshiab hais tias:
Huab Tais Yes Xus khuv leej neeg tas nrho;
xws li no:
”Tsis muaj lwm txoj kev nyiam loj cuag li
yus siv yus txoj sia los pab yus cov phooj
ywg” (Zam15: 13) Yog thaum Yes Xus dai
saum ntoo cuam uas Yes Xus siv nws txoj sia
los txhiv nws cov phooj ywg ntawm qhov
txhaum. Yes Xus cov phooj ywg mas yog
peb sawv daws ntag. Li ntawd txhua txhia
zaus uas peb ua ntoo cuam lub Cim, mas
phim peb yuav rov ntseeg txog Huab Tais
Yes Xus txoj kev hlub uas loj tshaj plaws.
“Yes Xus kuj zoo siab coj nws lub neej
xws li luag. Tab sis nws nyiam Tswv Ntuj
HUAB TAIS, YOG KOJ XAV, MAS KOJ UA KUV HUV TUAJ YEEJ TAU!
TP. Txhiaj Foom (12-02-2012)

19. 16 | LIAJ LUV TSEB NPLEJ (16.03.2021-15.04.2021)
thiab nyiam tas ntiaj teb neeg heev, ces
nws thiaj tsis ntshai kev ploj kev tuag.”
(HN12: 11) Tim li cas Yes Xus siab loj
npaum li ntawd? kuj yog vim Leej Ntuj Plig
nyob txawm hauv nws. Ntawm peb uas tau
txais lub Cim Ntxuav, lub Cim Txhab Zog
thiab peb kuj txais lub Cim Yug ntau ntau
zaus, mas peb kuj muaj Leej Ntuj Plig
Ntshiab lub hwj huam nyob txawm hauv peb
thiab, ces peb thiaj nrog Yes Xus koom siab
koom ntsws yam peb tsis ntshai kev ploj kev
tuag.
Tus Hauv Paus Xa Lus Paj Lug hais tias “Tus
tib neeg twg paub Huab Tais Yes Xus
Pleev kev nyiam kev hlub yog tus paub
txuj ci tob tshaj plaws” (EFX3: 19) Cov kwv
tij, peb rov tsa muag ntsia tus Ntoo Cuam
thaum twg, mas peb yuav nco tias Huab Tais
Yes Xus khuv leej peb sawv daws ib leeg
dhau ib leeg thiab ib tug dhau ib tug. Huab
Tais kev hlub neeg mas yeej hlub mus txog
txhiab niag tim puas xyoo. (HN13: 8)
Yus tej kev ntseeg txog Yes Xus thiaj yog yus
tej txuj ci uas tob tshaj plaws. Li ntawd, fab
hauv yus tus ntsuj plig, yus thiaj ua neeg
nplua nuj txawv luag tej.
Txhua txhia zaus peb nrog yus pawg ntseeg
sib sau los ua Thaj Txi Ntuj, mas phim yuav
thov Huab Tais Yes Xus tas zaj tas zog cuag
li tus neeg mob ruas. Peb yuav thov kom
Huab Tais muab nws txoj kev hlub uas muaj
zog tas nrho los yaug peb tej txhaum pov
tseg. Peb yuav hais tias “HUAB TAIS, YOG
KOJ XAV MAS KOJ UA KUV HUV TUAJ
YEEJ TAU!”
Txhua txhia zaus, peb thov Huab Tais Yes
Xus zoo li ntawd, mas yuav tsis hwm Huab
Tais saum di ncauj xwb, tsam peb lub siab
nyob deb Huab Tais. (MK7: 7) Tab sis yus
yuav ua ib siab kub lug cev yus tej lus ntawd,
yuav tsis xav txog lwm yam. Tsuas xav txog
yus zaj teev Ntuj ntawd xwb. Yuav tso siab
lug rau Huab Tais, Huab Tais yuav muab nws
txoj kev hlub muaj zog tas nrho los yaug tas
txhia yam tsis huv uas nyob hauv peb lub
siab.
++++++++++++++++++++++

20. LIAJ LUV TSEB NPLEJ (16.03.2021-15.04.2021) | 17
Lis Piam Ntshiab yog ib lub lis piam tseem
ceeb nyob hauv cov ntseeg Kav Tos Liv, yog
lub lis piam kawg hauv Caij Plaub Caug ua
ntej yuav txog Caij Hla.
Lub Lis Piam Ntshiab muaj 4 hnub tseem
ceeb yog li no: Hnub Chiv Nqaum Nplooj,
Hnub Tsib Ntshiab, Hnub Rau Ntshiab, thiab
Hmo Hla.
Hnub Chiv Nqaum Nplooj, yog hnub nco
txog Huab Tais Yes Xus caij tus luj tawm
hauv nroog Yes Lis Kos mus rau hauv Yes
Lus Xas Les xws li ib tug Pleev, cov neeg
muab nplooj ntoos los pua kev tos Huab
Tais Yes Xus. Tus yeeb yam no qhia tau tias
Huab Tais Yes Xus yog tus cawm seej (Mes
Xias), thiab Huab Tais Yes Xus yog tus Vaj
hauv kev thaj yeeb.
Hnub chiv nqaum nplooj yog lis piam 6 hauv
Caij Plaub Caug; yog thawj hnub hauv lub Lis
Piam Ntshiab. Hnub no yog hnub uas sawv
daws yuav muaj kev zoo siab hom khaj vim
Huab Tais Yes Xus los hauv Yes Lus Xas Les
xws li Leej Pleev raws li sau tseg hauv Mas
Tais Moo Zoo (MT21: 1-11), Mas Kos Ntawv
Moo Zoo (MK11: 1-11), Lus Kas Ntawv Moo
Zoo (LK19: 28) thiab Zam Ntawv Moo Zoo
(Z12: 12-19)
Qhov no qhia peb tias Huab Tais Yes Xus
yuav tuag saum Ntoo Cuam thiab yuav sawv
rov qab los, yog li lub Koom Txoos thiaj ua
kab ke hwm Yes Xus txoj kev txom nyem
nyob hauv hnub no.
Kab ke nqaum nplooj txhais tias peb txais
Yes Xus ua peb tus Huab Tais thiab peb
txaus siab koom nrog Huab Tais Yes Xus txi
Ntuj nyob saud tus Ntoo Cuam.
Cov nplooj ntoos ntsuab ntawd zoo xws li
yog cov CIm, tsis yog ib yam muaj hwj huam
dab tsi; tiam sis cov ntseeg khaws tseg cia
hauv tsev kom ua lub cim qhia tias lawv
ntseeg txog Huab Tais Yes Xus tus tau sawv
hauv kev tuag rov qab los.
Huab Tais Yes Xus yog tus vaj hauv txoj kev
thaj yeeb nyab xeeb, thiab tus Ntoo Cuam
yog Huab Tais Yes Xus lub theej kiab tswj
ntiaj teb. Vim li no, nyob hauv hnub no peb
thiaj nyeem cov zaj hais txog Yes Xus raug
kev txom nyem.
Thaum peb nyeem txog ntu Huab Tais Yes
Xus tuag, mas peb yuav kim caug, vim kev
kim caug yog tus yam ntxwv qhia tias peb
hwm Tswv Ntuj tas siab tas ntsws thiab yog
peb tu siab rau peb cov txhaum. Hais tau
tias peb kim caug hwm Huab Tais Yes Xus
tus tuag cawm peb thiab peb tu siab rau
peb cov txhaum, vim peb mas Huab Tais Yes
Xus thiaj tau tuag saum Ntoo Cuam.
Huab Tais Yes Xus txoj kev tuag no, tau
cawm peb dim hauv kev txhaum. Huab Tais
Yes Xus txoj kev sawv rov los, coj peb ua ib
tus neej ncaj. Yog li Huab Tais Yes Xus txoj
LIS PIAM NTSHIAB (HOLY WEEK)
Tus sau: Txawj Tsav Meej Mom Lauj

21. 18 | LIAJ LUV TSEB NPLEJ (16.03.2021-15.04.2021)
kev txom nyem hauv hnub no thiaj yog txoj
kev ciaj sia, yog txoj kev yeej kev tuag.
Nyob hauv cov kab ke Hnub Ob, Hnub Peb
thiab Hnub Plaub hauv Lis Piam Ntshiab no
thiaj yog yam qhia peb tias Huab Tais Yes
Xus mloog Leej Txiv lus, Huab Tais Yes Xus
zoo siab txaiskev txom nyem, zoo siab tuag
kom tau kev yeej txoj kev txhaum.
Hnub Tsib Ntshiab, yog hmo Huab Tais Yes
Xus noj pluas hmo kawg, yog nco txog Huab
Tais Yes Xus tsim lub Cim Yug. Nyob hauv
Mas Tais Ntawv Moo Zoo sau tseg
tias: Thaum lawv noj mov txog tog, Yes Xus
tuav lub ncuav mov, nws hais zaj foom
hmoov zoo, nws muab ntais, thiab nws cev
rau cov thwj tim, nws hais tias “Nej txais, nej
noj, qhov no yog kuv lub cev.”
Yes Xus kuj tuav ib lub ntim, nws ua ntuj
tsaug, nws cev rau lawv, nws hais tias “Nej
sawv daws haus, vim qhov no yog kuv cov
ntshav, yog cov ntshav cog lus, uas yuav ntws
los daws coob leej cov txhaum.” (MT26: 26-
28)
Tsis tas li xwb, hmo ntawd Huab Tais Yes Xus
tseem ntxuav cov thwj tim ko taw thiab.
Raws li Leej Ntshiab Zam sau nyob hauv nws
phau Ntawv Moo Zoo tias: Thaum yuav txog
lub Ntees Hla, Yes Xus paub tias txog nws lub
caij hla lub ntiaj teb no rov mus cuag Leej
Txiv. Nws nyiam nws cov thwj tim uas nyob
hauv lub qab ntuj no, mas nws nyiam lawv
mus txog thaum kawg.
Thaum lawv tab tom noj ib pluag hmo, ces
dab phem twb nkag mus tshoj Yus Das Kas
Lis Yaus, Xis Moos tus tub lub siab kom muab
Yes Xus muag. Yes Xus paub tias Leej Txiv tso
tas ib puas tsav yam rau hauv nws txhais tes,
nws paub tias nws tuaj ntawm Tswv Ntuj
tuaj, nws yuav rov mus cuag Tswv Ntuj.
Ces nws sawv ntawm lub rooj mov mus, nws
hle tsho, nws muab ib daig ntaub khi rau
ntawm nws duav. Nws hliv dej rau hauv ib
lub phiab, ces nws ntxuav cov thwj tim ko
taw. Nws muab daim ntaub khi ntawm duav
los so lawv ko taw. (Z13: 1-5)
Qhov kab ke no yog Huab Tais Yes Xus ua
rau lawv pom thiab qhia lawv kom ua li nws
tau ua tseg vim qhov no yog tus piv txwv
qhia txog txoj kev nyiam. Zam sau tias: Kuv
muab ib tug piv txwv rau nej kom nej ua raws
li kuv tau ua rau nej. (Z13: 15)
Hnub Tsib Ntshiab no, Tswv Qhia nrog nws
cov Leej Choj ua kab ke foom hmoov zoo
rau cov roj Ntshiab. Tab sis nyob hauv ntau
lub nroog uas muaj Tswv Qhia, mas yog
Hnub Plaub Ntshiab tus Tswv Qhia ua thaj
txi Ntuj foom hmoov zoo rau cov roj
Ntshiab. Vim cov Leej Choj nyob deb ntawm
lub nroog uas Tswv Qhia nyob txawm.
Tus Tswv Qhia ua thaj txi Ntuj xws li niaj
hnub cov Leej Choj ua kam. Thaum nws
nthuav Ntawv Ntshiab tas lawm, nws nrog
cov Leej Choj foom Hmoov zoo rau 3 hom
Roj Ntsiab.
Peb hom Roj Ntshiab yog cov no: Roj Nrauj
Dab, Roj Pleev cov neeg mob, thiab Roj Tsa
Leej Choj.
Ces cov Leej Choj nyob hauv lub Ceeb Koom
Txoos sawv daws tuaj nqa cov Roj Ntshiab
uas lawv yuav muab los siv tas ib xyoos nyob
hauv lawv cov zos.
Cov Xib Hwb uas muaj cai ua lub Cim
Ntxuav; lawv kuj niaj xyoo yuav nco ntsoov
thov cov Roj Nrauj Dab thiab cov Roj Tsa
Leej Choj. Thiab lawv yuav txuag cov Roj
Ntshiab ntawd nyob hauv ib qho chaw zoo

22. LIAJ LUV TSEB NPLEJ (16.03.2021-15.04.2021) | 19
nyob hauv lub tsev teev Ntuj hauv lawv lub
zos.
Thaum tsaus ntuj lawm, cov ntseeg nyob
txhua zej zog xyiv fab tuaj ua lub txoos cav
txog Yes Xus qhia ua thaj txi Ntuj, los yuav
hais tias lub Txoos Tsim lub Cim Yug.
Lub Txoos no yog ib lub txoos lom zem.
Yuav muab paj ntoos thiab tej yam zoo
nkauj los tu lub thaj txi Ntuj thiab tu lub tsev
teev Ntuj.
Yav sawv ntxov, yuav xub npaj xaiv 12 leeg
uas Leej Choj yuav ntxuav lawv taw. Xaiv 12
tug txiv neeg kuj tau. Yuav xaiv 6 tus txiv
neej thiab 6 tus poj niam kuj tau.
Thaum yus nthuav ob zag nyeem yus muab
siab rau hais ib co lus raug lub ntsiab zoo.
Yam li txhob hais tej lo lus ua kom tsoom
ntseeg xav tias Hnub Tsib Ntshiab yog hnub
ua lub Txoos ntxuav ko taw xwb. Vim tias
Hnub Tsib Ntshiab lub txoos cav txog Yes
Xus qhia ua Thaj Txi Ntuj.
Thiab yog lub Txoos uas Yes Xus tsa nws cov
thwj tim ua Leej Choj, vim Yes Xus hais rau
lawv tias “Nej yuav ua li ntawd kom tau nco
txog kuv.”
Zim txwv no, cov Leej Choj yog cov txiv neej
niaj hnub ua cov Thaj Txi Ntuj. Lawv hloov
Yes Xus cov thwj tim ua Thaj Txi Ntuj.
Hnub Rau Ntshhiab, yog hnub Huab Tais
Yes Xus raug kev txom nyem thiab taug
saum Ntoo Cuam. Qhov no qhia sawv daws
txog Huab Tais Tswv Ntuj txoj kev nyiam tib
neeg, nws thiaj tso Leej Tub los tuag daws
tib neeg cov txim.
Nyob hauv hnub no, muaj 4 tus neeg tau
hloov siab tshiab nrog Yes Xus kev tuag;
lawv ntseeg, lawv ua tim khawv thiab lawv
nqes tes ua.
Tus ib yog tus tub sab raug ntxia saum Ntoo
Cuam, nws thov Huab Tais Yes Xus kom nco
txog nws; nws hais tias "Yes Xus, thaum koj
mus txog hauv koj lub Ceeb Tsheej, thov koj
nco txog kuv." Ces Yes Xus hais rau nws tias
"Kuv hais tseeb rau koj: Hnub no, koj yuav
nrog kuv nyob hauv lub Nras Lom Zem."
(LK23: 42-43)
Tus ob yog Tus xab txheeb sawv ntsug
ntawm Yes Xus xub ntiag. Thaum nws pom
Yes Xus txoj sia tu li ntawd, nws hais tias "Tus
no yog Tswv Ntuj Leej Tub tiag!" (MK15: 39)
Tus peb thiab tus plaub yog Yos Xes As Lis
Mas Thias thiab tus Fas Lis Xais hu ua Nis
Kos Des Mos. Zam Ntawv Moo Zoo piav
tias: Thaum tej xwm ntawd tshwm tuaj tas,
Yos Xes nyob As Lis Mas Thias tuaj thov Pis
Las Tos kom kheev nws txo Yes Xus lub cev.
Pis Las Tos tso lus rau Yos Xes. Ces Yos Xes
mus txo Yes Xus lub cev. Yos Xes yog Yes Xus
ib tug thwj tim, tab sis nws tsis pub luag tej
paub vim nws ntshai cov Yus Das. Nis Kos
Des Mos kuj tuaj thiab. Nis Kos Des Mos yog
tus uas thaum chiv thawj, nws tuaj cuag Yes
Xus hmo ntuj. Nws nqa ib cov tshuaj qhwv
tuag tuaj: yog txab txiv yoov xyaw txab xyab
phij, kwv yees hnyav li ib puas choj. (Z19: 38-
39)
Hnub Xya Ntshiab los yog Hmo Hla, mas
yog hmo ua ntej Huab Tais Yes Xus yuav
sawv rov los. Hmo ntawd Huab Tais Yes Xus
raug zwm rau hauv qhov ntxa, yog Huab
Tais Yes Xus tau so. Yog hnub Yaj Ceeb thiab
Yeeb Ceeb raug nres cia, yog li cov ntseeg
thiaj yuav tsis ua hauj lwm dab tsi ib hnub
nkaus mus txog thaum hnub poob qhov,
mas cov ntseeg sawv daws thiaj mam zov

23. 20 | LIAJ LUV TSEB NPLEJ (16.03.2021-15.04.2021)
hmo tos txais Huab Tais Yes Xus sawv rov
los.
Nyob hauv Hmo Hla mas Lub Koom Txoos
Kav Tos Liv ua ib co kab ke cav txog Yes Xus
yog txoj kev pom kev. Hmo no cov neeg tuaj
ua lub txoos teev Ntuj rauv ib cub tawg rau
nraum lub tsev teev Ntuj sab nraud. Leej
Choj pov dej foom hmoov zoo rau lub cub
tawg, muab ib tug tswm ciaj loj loj, zes taws
hauv lub cub tawg kom cig. Tus tswm ciab
ntawd yog tus Tswm Ciab Hla.
Leej Choj tuav tus Tswm Ciab Hla nws tshaj
tias “Yes Xus Pleev yog peb txoj kev pom
kev.” Tsoom ntseeg teb tias “Peb ua Ntuj
tsaug.”
Tsoom ntseeg nyias muaj nyias tus tswm
ciab cig cig nyob hauv nyias txhais tes. Leej
Choj hu ib zag nkauj cav txog Huab Tais Yes
Xus yog txoj kev pom kev, mas sawv daws
cav lus zoo txog Huab Tais Yes Xus. Leej
Choj hais tias “Tas ib zeej tsoom neeg nyob
ntiaj teb, nej yuav zoo siab hu nkauj cav txog
peb tus Huab Tais sawv los kaj tas lub qab
ntuj neeg. Peb tus Huab Tais qhov pom kev
dawb vog ntsauv nej. Nej yuav zoo siab luag
nyav.” Ces sawv daws teb tias “Peb ua ntuj
tsaug.”
Tas nrho sawv daws tshaj Yes Xus txoj kev
sawv rov los zoo li no “As les lus yas, Yes Xus
sawv rov los. As les lus yas, nws yeej txoj kev
tuag. As les lus yas.”
Leej Choj hais tias “Huab Tais Leej Txiv, hmo
no peb nyob ze tus Tswm Ciab Hla uas yog
lub cim pab peb to taub txog Huab Tais Yes
Xus Pleev tej qav num. Huab Tais Yes Xus
yog lub hnub tsis txawj poob qho, nws kaj
tas txhia haiv neeg. Peb tuaj txais kev kaj
siab thiab kev thaj yeeb, nyab xeeb ntawm
nws los. Peb cav txog Leej Pleev uas yog tus
pub txoj siab nyob mus li ib txhiab ib txhis.”
Ces Leej Choj thiab sawv daws hu zaj nkauj
As les lus yas, Yes Xus sawv rov los.
Thaum peb tuav cov tswm ciag cig pom kev,
mas yog lub cim tias Yes Xus yog peb txoj
kev pom kev. Raws li lo lus uas Yes Xus hais
tias “Kuv yog qhov Pom Kev kaj lub qab ntuj
neeg. Leej twg lawv kuv qab nws yauv tsis
mus hauv qhov tsaus ntuj. Nws yuav tau
qhov pom kev uas coj mus rau txoj sia.”
Lo lus “As les lus yas” yog txhais tias “Nej
cav txog Yas Ves.” Muaj lub ntsiab tias “Nej
cav txog Tswv Ntuj.”
+++++++++++++++++++
Hmo tim 1 lub 4 hlis xyoo 2021 no yog Hmo
Ntsib Ntshiab, Txiv Plig Txawj Pov (Fr. Ongart
Kaser, Omi) ua kab ke ntxuav ko taw rau cov
laus hauv tsev teev Ntuj Leej Niam Cawm
Neeg Mus Ib Txhis, hauv zos Khej Me, xeev
Pheb Tshas Npoos, Cheeb Koom Txoos Nas
Qhoos Xas Vaav, Thaib teb.

24. LIAJ LUV TSEB NPLEJ (16.03.2021-15.04.2021) | 21
Lub Caij Hla yog lub caij cov His Xas Las nco
txog lawv tsoom poj yawm txwv koob His
Xas Lais khiav dim los ntawm Hais Nkws Tos
teb. Tiam sis nyob rau zim txwv no, cov
ntseeg Ntuj muab lub Caij Hla ua hmoov tsuj
xeeb nco txog Yes Xus txoj kev tuag thiab 3
hnub nws sawv rov qab los. Kev nco txog
Huab Tais Yes Xus txoj kev sawv rov los, yog
ib txoj kev ntxiv siav ntxiv zog rau peb txoj
kev cia siab tias peb yeej peb cov txhaum.
Raws li nyob hauv Ntawv Cog Lus Tshiab
mas lub Caij Hla yog 3 hnub tom qab Huab
Tais Yes Xus tuag nyob saum ntoo cuam.
Lub Caij Hla yog lub caij yoo, muaj ntau lub
tsev teev Ntuj teem lub caij rau cov neeg
ntseeg hloov siab thiab nco txog Huab Tais
Yes Xus txoj kev tuag thiab sawv rov los. Lub
caij yoo, mas yog nyob hauv lub Caij Plaub
Caug suav txij hnub plaub txais tshauv los
xaus rau hnub Huab Tais Yes Xus tuag nyob
saum Ntoo Cuam.
Vaj Qhia Nqes Nkos Lis tim 1 tau muab 40
hnub los nco txog 40 hnub ntawm cov His
Xas Lais, ntawm Mais Xes, ntawm tus Yaj
Saub Es Lis Xais thiab ntawm Huab Tais Yes
Xus raug dab phem ntxias. Lub lis piam
kawg ntawm tas 40 hnub ntawd, mas yog
lub lis piam Ntshiab. Hnub Tsib Ntshiab,
Huab Tais Yes Xus mus ua hmoov nyob hauv
lub nroog Yes Lus Xas Les, thiab noj pluas
hla nrog nws cov Thwj Tim. Hnub Rau
Ntshiab, yog hnub Huab Tais Yes Xus raug
ntsia saum ntoo cuam.
Hnub Chiv Hla thiaj yog ib hnub tseem ceeb
nyob hauv lub Koom Txoos thiab yog lub
hauv paus nyob hauv txoj kev ntseeg. Huab
Tias Yes Xus yog Tswv Ntuj Leej Tub, nws tau
ua raws Leej Txiv Lo Lus thiab nws zoo siab
tuag nyob saum Ntoo Cuam kom tau pub
txoj sia nyob mus li nyob saum ntuj rau cov
neeg ntseeg txog nws.
Thawj pab neeg ntseeg thaum ub ua hmoov
hla nyob hauv lub 3 hlis thiab lub 4 hlis, vim
yog cov His Xas Lais hnub noj pluas mov Hla
yav tsaus ntuj. Vim li ntawd, Huab Tais Yes
Xus thiaj nrog nws cov Thwj Tim noj pluas
hla yog hnub kawg thiab nws raug ntsia
saum Ntoo Cuam. Cov neeg ntseeg thaum
ub thiaj ua hmoov hla nco txog Huab Tais
Yes Xus zoo li tus yaj hla thiab yog tus cawm
seej.
Ua ntej thawj hnub Huab Tais Yes Xus yuav
raug ntsia saum Ntoo Cuam, mas Huab Tais
Yes Xus tau nrog nws cov thwj tim noj pluas
hla uas peb hu tias pluas mov kawg. Huab
Tais Yes Xus tau muab lub ncuav mov mog
los ua nws lub cev thiab muab cov kua txiv
cawv los ua nws cov ntshav uas yuav ntws
los daws neeg cov txhaum. (MT 26: 17 – 30)
Pluas mov kawg hnub no ua lub cim rau
tsoom neeg ntseeg txog lub Cim Yug, ces
nyob hauv lub thaj txi Ntuj thiaj faib lub Cim
Yug thiab haus kua txiv cawv ua kev nco
txog Huab Tais Yes Xus txoj kev tuag.
CAIJ HLA (PASSOVER)
Tus sau: Lis Maib

25. 22 | LIAJ LUV TSEB NPLEJ (16.03.2021-15.04.202121)
Kwv tij Hmoob sawv daws, daim ntawv xwm
kab yog muaj lub ntsiab zoo li cas? Puas yog
xav teev ces lam txiav ntawv dai rau ped cia
li teev xwb? Raws li tej laus piav mas tus
xwm kab uas Hmoob teev muaj ib lub hauv
paus ntev los lawm. Raws li zaj dab neeg
nram no tau piav tseg.
Thaub ub! Hmoob muaj ib tug huab tais hu
ua ‘Vaj Kav’ nyob rau Hmoob teb chaws uas
nyem no yog Suav teb. Tus vaj Hmoob
ntawd mas nws ua tau kawg, nws ntaus rog
mus txog qhov twg mas nws yeej txog qhov
ntawd. Nws ntaus haiv neeg twg mas haiv
neeg ntawd swb nws tas huv tib si. Ces Suav
thiaj cem nws tias “Ab! Nws niam ua txiv
tuam yej hwv oj!”
Txij ntawd los ces huab tais Vaj Kav cia li sIv
npe hu ua ‘Txiv Tuam Yej’ lawm. Hos lub
tseem npe Hmoob mas hu ua Vaj Kav no.
Ces Hmoob tus huab tais lub npe thiaj nrov
ncha mus puv ntiaj teb lauj! Leej twg hnov
los leej twg ntshai.
Lub zim txwv ntawd mas tib neeg tseem qus
qus kawg, tib neeg nyaum nyaum tas nrho.
Ces cov muaj zog muab cov mluag ntes coj
mus ua qhev, txeeb tej poj niam yuav, los
muab tua pov tseg, txeeb tej toob xib. Ces
sawv daws nyob tsis tau li lauj! Thiaj mus
cuag Vaj Kav, hais rau Vaj Kav tias “Aub! Tej
tib neeg phem phem li luag pheej muab peb
tua, lwg peb tej toob xib, txeeb poj niam tub
se. Yog tus twg, tsev twg hais tias yog koj
pej xeem thiab muaj koj tej twj khaws tseg
mas luag thiaj li ntshai. Koj yuav muab ib
yam dab tsi ntaus cim rau peb?”
Vaj Kav thiaj li hais tias “Tsis ntshai! Cia kuv
yees kuv ib co duab rau nej. Txhia lub tsev
twg mas ib xyoos kaum ob lub hlis, kuv tso
qas tshiab tuaj faib rau nej. Peb hnub mas
kuv thiaj yuav faib thoob cov duab rau cov
pej xeem nyob hauv kuv lub teb chaws no.
Ib xyoos kaum ob lub hlis twg, hmo peb
caug mas nej yuav tsum muab kuv daim qub
duab hlawv pov tseg kom tag.
Hnub xiab ib, xiab ob, xiab peb ces kuv tso
qas tshiab tuaj faib cov duab tshiab thoob
plaws rau nej. Mas nej qhov chaw dai tsis
txhob coj mus dai tom txaj, txhob dai rau
nram qhov rooj. Nej yuav dai ncaj ncaj rau
ntawm lub plawv hauv plag ov! Ua li ntawd
mas leej twg qhib plho qhov rooj, mas nws
pom dheev kuv tus duab uas kuv yees rau
nej. Luag pom ces luag yuav paub tias nej
yog kuv cov pej xeem ces luag thiaj tsis kov
nej! Nej thiaj tau zoo ua noj ua haus!”
Txhia xyoo txog lub kaum ob hlis ces Vaj Kav
yees duab muab rau qas tshiab coj tuaj faib
thoob plaws nws cov pej xeem. Vaj Kav
tseem hais tias “Txhia xyoo mas kuv faib cov
duab no rau nej mas kuv sau se. Kuv tsis
yuav dab tsi ntau, txhia txhia yim neeg kuv
tsuas yuav ib tug lau qaib cooj xwb! Nej
nkuaj qaib tus twg loj tshaj mas kuv yuav tus
ntawd!”
Ces txhia xyoo peb hnub tseem ceeb ntawd
sawv daws thiaj caiv zoo heev. Sawv daws
tsis rho nyiaj rho txiaj tawm. Qhov ntawd
yog tias Vaj Kav tsis tau faib duab tuaj, yog
rho nyiaj tawm ces Suav yuav tuaj txeeb, ces
sawv daws thiaj li caiv.
HMOOB TEEV XWM KAB
THAM TXOG
HMOOB

26. LIAJ LUV TSEB NPLEJ (16.03.2021-15.04.2021) | 23
Ntu neej uas Vaj Kav nyob thiab nws faib cov
duab no mas sawv daws tau zoo kev ua noj
ua haus, tau nyob kaj siab lug, lom zem
ntws. Tsis muaj haiv neeg twg, tus neeg twg
yuav tuaj ua phem rau lawv li.
Tom qab no lub teb chaws muaj tsov rog loj
kawg nkaus, ces Vaj Kav tau tas sim neej rau
ntsuj rog ntawd lawm lauj! Suav muab Vaj
Kav tua tau lawm. Zaum no ces yog leej twg
muaj vaj kav daim duab ces Suav thooj txhij
muab cov txiv neej tua huv tib si, muab cov
poj niam coj mus ua qhev, coj mus rau txim,
ntes cov me nyuam, cov ntxhais mus ua poj
niam coob coob kawg nkaus li lauj!
Sawv daws thiaj li ntshais heev, thiaj li muab
Vaj Kav cov duab hlawv pov tseg tas, ces
thiaj muab daim ntawv dawb los dai rau
xwb.
Thaum muab daim ntawv dawb dai rau tas
ces txhia xyoo lawv tua qaib txi rau. Tsis
muaj tus tuaj sau se lawm. Ua li no tas ces
sawv daws thiaj xav tswv yim tias “Aub! Yog
li no Suav pheej tuaj tua peb hwv ces cia peb
muab daim ntawv dawb lo rau es peb teev.
Peb hais tias Vaj Kav mus ua dab lawm ces
peb muab fi mus rau dab kom Vaj Kav rov
los pab peb.”
Thaum ub Vaj Kav yuav ib tug lau qaib cooj,
ces nyem no peb muab ib tug lau qaib cooj
los txi. 3 tsob plaub qaib uas lo rau ntawm
daim ntawv xwm kab thiaj muaj lub ntsiab
hais tias, lawv cim Vaj Kav lub qhov ncauj
thiab ob lub qhov muag.
Txij ntawd los Vaj Kav tsav neeg mas ib
xyoos txog lub 12 hlis, hnub peb caug lub
xiab ib rau xiab peb, ces lawv thiaj hloov
daim ntawv xwm kab. Lawv thiaj tua ib tug
qaib fi rau Vaj Kav, lawv muab tus qaib dai
rau ntawd 3 hnub, tsis pub cov qhua noj.
Lawv xav hu ua Txiv Tuam Yej los tsuas yog
lus Suav xwb, Hmoob lo poob lawm. Ces
lawv thiaj muab hu ua “Txiv Xwm Kab Los
Yej”.
Nyem no Hmoob txi xwm kab mas Hmoob
muab tus qaib fi rau dab thiab muab dai cia
peb hnub. Peb hnub ntawd mas caiv tsis rho
nyiaj txiag tawm. Qhov tseeb thaum ub mas
tsis yog dab, hos yog neej ua los mus. Daim
xwm kab thiaj yog daim duab cim tseg Vaj
Kav lub ntsej muag thiab teev Vaj Kav ntag.
++++++++++++++++++++
(Daim duab no thau hauv Youtube: Hmong Galeery)

27. 24 | LIAJ LUV TSEB NPLEJ (16.03.2021-15.04.2021)
Kwv tij Hmoob sawv daws, muaj nej ntau
leej yog cov ntseeg Ntuj, tab sis nej tsis paub
tias thaum peb yog ib tug neeg ntseeg lawm,
peb yuav ua peb Hmoob tej kab lis kev cai
puas tau?
Mas hnub no Zoo Tswv Zov Yaj thiaj yuav
muab lus teb rau nej tias nyob hauv Rooj
Ncauj Lus Vas Tis Kas Ob tau tso cai rau
txhua haiv neeg muab lawv tej kab lis kev
cai, txuj ci los cav txog Tswv Ntuj. Rooj
Ncauj Lus Vas Tis Kas Ob cov lus mas yog li
no: Huab Tais Yes Xus yog tus tsim
thiab pub lub Koom Txoos Kav Tos Liv
rau tas ntiaj teb neeg, ces lub Koom
Txoov Kav Tos Liv thiaj muaj qhov
xyiv fab txuag tas txhia haiv neeg cov
txuj uas zoo zoo tseg cia raws li Tswv
Ntuj lub siab xav.
Txiv Plig Txhiaj Foom tau hais tias “Yog vim
qhov no, ces nyob rau hauv peb haiv
Hmoob, thiaj muaj ib cov Txiv Plig pej kum
teb, uas lawv tuaj tshaj Ntuj Lus rau peb
haiv Hmoob, mas lawv thiaj siv peb cov lus
Hmoob los ua tej phau ntawv piav kev
ntseeg, kom peb to taub Tswv Ntuj zoo.
Nyob rau hauv lub txoos teev Ntuj uas yog
lus Hmoob, mas thiaj pom peb cov neeg
ntseeg Hmoob Kav Tos Liv txaum yim ib
yam li Hmoob tej kab lis kev cai.” (Vam
txog: cov lus hauv zaj tshaj xo hais txog ‘ROOJ
NCAUJ LUS VAS TIS KAS II)
Dhau ntawd, Vaj Qhia Zam Paj Lug Ob tau
piav tias: Txoj kev ntseeg yuav tsum nyob
kom ruaj nreb hauv nruab siab thiab saib
lwm haiv neeg nrog lawv tej txuj muaj nuj
nqis, thiab kho lawv tej txuj kom haum
Tswv Ntuj cov lus qhia.” Thiab Tswv Qhia
Lais Moos Npawj tau sau nws cov lus tso cai
rau Hmoob Kav Tos Liv siv Hmoob cov txuj
ci los ua ntees pam tuag tias ntiaj teb neeg
tej kab ke zoo no, nws puav leej yog Ntuj
tsim los. Thaum lub tsev teev Ntuj tos txais
txhua haiv neeg lawv tej txuj ci thiab kho
kom haum kev ntseeg, yog zoo li lub tsev
teev Ntuj rov ua kom Tswv Ntuj lub Moo
Zoo yug los tshiab nyob rau hauv txhua yam
txuj, thiab qhia txog lwm pab lwm pawg
neeg rau txhua tus paub…. Kev qhia txog kev
ntseeg rau ib cov neeg ntseeg tshiab, tsev
teev Ntuj yuav tsum tso cai rau lawv khaws
lawv tej puav pheej uas lawv ib txwm coj los,
thiab pub lawv siv los ua Ntuj tsaug, vim
Tswv Ntuj twb xub tau sau tej yam txuj zoo
KEV NTSEEG THIAB KAB LIS KEV CAI
Tus sau: Zoo Tswv Zov Yaj

28. LIAJ LUV TSEB NPLEJ (16.03.2021-15.04.2021) | 25
ntawd rau hauv lawv nruab siab lawm thiab
yuav rho tej yam tsis zoo uas muaj nyob
hauv lawv tej txuj uas yog yam ua rau dab
phem pov tseg. (Vam txog: Hmoob Kav Tos
Liv phau ntawv Txiv Xaiv Foom Kom)
Kwv tij, cov lus no yog txhais li cas? Yog
txhais tias lub Koom Txoos tso cai rau txhua
haiv neeg, tsis hais peb Hmoob xwb, kom
lawv siv lawv cov txuj lawv tej kab lis kev cai
zoo uas haum rau txoj ntseeg Ntuj los siv
nyob hauv txoj kev teev hawm Tswv Ntuj
tau, hos yam twg saib yog pheeb mus rau fab
teev dab ces thiaj tsum muab txiav pov tseg.
Li ntawd, thiaj muaj cov Xib Hwb Hmoob
ntau tus tau soj ntsuam txog peb Hmoob tej
kab lis kev cai thiab txuj ci, thiab lawv tau
muab hloov kom haum rau txoj kev ntseeg,
xws li: Kev hu nyab tshiab, khi tes foom
hmoov zoo, tis npe laus thiab lwm yam.
Txiv Plig Txhiaj Foom tau muab ib yam los
ua piv txwv, yog kev ‘PE’. Txiv Plig hais tias
“Hais txog kab tshoob kev kos thiab ntees
tuag, mas peb cov neeg ntseeg Hmoob Kav
Tos Liv kuj tseem siv qhov pe, rau qhov kev
pe mas yog haiv neeg Hmoob ib yam txuj
uas siv los ua tsaug thiab nco txiaj nco ntsig.
Tej kev cai li no, tsis yog ua rau dab, yog ua
tsaug rau tib neeg xwb ces tsis muaj qhov
txhaum. Li ntawd, cov neeg ntseeg Hmoob
Kav Tos Liv thiaj tseem siv los txog niaj
hnub no.” (Vam txog: cov lus hauv zaj tshaj xo
hais txog ‘ROOJ NCAUJ LUS VAS TIS KAS II)
Kwv tij Hmoob, peb Zoo Tswv Zov Yaj mam
coj peb Hmoob Kav Tos Liv cov txuj ci thiab
kab lis kev cai tuaj nthuav rau nej kawm
thiab paub nyob rau sij hawm tom ntej.
++++++++++++++++++++