LIAJ LUV TSEB NPLEJ (Jan-Feb 2021)

Tswv Qhia Yos Xes Phib Npus tus tswj Cheeb Koom Txoos Nas Qhoos Xas Vaas (Nakhonsawan Diocese)
tab tom ua kab ke pov txab txiv yoov rau tus mlom niam Mab Liab yees tawm nyob hauv lub zos Luj, hauv
hnub ua hmoov tsuj xeeb tsev teev Ntuj hwm niam Mab Liab yees tawm nyob hauv lub zos Luj, xeev Pheb
Tshas Npoos, Thaib teb.

PHIAJ NRHIAV ZAJ
COV ZAJ PHAB
Nthuav Zaj Nyeem Hnub Chiv
Zoo siab raws Yes Xus qab 1
Mloog Yes Xus lus 3
Huab Tais Yes Xus cov lus muaj peev xwm 5
Kev tsob hwb lwm tus, yog kev tshaj lub Moo Zoo 8
Vaj Qhia Lus Ntuas
Tswv Ntuj lub txiaj ntsim ua tau kom cov ntseeg koom ua ib tug 11
Kev teev Ntuj thiab thov Ntuj ua kom peb koom ua ib tug nyob hauv Leej Pleev 13
Xov Xwm
Thawj lub tsev teev Ntuj Hmoob nyob Los Tsuas 14
Lub lis piam thov Ntuj koom ua ib tug ntawm cov neeg ntseeg 15
Vaj Qhia cov lus hauv Hnub Tsim Kev Thaj Yeeb 17
Kev Ntseeg Kav Tos Liv
Ntseeg txog Huab Tais Yes Xus Pleev 19
Neb raws kuv mus 20
Ntxiv Txoj Kev Ntseeg
Niam Mab Lias yees tawm nyob lub zos Luj 22
Leej Ntshiab Paj Lug hloov siab tshiab 25
Tham Txog Hmoob
Hmoob kev xam xyoo 26
Hmoob kev cai dab qhuas 28

LIAJ LUV TSEB NPLEJ (16.01.2021-15.02.2021) 1
ZOO SIAB RAWS YES XUS QAB
Lis piam 2 Caij Nruab Xyoos B Tus sau: TP. Nyiaj Pov (1999)
Hnub tom qab, Zam nrog nws ob tug
thwj tim rov sawv ntsug nyob ntawd dua.
Nws ntsia Yes Xus hla tuaj mus, nws hais tias
"Neb ntsia ! Tswv Ntuj tus Yaj."
Ob tug thwj tim hnov Zam hais li ntawd,
nkawd raws Yes Xus qab mus. Yes Xus tig los,
nws pom nkawd raws nws, ces Yes Xus hais
rau nkawd tias "Neb nrhiav dab tsi?"
Nkawd hais rau Yes Xus tias "Las Npis,
koj tsev nyob qhov twg?"
Yes Xus hais rau nkawd tias "Neb tuaj,
neb yuav pom."
Ces nkawd mus, nkawd pom qhov chaw
Yes Xus nyob. Hnub ntawd, nkawd nrog Yes
Xus nyob. Thaum ntawd kwv yees plaub teev
hnub qaij.
Ob tug thwj tim uas hnov Zam hais li
ntawd thiab nkawd raws Yes Xus qab mus, ib
tug yog As Nres, Xis Moos Pob Zeb tus kwv.
As Nres xub ntsib nws tus tij laug Xis Moos,
nws hais rau Xis Moos tias "Wb ntsib tus Mes
Xias lawm.”
As Nres coj Xis Moos mus cuag Yes Xus.
Yes Xus ntsia Xis Moos, nws hais tias "Koj yog
Xis Moos, Zam tus tub, koj lub npe yuav hu ua
Kes Fas," -lo lus no txhais tias- Pob Zeb.
(Z1:35-42)
Hnub no, peb hnov cov lus hais txog
ob tug neeg raws Yes Xus qab mus, ib tug
yog Zam, ib tug yog As Nres. As Nres yog ib
tug neeg siab dav thiab nquag, As Nres yog
ib tug nyob hauv Yes Xus pab 12 leeg thwj
tim ua tim khawv txog Yes Xus lub Moo Zoo.
Nws raug lawv muab nws ntsia rau saum tus
ntoo cuam. As Nres txais kev tuag zoo li Yes
Xus.
Yes Xus tus thwj tim As Nres ua ib tug
qauv zoo rau peb tau kawm, thiab kom peb
ua raws li nws tau ua.
Kwv tij Hmoob, txij thaum As Nres ntsib
Yes Xus lawm mas nws zoo siab, nws saib
Yes Xus yog nws qhov chaws kaj, thiab saib
Yes Xus yog qhov chaw tso siab. Txij thaum
ntawd los As Nres ua Yes Xus ib tug thwj tim.
Yog peb xav paub Yes Xus mas peb
yuav tsum nrhiav Yes Xus zoo li ob tug thwj
tim uas nkawd nrhiav Yes Xus. Vim Yes Xus
twb hais tias “Tus thov yuav tau txais, tus
nrhiav nws yauv ntsib, tus khob qhov rooj
Ntuj yauv qhib rau nws.”
Cov His Xas Lais thiab Yes Xus cov thwj
tim niaj hnub tau ntsib Yes Xus, vim Yes Xus
yog ib tug tshaj Tswv Ntuj lo lus nws niaj
hnub qhuab qhiab tsoom pej xeem thiab
pab lawv. Yes Xus daws tsoom pej xeem txoj
kev txom nyem, nws tau kho cov neeg mob
nkeeg kom zoo hlo, kho cov neeg dig muag

kom pom kev tuaj, Yes Xus tsa tej tus neeg
tuag kom sawv rov los, Yes Xus rau siab tshaj
Tswv Ntuj lub Ceeb Tsheej thiab pab zeej
tsoom mus txog hnub nws tuag. Txij hnub
Yes Xus sawv rov los, Yes Xus tseem tawm
tuaj xyuas cov thwj tim ntau zaus ntxiv. Txog
thaum kawg, Yes Xus coj lawv mus saum ib
lub roob, nws hais lus rau cov Thwj Tim, nws
ceeb toom kom lawv mus tshaj Lub Moo
Zoo. Yes Xus ua li ntawd tas nws txav zuj zus
mus saum ntuj lawm. Txij hnub ntawd los
peb tsis muaj leej twg pom Yes Xus ntxiv.
Tiam sis Yes Xus kuj niaj hnub ua hwj huam
pab cov neeg vam txog Yes Xus thiab nrhiav
Yes Xus.
Nyem no peb tsis muaj peev xwm pom
Yes Xus tim ntsej tim muag, tiam sis muaj ib
hnub peb yuav pom Yes Xus tim ntsej tim
muag yog hnub peb hla lub sim ceeb no
mus lawm.
Kwv tij, peb niaj hnub yuav ntsib Yes
Xus nyob hauv txoj kev teev Ntuj, ces Yes
Xus yuav ua hwj huam pab peb, Yes Xus pab
cov neeg tso siab rau Yes Xus.
Peb tsoom kwv tij Hmoob uas nej twb
los txais kev ntseeg, mas Yes Xus hu sawv
daws kom ua nws ib tug tim khawv. Nyob
hauv peb lub zos peb ua neeg zoo, peb coj
nraim Yes Xus cov lus qhia, yus hwm Ntuj,
hwm niam hwm txiv thiab hlub tas nrho ib
tsoom neeg nyob ze yus. Peb ua li no vim
peb xav ua Yes Xus thwj tim. Peb xav ua zoo
li Yes Xus qhia kom peb ua. Yes Xus lub Moo
zoo lub ntsiab yog qhia kom peb hwm Ntuj
thiab sib nyiam sib hlub. Peb paub li no
lawm mas peb cia li ua raws.
Thaum ub Yes Xus hu cov thwj tim kom
lawv tshaj Lub Moo Zoo, nyem no Yes Xus
kuj hu kom peb tshaj Lub Moo Zoo rau ib
zeej tsoom neeg paub. Peb tsoom kwv tij
uas nej twb txais kev ntseeg los ntev xyoo
lawd, mas yus yuav mloog saib Yes Xus puas
hu yus los ua nws ib tug Tub Tshaj Ntuj lus.
Peb paub tias thaum Zam thiab As Nres
nkawd mus ntsib Yes Xus mas Yes Xus cov
lus cog ruaj rau hauv nkawd siab, ua rau
nkawd cia li nrog Yes Xus mus, nkawd ua Yes
Xus thwj tim.
Niaj hnub no Yes Xus cov lus kuj nrov
tuaj txog peb. Peb yuav xyuas saib Yes Xus
cov lus puas tawg paj txi txiv nyob hauv peb
lub neej mog!
+++++++++++++++++++++++++++++++

MLOOG YES XUS LUS
LIS PIAM 3 CAIJ NRUAB XYOOS Tus sau: XH. Yaj Nom Thoob
Thaum luag ntes Zam lawm, ces Yes Xus
mus Nkas Lis Lais teb. Nws tshaj lub Moo Zoo
qhia txog Tswv Ntuj, nws hais tias : “Txog lub
caij teem lawm, Tswv Ntuj lub Ceeb Tsheej los
txog ze lawm. Nej hloov siab, nej ntseeg txog
lub Moo Zoo mog.”
Yes Xus taug ntug hiav txwv Nkas Lis
Lais, nws pom Xis Moos, thiab Xis Moos tus
kwv As Nres. Nkawd tab tom pov vas rau
hauv dej ntuj, vim nkawd yog tub puav ntses.
Yes Xus hais rau nkawd tias : “Neb raws kuv
mus, kuv yuav muab neb hloov ua tub puav
neeg.” Nkawd tso plhuav cov vas puav ntses
tseg tam sim ntawd, nkawd raws Yes Xus
mus. Yes Xus mus ntxiv me ntsis tom ntej, nws
pom Yas Kos uas yog Ntxes Npe Dais tus tub,
thiab Yas Kos tus kwv Zam. Nkawd kuj nyob
hauv nkoj thiab, nkawd tseem tab tom ntxiv
cov vas puav ntses.Yes Xus hu nkawd, ces
nkawd tso plhuav nkawd txiv Ntxes Npes Dais
tam sim ntawd thiab cov tub zog rau hauv
nkoj, nkawd raws Yes Xus mus. (MK1:14-20)
Hnub no Yes Xus lub Moo Zoo hais tias
muaj ib hnub Yes Xus taug ntug hiav txwv
Nkas Lis Lais, nws pom Xis Mos thiab Xis
Moos tus kwv As Nres nkawd tab tom puav
ntses, Yes Xus hu nkawd tias neb raws kuv,
kuv yuav tsa neb ua tub puav neeg. Tam sim
ntawd nkawd tso plhuav nkawd cov vas puav
ntses tseg, nkawd raws Yes Xus qab mus.
Mus me ntsis ntxiv, Yes Xus pom Yas Kos
thiab Zam nkawd tab tom ntxiv cov vas puav
ntses nyob hauv lub nkoj. Nkawd txiv Ntxes
Npes Dais kuj nrog nkawd nyob ua ke hauv
lub nkoj. Yes Xus hu nkawd ces nkawd tso
nkawd txiv, thiab tso cov puav ntses tseg,
nkawd raws Yes Xus qab mus.
Yes Xus cov thwj tim tso siab rau Yes
Xus vim lawv paub tias Yes Xus yog tus tuaj
ntawm Tswv Ntuj xub ntiag tuaj.
Xis Moos Pob Zeb, As Nres, Yas Kos
thiab Zam lawv yog ib cov neeg muab siab
rau nyiam Tswv Ntuj, lawv tau kawm phau
ntawv Cog Lus Qub, lawv paub tias Tswv
Ntuj yuav xa nws Leej Tub tuaj. Lawv sawv

daws tos ntshis txog tus yuav tuaj cawm.
Hnub no lawv pom Yes Xus lawv zoo siab
raw Yes Xus mus.
Ua ntej no Zam, Pob Zeb, thiab As Nres
lawv twb xub tau ntsib Yes Xus ib zaug lawm.
Yog thaum lawv nrog Zam Ntxuav Plig nyob
ze ntawm tus dej Yos Las Das. Zam pom Yes
Xus hla ze thaj tsam ntawd. Zam qhia rau
lawv tias “Tus ntawd yog Tswv Ntuj tus Yaj.”
Cov thwj tim hnov Zam hais li ntawd,
lawv raws Yes Xus qab mus, lawv ntsib Yes
Xus lawv mem tau tias Yes Xus yog Tswv
Ntuj Leej Tub tiag, ces lawv qhuas kawg. Yes
Xus cov lus tseem niaj hnub nrov nyob hauv
lawv nruab siab. Hnub no Yes Xus rov hu
lawv dua, ces lawv zoo siab hlo nrog Yes Xus
mus, lawv tso tas nho txhia yam tseg.
Pob Zeb, As Nres, Yas Kos thiab Zam
lawv 4 leeg no puav leej yog tub puav ntses,
lawv ib txwm siv cov vas puav ntses loj los
puav ntses hauv lub hiav txwv Nkas Lis Lais.
Lawv ua li ntawd kom tau ntse coj los pauv
txiaj yug lawv lub neeg. Hnub no Yes Xus hu
lawv 4 leeg los ua nws cov thwj tim. Yes Xus
siv lawv mus tshaj Yes Xus lub Moo Zoo kom
tau coj sawv daws los nyob hauv Tswv Ntuj
lub Ceeb Tsheej. Txij no mus lawv zoo li ib co
tub puav neeg.
Kwv tij Hmoob, niaj hnub no Yes Xus
puas hu peb lawm? Yes Xus niaj hnub hu
peb, nws tos peb los ua nws cov thwj tim.
Thaum ub Yes Xus hu nws cov thwj tim zoo li
cas, mas nyem no Yes Xus tseem hu peb li
ntawd. Thaum ub Yes Xus qhia yam twg rau
nws cov thwj tim mas nyem no Yes Xus kuj
qhia peb tib yam nkaus. Ua li mas peb txhob
ua xyem xyav, vim niaj hnub Yes xus hu kom
peb los ua nws cov thwj tim. Yes Xus xav
kom peb ua neeg zoo, xav kom peb muaj ib
lub siab hlub neeg thiab nyiam Ntuj. Ces peb
thiaj yuav tau nrog Yes Xus nyob ua ke hauv
Tswv Ntuj lub Ceeb Tsheej.
Kwv tij sawv daws, peb niaj hnub yuav
npaj kom txhij tos Yes Xus, vim peb tsis paub
tias hnub twg Yes Xus rov tuaj xyuas peb.
Tus Hauv Paus Xa Lus Paj Lug hais tias “Lub
Caij kawg yuav tuaj zoo li ib tug tub sab tuaj
thaum ib tag hmo. Nws tuaj thaum yus tsis
nco ceev faj.”
Tus Hauv Paus Xas Lus kuj hais tias peb
tau nyob kaj lug, nyob nyab xeeb, mas ib sij
huam txoj kev ploj yuav ya ntxiag tuaj raug
peb. Vim li no mas peb thiaj yuav tsum ua
neeg xyuam xim thiab ceev faj tas mus li.
Peb mloog Yes Xus thiab raws Yes Xus qab
mus.
Kwv tij, peb txhob maub nyob hauv txoj
kev tsaus ntuj, txhob nyob hauv txoj kev ua
phem ua txhaum. Yog hnub twg peb txiav
siab los ua ib tug neeg ntseeg Yes Xus, peb
txiav siab los ua Yes Xus ib tug thwj tim mas
peb yuav tsum coj peb lub neej xws li Yes
Xus qhia. Peb nquag ua neeg zoo. Peb saib
txoj kev zoo yog lub zam uas peb yuav hnav.
Kev tsim txiaj thiab ua zoo, yog lub zam uas
cov neeg ntseeg yuav hnav mus cuag Tswv
Ntuj.
Yav thaum ub Yes Xus qhiav nws cov
thwj tim zoo li cas mas niaj hnub no Yes Xus
cov lus tseem nyob nraim li qub. Yav puag
thaum ub Yes Xus hu thiab txhib nws cov
thwj tim, mas niaj hnub nyem no Yes Xus kuj
hu thiab txhib peb sawv daws huv tib si.
Thov kom peb nyiam ua neeg zoo xws li Yes
Xus cov thwj tim, peb xub muab siab rau
nyiam Tswv Ntuj, peb tso peb lub qub neej
pov tseg, peb tig los raws Yes Xus, peb hu
tas nro ib tsoom neeg los nyob hauv Tswv
Ntuj lub Ceeb Tsheej.

HUAB TAIS YES XUS COV LUS MUAJ PEEV XWM
LIS PIAM 4 CAIJ NRUAB XYOOS Tus sau: XH. Yaj Nom Thoob
Yes Xus nrog cov thwj tim mus hauv Kas
Fas Naus. Txog hnub Xas Npas Tos, Yes Xus
mus hauv lub tsev Txoos, nws tsa ncauj qhia
sawv daws. Tsoom sid qhuas tas nrho txog
nws cov lus qhuab qhia. Vim nws qhia lawv li
tus neeg muaj hwj chim, nws tsis qhia xws li
cov Kws Ntawv Ntshiab.
Nyob hauv lub tsev Txoos ntawd, txawm
muaj ib tug neeg raug ib tug dab tsis huv
nthe nthe tias “Yes Xus Nas Xas Les, koj xav
ua dab tsi rau wb. Puas yog koj tuaj rhuav
wb? Kuv paub koj yog leej twg. Koj yog tus
Ntshiab tuaj ntawm Tswv Ntuj tuaj.”
Yes Xus cem nws kiag tias “Ua twj ywm!
Tawm ntawm tus neeg no mus!”
Ces tus dab tsis huv muab tus neeg
ntawd diaj heev heev, nws qw ib suab nrov
nrov, nws tawm mus. Tas tsoom sid ntshai.
Lawv sib nug zom zaws tias “Qhov ntawd yog
dab tsi? Tab yog cov dab tsis huv, nws qhia
lawv mas lawv mloog nws lus.”
Yes Xus lub moo ncha mus tas qhov
txhia chaw nyob Nkas Lis Lais teb tib si.
(MK1:21-28)
Hnub no peb hnov hais tias Yes Xus
mus hauv lub nroog Kas Fas Naus. Mus
ntawm lub zos Nas Xas Les mus rau Kas Fas
Naus yog ib tav su kev. Hnub Xas Npas Tos
Yes Xus mus hauv lub tsev Txoos kom tau
teev Ntuj. Nyob hauv lub tsev Txoos Yes Xus
tau nyeem Ntawv Ntshiab thiab qhuab qhia
tsoom sid, Yes Xus cov lus qhia yog ib co lus
muaj hwj chim.
Kwv tij, cov Kws Ntawv Ntshiab nyiam
muab cov neeg muaj suab npe loj lawv tej
lus los hais rau tsoom sid. Lawv xav tias qhov
ntawd yauv pab kom lawv tej lus muaj hwj
chim dua. Hos Yes Xus tsis ua li ntawd, nws
ncaj qha qhia rau tsoom sid vim nws yog
Tswv Ntuj. Yes Xus paub meej pem tias
Ntawv Ntshiab thiab cov Yaj Saub hais dab
tsi txog nws.
Cov xwm uas hnub no peb hnov mas
thiaj yog lub caij Yes Xus nyuam qhuav pib
tshaj nws lub Moo Zoo tau tsis ntev, ntshai
tsuas muaj li 2 lub hlis tej xwb, tab sis twb
muaj neeg tuaj deb li ob peb hnub ke tuaj
mloog Yes Xus. Mas Kos hais tias Yes Xus
cov lus qhuab qhia txawv cov Kws Ntawv tej
lus, vim Yes Xus cov lus muaj hwj chim dua.
Kwv tij, cov Kws Ntawv Ntshiab lawv
yog neeg zoo li cas? Cov Kws Ntawv Ntshiab,
mas lawv yog ib co neeg tau kawm phau
ntawv Cog Qub Lus, yog tej lus ua Tswv Ntuj
tau nrog His Xas Lais cov yawg koob sib cog
cia. Cov Kws Ntawv paub tej xwm nyob hauv
phau ntawv Cog Qub Lus Zoo. Lawv kuj yog
ib co neeg paub Mais Xes txoj cai zoo. Phau
Ntawv Cog Qub Lus twb yog ib phau ntawv

cim cov lus uas Tswv Ntuj tau hais rau cov
Yaj Saub, Tswv Ntuj hais tias nws yauv xa
nws Leej Tub tuaj cawm ntiaj teb neeg. Cov
Kws Ntawv Ntshiab tseem yog ib co xib hwb
uas qhia thiab ntuas tsoom sid kom txawj ua
zoo, txawj coj raws li Mais Xes txoj cai. Lawv
qhia raws li lawv tau kawm los thiab lawv
nthuav Mais Xes Txoj Cai. Muaj ntau zaus uas
cov kws Ntawv lawv zoo li ib co neeg lub
siab fos ntais lawv tsis paub Tswv Ntuj ntau.
Hos Huab Tais Yes Xus mas nws yog Tswv
Ntuj Leej Tub, nws tuaj ntawm Tswv Ntuj
tuaj, ces nws ncaj qha qhia tsoom sid, vim
nws paub Tswv Ntuj zoo. Yes Xus tsis tas
yauv muab leej twg txoj cai, los leej twg
phau ntawv coj los qhia rau tsoom sid ntxiv.
Yes Xus tuaj qhia txog txoj kev cawm neeg
uas Tswv Ntuj yeej ib txwm npaj kom tau
cawm ntiaj teb neeg raws li Leej Txiv Tswv
Ntuj tau cog lus tseg. Tas txhia yam uas cov
Yaj Saub tau hais tseg mas Yes Xus yog tus
paub zoo tshaj, yeej tsis muaj lwm tus paub
zoo cuag Yes Xus lawm, vim Yes Xus twb yog
Tswv Ntuj Leej Tub ntag. Yes Xus kuj yog
Tswv Ntuj thiab.
Yes Xus qhia tsoom sid meej kawg txog
Tswv Ntuj Leej Tub thiab nws tab meeg ua
ntau yam hwj huam kom tau zeem tseeb tias
nws tuaj ntawm Tswv Ntuj tuaj, nws muaj
hwj chim, nws yog Tswv Ntuj Leej Tub.
Yes Xus paub tias nws yauv los ua ib
txog hauj lwm loj kom tau cawm ntiaj teb
neeg. Nws txoj hauj lwm yog hauj lwm zoo,
nws qhia tsoom sid kom txawj sib hlub sib
zam, Yes Xus kho cov neeg mob nkeeg kom
zoo hlo, kho cov tuag ceg kom mus taus kev
thiab kho cov dig muag kom pom kev tuaj.
Yes Xus ntxiv txoj sia rau tej tus tuag kom
sawv rov los. Yes Xus tseem ntiab tus dab
phem uas pheej tuaj tshoj neeg lub siab, yog
li no mas thaum tus dab phem uas nyob
hauv tus neeg mob pom Yes Xus ces tus dab
thiaj nthe nthe tias “Yes Xus Nas Xas Les koj
puas yog tuaj rhuav wb?”
Yes Xus muaj hwj chim dua, vim nws
yog Tswv Ntuj Leej Tub, Yes Xus kuj yog
Tswv Ntuj thiab, Yes Xus thiaj hais rau tus
dab tias ua twj ywm! Tawm ntawm tus neeg
no mus! Tus dab muab tus neeg diaj heev
heev, nws qw ib suab nrov nrov, nws tawm
mus.
Vim li cas Yes Xus tsis xav kom tus dab
tshaj lus txog Yes Xus? Yes Xus txwv tsis pub
dab hais dab tsi txog Yes Xus kuj yog vim tej
yam no:
1 Yes Xus txwv tsis pub dab
phem hais ib lo lus ntxiv, yog ib yam qhia
rau peb tias Yes Xus muaj hwj chim loj
tiag, nws muaj hwj chim dua cov dab.
2 Yes Xus xav kom tsoom sid
paub tias Yes Xus yog Tswv Ntuj Leej
Tub, nws yog tus ‘Mes Xias’ tuaj cawm
ntiaj teb neeg.
Kwv tij, Huab Tais Yes Xus tuaj cawm
peb sawv daws kom txhob poob rau hauv
dab phem txoj kev ntxias. Yes Xus pab kom
peb dim ntawm txoj kev ua txhaum thiab Yes
Xus coj peb mus cuag Tswv Ntuj. Li ntawd
thiaj tsim nyog peb yuav mloog Yes Xus hu
peb, tsim nyog peb yuav ntseeg txog Yes
Xus, tsim nyog peb yuav sib nyiam sib hlub
mus li.
Kwv tij, thaum tsoom pej xeem pom
Yes Xus ntiab dab, thiab hnov Yes Xus cov

lus qhua qhia mas lawv ke zoo siab, ke
qhuas, ke poob siab, vim tej hwj huam Yes
Xus ua, yog tej hauj lwm uas ntiaj teb neeg
tsis muaj peev xwm yauv ua tau. Yes Xus tej
lus kuj yog lus thoob tsib thiab muaj hwj
chim. Yes Xus tej lus yog lus zoo. Yav dhau
los tsis muaj leej twg qhia rau lawv zoo cuag
li Yes Xus qhia. Ua li mas thaum lawv hnov
Yes Xus tej lus qhuab qhia thiab pom Yes
Xus cov hauj lwm mas lawv thiaj zoo siab
thiab lawv kuj poob siab txog Yes Xus lub
hwj chim thiab nws tej hwj huam.
Thaum Yes Xus qhia tsoom sid, Yes Xus
tsom hauv lawv nruab siab qhia. Yes Xus
qhuab qhia raug lawv lub siab thiab raug
lawv lub neej. Yes Xus kuj qhia kom lawv
paub tias Yes Xus yog Tswv Ntuj Leej Tub,
nws yog tus yuav coj kev cawm neeg, coj kev
thaj yeeb, thiab coj kev sib nyiam sib hlub
tuaj rau ntiaj teb neeg. Yes Xus yog tus tuaj
rhuav dab phem thiab rhuav dab phem txoj
kev phem pov tseg. Yes Xus tseem qhia kom
ntiaj teb neeg txawj ua zoo nws qhia kom
nyiam Ntuj thiab nyiam neeg.
Tas tsoom pej xeem uas pom Yes Xus
txwv dab phem tsis pub kom dab phem hais
lus, thiab Yes Xus ntiab dab phem tawm
ntawd tus neeg raug dab mus, mas tas nrho
sawv daws poob siab nthav, lawv sib nug
zom zaws tias tej yam lawv tau pom ntawd
yog dab tsi. Lawv pom tias Yes Xus cov lus
yog ib co lus qhia tshiab thiab muaj hwj
chim.
++++++++++++++++++

KEV TSOB HWB LWM TUS, YOG KEV TSHAJ LUB MOO ZOO
LIS PIAM 5 CAIJ NRUAB XYOOS Tus sau: XH. YAJ NOM THOOB (2006)
Tam sim ntawd, Yes Xus tawm
hauv tsev txoos, nws nrog Yas Kos
thiab Zam nkawd mus hauv Xis
Moos thiab As Nres nkawd tsev. Xis
Moos niam tais mob kub cev, nws
pw saum txaj. Tam sim ntawd, lawv
tham txog tus niam tais rau Yes Xus
paub, Yes Xus txav los tuav niam
tais txhais tees, tsa nws sawv. Tus
mob kub cev cia li thim hlo. Ces nws
tsob hwb lawv.
Yav tsaus ntuj, thaum lub hnub poob qho lawm, sawv daws coj tas nrho cov neeg mob
thiab cov raug dab huv si tuaj rau Yes Xus. Tas lub nroog sau nthwv tuaj nyob ua ke ntam nws
qhov rooj. Yes Xus kho neeg coob coob, yog cov uas nyias raug nyias hom mob. Thiab nws
tseem ntiab ntau tus dab tawm. Nws tsis pub dab hais lus li, vim cov dab paub nws.
Yav sawv ntxov, thaum tseem tsaus ntuj nti Yes Xus sawv, nws tawm mus rau ib qho chaw
tsis muaj neeg, ces nws teev Ntuj nyob ntawd. Xis Moos thiab nws cov npawg raws Yes Xus qab.
Thaum lawv nrhiav tau Yes Xus, lawv hais rau nws tias “Sawv daws nrhiav koj.”
Yes Xus hais rau lawv tias “Peb mus lwm qhov chaw, hauv cov zej zog nyob tsis deb
ntawm no, kom kuv tau kev tshaj lus nyob ntawd thiab. Yog vim li ntawd, kuv thiaj tawm tuaj.”
Ces Yes Xus mus thoob lub xeev Nkas Lis Lais, nws tshaj lus nyob hauv cov tsev txoos,
thiab nws ntiab dab phem. (MK1:29-39)
Hnub Xas Npas Tos yav sawv ntxov Yes
Xus mus teev Ntuj, nws qhuab qhia tsoom
sid, thiab ntiab dab rau ib tug neeg raug dab
hauv lub tsev Txoos. Yes Xus ua li ntawd tas,
nws mus so tom Pob Zeb tsev. Nyob hauv
Pob Zeb tsev Yes Xus kho Pob Zeb niam tais
kom zoo hlo, yav tsaus ntuj tsoom pej xeem
coj lawv cov neeg mob nkeeg tuaj rau Yes
Xus kho. Ces tib hnub ntawd xwb Yes Xus
kho coob leej kom zoo hlo.
Kwv tij, hnub Xas Npas Tos yog hnub
loj uas cov His Xas Lais caiv nruj. Hnub
ntawd lawv tsis ua hauj lwm hnyav. Yav sawv
ntxawv sawv daws mus teev Ntuj nyob hauv
lub tsev txoos. Ua li ntawd tas mas lawv
nyob twj ywm hauv tsev, lawv caiv tsis ua
hauj lwm hnyav, thiab caiv tsis mus kev deb.
Yog vim li ntawd thaum Yes Xus qhuab qhia
tsoom sid nyob hauv lub tsev Txoos tas mas
nws mus so tom Pob Zeb tsev.

liaj luv tseb nplej (16.01.2021-15.02.2021) 9
Nyob hauv Pob Zeb tsev muaj neeg
tham qhia Yes Xus tias Pob Zeb niam tais tab
tom mob, ces Yes Xus txav los tuav niam tais
txhais tees, tsa nws sawv, tus mob zoo hlo.
Kwv tij, tus Hauv Paus Xa Lus Mas Kos
piav luv luv, nws tis hais tias Pob Zeb niam
tais puas raug ib tug mob loj npaum li cas,
thiab mob tau ntev li cas los lawm? Tab sis
Mas Kos tsuas hais tias Yes Xus tuav Xis
Moos Pob Zeb niam tais tes thiab tsa nws
sawv. Tam sim ntawd tus mob cia li zoo hlo.
Pob Zeb niam tais sawv los tsob hwb sawv
daws, nws ua mov rau lawv noj.
Kwv tij Hmoob, peb niaj hnub yuav
thov Tswv Ntuj thiab thov Huab Tais Yes Xus
kom pub peb noj qab nyob zoo, kom ntiab
tus mob phem hauv peb lub cev, kom peb
muaj zog pab luag tej, xws li tus niam tais
uas nws tus mob zoo hlo ces nws tsob hwb
Yes Xus lawv. Thaum Tswv Ntuj pub txoj kev
noj qab nyob zoo rau peb, mas peb txhob
xav txog kev ua si. Tab sis peb xub xav txog
kev pab zeej tsoom. Peb ua cov hauj lwm
hlub neeg, zoo li Yes Xus tau ua nyob hauv
nws sim neej.
Hauv Paus Xa Lus Mas Kos piav meej
meej tias: tas ib hnub, txij thaum sawv ntxov
mus txog tsaus ntuj Yes Xus tau ua dab tsi.
Thiab tag kis sawv ntxov ntuj tsis tau kaj mas
Yes Xus mus teev Ntuj nyob ib qhov chaw
ntsiag to.
Mas Kos xaus nws cov lus tias tib hnub
Xas Npas Tos ntawd yav tsaus ntuj, thaum
lub hnub poob qho lawd, tsoom pej xeem
coj tas nrho lawv cov neeg mob nkeeg thiab
coj cov raug dab huv si tuaj rau Yes Xus kho.
Tas lub nroog sau nthwv tuaj nyob ua ke
ntawm Pob Zeb qhov rooj. Yes Xus kho neeg
coob coob, thiab Yes Xus tseem ntiab ntau
tus dab tawm. Yes Xus tsis pub dab hais lus
li, vim cov dab paub nws.
Yes Xus kho cov neeg mob li ntawd,
mas nws xav ua tej lub cim qhia tias Yes Xus
tuaj ntawm Tswv Ntuj tuaj, thiab Yes Xus xav
kom tsoom sid txais lub Moo Zoo uas nws
coj tuaj. Hos tsoom sid mas lawv pom tias
Yes Xus hlub cov neeg txom nyem.
Yes Xus qhuab qhia soom sid zoo tas
nrho, thiab Yes Xus pub nws lub hwj huam
los kho mob rau tsoom sid, mas Yes Xus nto
koob meej sai kawg. Tab sis Yes Xus paub
tias cov hlob nyob hauv lub teb chaws yuav
tsis nyiam Yes Xus, lawv yuav xav muab Yes
Xus tua pov tseg.
Hmo ntawd Yes Xus kho cov neeg mob
ntau leej, nws ntiab ntau tus dab phem, nws
kuj qhia kom tsoom sid tig los yuav lub siab
tshiab: nyiam Tswwv Ntuj thiab hlub neeg.
Hmo ntawd Yes Xus pw lig lig. Tag kis
ntuj tsis tau kaj, Yes Xus mus nyob ib qhov
chaw xu kev, nws teev Ntuj. Peb pom Yes
Xus nyiam teev Ntuj zoo li no, mas peb kuj
nquag teev Ntuj zoo li Yes Xus thiab. Peb
niaj zaug thaum yuav ua peb tej dej nug
tseem ceeb mas peb thov Tswv Ntuj pab
peb. Thiab thaum peb ua peb tej hauj lwm
tas, mas peb kuj ua Tswv Ntuj tsaug. Cov
neeg ntseeg niaj hnub niaj hmo yuav teev
Ntuj nyob hauv lawv tsev. Tsis tas li ntawd
xwb, peb tseem yuav siv tej lub caij nyob
ntsiag to kom tau teev Ntuj zoo li Yes Xus.
Yes Xus teev Ntuj ntev hauj sim, ces
thaum kaj ntug Yes Xus cov thwj tim nrhiav

tau Yes Xus nyob ntawm qhov chaw xu kev,
lawv hais rau Yes Xus tias “Sawv daws nrhiav
koj.”
Tab sis Yes Xus teb lawv tias “Peb mus
lwm qhov chaw hauv cov zej zog, ib ncig
ntawm peb no, kom kuv tau tshaj kuv lub
Moo Zoo rau lawv thiab. Yog vim qhov
ntawd kuv thiaj tawm tuaj.”
Yes Xus paub tias nws tsis tau kev ua
hauj lwm ntev nyob ntiaj teb no, vim cov
hlob hauv lub teb chaws xav muab nws tua,
li ntawd Yes Xus yuav tsis tau kev qhia zej
zog ntev xyoo. Yog vim lub caij maj caij
rawm, mas Yes Xus maj mus qhia nws lub
Moo Zoo rau ntau lub zos, Yes Xus yuav
tsum mus tas zog li ntawd 3 xyoos kom tau
tshaj lub Moo Zoo rau tsoom sid, thiab kom
tau pab tsoom sid daws lawv tej mob nkeeg.
Yes Xus txhib cov thwj tim nrog nws mus.
Kwv tij, Yes Xus hais tias “Peb mus lwm
qhov chaw hauv cov zej zog kom kuv tau
tshaj kuv lub moo Zoo rau lawv thiab. Vim
yog qhov ntawd kuv thiaj tawm tuaj.”
Yes Xus hais li ntawd, mas muaj ib lub
ntsiab tob zoo li no “Yog vim kuv yuav tshaj
lub Moo Zoo rau ntiaj teb neeg paub, ces
kuv thiaj tawm ntawm Leej Txiv Tswv Ntuj
tuaj.”
Kwv tij Hmoob, Huab Tais Yes Xus yog
Tswv Ntuj Leej Tub, nws xaiv txoj kev ua ib
tug tub txib los ua txoj hauj lwm tsob hwb
cov neeg raug mob, cov neeg raug dab
phem tsim txom, cov neeg txom nyem. Huab
Tais Yes Xus ua li no, kom lub Moo Zoo thiaj
ri mus sai.
Kwv tij, nyob hauv Paj Lug tsab ntawv
sau rau cov ntseeg hauv Kos Lis Nthos mas
Paj Lug yeej hais meej meej rau peb tias:
Tshaj lub Moo Zoo yog tes dej num kuv yuav
tsum ua. Yog kuv tsis tshaj lub Moo Zoo,
mas kuv txoj hmoov phem. Kuv cov koob
haum yog pub lub Moo Zoo dawb rau luag
txais. Kuv txhob txwm xaiv txoj kev ua sawv
daws qhev, vim kuv xav yaum neeg coob
coob. Kuv ua txhua yam rau lub Moo Zoo,
kom kuv tau txais ib feem nyob hauv lub
Moo Zoo cov txiaj ntsim.
Kwv tij, peb yog Huab Tais Yes Xus cov
thwj tim, yog Tswv Ntuj haiv neeg mas peb
tsum ua txoj hauj lwm tshaj lub Moo Zoo rau
lwm tus ib yam li peb tus Huab Tais Yes Xus
tau ua piv txwv rau peb, yog pab lwm tus,
tsob hwb lwm tus thiab pub kev nyiam kev
hlub rau lawv.
++++++++++++++++++++

TSWV NTUJ LUB TXIAJ NTSIM UA TAU KOM COV
NTSEEG KOOM UA IB TUG
Tus txhais: Txawj Tsav Meej Mom Lauj
Nyob hauv Lis Piam Thov Ntuj Koom
Ua Ib Tug Ntawm Cov Ntseeg (Week of
Prayer for Christian Unity) Vaj Qhia Fas
Ntshis Kus ntuas sawv daws txog Huab Tais
Yes Xus li lus caw peb sawv daws los tawm
tsam kev ua yeeb ncuab thiab kom peb tseb
kev haum xeeb.
Tim 20 lub 1 hlis xyoo 2021 no, Vaj
Qhia Fas Ntshis Kus ntuas sawv daws tias
Huab Tais Yes Xus tsis tau txib kom cov thwj
tim sib koom ua ib tug, tiam sis Huab Tais
Yes Xus thov Ntuj kom cov thwj tim koom ua
ib tug.
Vaj Qhia lo lus no txhais tias yog peb
siv peb lub zog xwb mas peb yuav mus cuag
kev koom ua ib tug tsis tau. Kev koom ua ib
tug nyob siab dua txhua yam paj tshab, kev
koom ua ib tug yog lub txiaj ntsim peb thov
tau nyob hauv kev thov Ntuj.
Tib yam li tus Hauv Paus Xa Lus Paj Lug
tau pom, peb sawv daws muaj kev sib cov
nyom nyob hauv peb, peb xav ua ib tug
neeg zoo tab sis peb rov pom tias peb nyiam
ua yam phem.
Peb kev sib cov nyom hauv peb tus
kheej no, Vaj Qhia hais, yog yam ua kom peb
ras tau tias txoj hau kev daws qhov cov
nyom no tau mas yog thov Tswv Ntuj pub
kev thaj yeeb, kev haum xeeb, thiab kev
koom siab ua ib tug.
Vaj Qhia hais tias Huab Tais Yes Xus
thov Ntuj tias ‘kom lawv sawv daws koom ua
ib leeg.’ (Z17:21) Li ntawd, peb kab ke thov
Ntuj koom ua ib tug no thiaj yog koom nrog
Huab Tais lo lus thov.
Vaj Qhia xav kom cov ntseeg sawv
daws coj mus xav saib sawv daws nquag
thov Ntuj kom cov ntseeg koom ua ub tug
npaum cas.
“Nyob hauv zim txwv kub ntxhov li no,
cov lus thov Ntuj li no muaj txiaj ntsim pab
kom kev koom ua ib tug yeej kev sib tawg.”
Cov ntseeg tsum taug txoj kev sib
koom ua ib tug uas lub qhov muag pom tau,
vim ntiaj teb yuav ntseeg Leej Pleev mas yog
thaum peb zeem tseeb tias kev nyiam kev
hlub sau peb los koom ua ib tug.
“Kev thov Ntuj yog kev ua kom rov lus
ua ib tug.” Vaj Qhia hais li ntawd. Lo lus no
txhais tias yog tawm tsam kev tsis sib haum

xeeb thiab kev tawg ua pab ua pawg uas
dab phem tuaj tseb rau hauv neeg.
Txawm neeg qhov muag pom lwm tus
kev txhaum kev ua tsis haum neeg lub siab
nyiam los, Tswv Ntuj pub lwm txoj kev rau
tib neeg taug.
“Tswv Ntuj coj peb mus cuag kev koom
ua ib tug, txawm tias peb sib txawv, peb lo
txhaum.”
Vim li no, Vaj Qhia Fas Ntshis Kus thiaj
caw sawv daws siv lub twj Tswv Ntuj pub los
tseb kev sib haum xeeb nyob hauv nyias vaj
nyias tsev thiab hauv chaw ua hauj lwm: lub
twj ntawd yog ‘Kev Thov Ntuj’ thiab ‘Kev
Sib Nyiam’.
Kawg no, Vaj Qhia Fas Ntshis Kus
nthuav txog lo lus hauv Lis Piam Thov Ntuj
Koom Ua Ib Tug Ntawm Cov Ntseeg hauv
xyoo no: “Tus twg nyob hauv kuv kev nyiam,
mas nws txi txiv ncw”.
“Leej Pleev yog lub hauv paus hauv kev
sib koom ua pab ua pawg thiab yog kev sib
nyiam sib hlub tus cag coj peb muaj yeej peb
kev xyeej kev ntxub lwm tus, ces peb yuav
saib lawv yog peb kwv tij nkauj muam.”
“Peb yuav pib thov Ntuj rau lawv, nrog
lawv thov ua ke.”
“Peb yuav xyaum nyiam lwm tus thiab
qhuas lwm tus mog!”
++++++++++++++++++++++++++

KEV TEEV NTUJ THIAB THOV NTUJ
UA KOM PEB KOOM UA IB TUG NYOB HAUV LEEJ PLEEV
Hnub Plaub hauv Lis Piam 4 Caij Nruab
Xyoos xyoo 2021, Vaj Qhia hais tias kev teev
Ntuj thiab thov Ntuj ua kom peb koom ua ib
tug nyob hauv Leej Pleev.
Hnub tim 3 lub 2 hlis xyoo 2021, Vaj
Qhia rov qab ntuas nyob hauv kab sab
online rau cov ntseeg thoob ntiaj teb tau
mloog ua ke. Vaj Qhia hais txog Koom Txoos
cov kab ke pab kom Leej Pleev nyob txawm
hauv peb txoj sia.
Vaj Qhia cuab cauj hais tias nyob hauv
cov ntseeg liv xwm mas lawv daws kho cov
kab ke teev Ntuj tas txwv. Ntau zaus kuj yog
ua kom Koom Txoos cov kab ke ntshiab huv
tuaj, kom txhob txuam rau lwm txoj kab ke
uas tsis muaj qab hau los yog tsim kev kub
ntxhov rau lub Koom Txoos.
Yuav pom tias cov ntseeg hauv lub zim
txwv no, lawv mus ua lub Txoos teev Ntuj
hauv Hnub Chiv thiab lawv ua cov hauj lwm
pab dawb los yug lawv tus ntsuj plig.
Vaj Qhia thiaj hais tias ob peb tiam
dhau los no, lub Koom Txoos rhais ruam mus
lawm deb, lub Koom Txoos tau txia ua lub
hauv paus teev Ntuj.
Cov ntseeg kev thov Ntuj, khaub zig
txog tus yam ntxwv qhia txog lawv txoj kev
ntseeg, piv txwv li Ntawv Ntshiab, cov Cim
Ntshiab, thiab cov kab ke teev Ntuj.
Vaj Qhia hais ntxiv tias kab ke teev Ntuj
loj dua kev thov Ntuj, vim kev teev Ntuj yog
tag nrho tsoom ntseeeg tuaj sib txoos thov
Ntuj ua ke, yog cov ntseeg tuaj tim ntsej tim
muag nrog Leej Pleev.
“Leej Pleev nqes los nyob hauv lub Cim
Ntshiab. Ces txoj kev ntseeg twg tsis muaj
kab ke teev Ntuj thiaj tsis yog txoj kev teev
hawm Tswv Ntuj. Yog li kev teev Ntuj thiaj
coj peb los koom txais Tswv Ntuj lub txiaj
ntsim.”
Thaj Txi Ntuj tsis yog kom peb nyob
mloog twj ywm xws li peb yog tus mus saib,
kev teev Ntuj yog kom sawv daws, tsis hais
tus Leej Choj los cov ntseeg, tau sib txoos
mus koom xws li yog ib lub ntees.
Vaj Qhia xaus cov lus tias Leej Pleev
yog lub hauv paus hauv kab ke teev Ntuj,
thiab Vaj Qhia thov caw cov ntseeg sawv
daws qhib siab lug mus koom lub Cim
Ntshiab no.
“Tswv Ntuj tsim tib neeg los hawm
Tswv Ntuj. Tab sis neeg yuav hawm Tswv
Ntuj tsis tau yog neeg tsis thov Ntuj thiab
teev Ntuj nyob hauv txoj kab ke.”
+++++++++++++++++++++++

XOV XWM THAWJ LUB TSEV TEEV NTUJ HMOOB
NYOB LOS TSUAS
Tus sau : Txhiaj Vwj Yaj
Nyob zoo kwv tij Hmoob sawv daws!
Ntawm no yog ib lub moo zoo uas xav tias
yog peb tau hnov lawm, peb yuav muaj kev
zoo siab heev. Tam sim no yog lub 1 hlis
xyoo 2021, nyob hauv lub zos Tiaj Ntxhw
Tuag (Zos Nam Yam), tab tom pib txhim tsa
ib lub tsev teev Ntuj Kav Tos Liv tshiab, thiab
yog thawj lub tsev teev Ntuj Kav Tos Liv
nyob hauv ib lub zos Hmoob.
Txij xyoo 1975 los txog zim txwv no, tsis
tau muaj dua ib lub tsev teev Ntuj Kav Tos
Liv nyob hauv ib lub zos Hmoob twg li. Hauv
lub zos Tiaj Ntxhw Tuag, yav tag los muaj
Xib Hwb Xaiv Kiam Vwj ua tus saib cov
neeg ntseeg uas yog lub Koom Txoos cov
yaj. Xib Hwb Xaiv Kiam tus npau suav los
yog txoj kev cia siab, mas yog xav pom ib
lub tsev teev Ntuj nyob hauv lawv lub zos.
Tab sis tsaib no, Xib Hwb Xaiv Kiam tau
ncaim lub ntiaj teb no mus nrog Tswv Ntuj
nyob lawm. Tam sim no tshuav Xib Hwb
Tswb Tsab, Xib Hwb Huas Tsab thiab ob
peb tug hluas ua cov coj cov neeg ntseeg
nyob hauv lub zos xwb. Cov neeg ntseeg Kav
Tos Liv nyob Tiaj Ntxhw Tuag muaj ze ntawm
40 tawm yim. Zos Tiaj Ntxhw Tuag yog zwm
rau lub Cheeb Koom Txoos Vees Cas
(Vientiane Diocese), nyob hauv lub nroog
Thub Lab Khoos, nyob tsis deb ntawm tuam
ceeb Vees Cas. Lub tsev Teev Ntuj no yuav
rau lub npe hu ua “Tsev teev Ntuj Tim
Khawv Paj Lug Thoj Xyooj”, vim lub tsev
teev Ntuj no yog thawj lub thiab Xib Hwb
Thoj Xyooj kuj yog thawj tug tub tshaj Ntuj
Lus Hmoob uas tau tuag ua Yes Xus tim
khawv.
Kev txhim tsa thawj lub tsev teev Ntuj
zaum no, yog tau kev txhawb nqa los ntawm
lub Cheeb Koom Txoos Vees Cas thiab cov
Hmoob ntseeg Kav Tos Liv nyob txawv teb
chaws, xws li As Mes Lis Kas teb, Kas Nas Das
teb thiab nyob Fab Kis teb.
Thov ua tsaug ntau ntau rau lub Cheeb
Koom Txoos nyob Vees Cas thiab cov neeg
ntseeg, cov tsev teev Ntuj nyob txawv teb
chaws uas nej tau sib pab txhawb nqa kom
muaj thawj lub tsev teev Ntuj rau peb cov
Hmoob nyob Los Tsuas teb.
Thov Tswv Ntuj foom koob hmoov pub
rau nej thiab lub Koom Txoos. Thov kom
sawv daws muaj kev sib fim thiab sib pab
txhawb nqa txoj kev tshaj Ntuj Lus ntxiv mus!
++++++++++++++++++++++

LUB LIS PIAM THOV NTUJ KOOM UA IB TUG NTAWM COV NEEG NTSEEG
Tus sau: Lis Maib
Kev sib tawg ntawm lub Koom Txoos
Kav Tos Liv yog tshwm sim nyob hauv tiam
16, uas yawg Lus Thes (Martin Luther) ua tus
tawm tsam. Lus Thes tsis kam lees txais Vaj
Qhia lub hwj chim uas yog lub ntsiab kev
ntseeg ntawm lub Koom Txoos, ces nws
ncaim mus tsim dua ib pab neeg ntseeg. Kev
sib tawg no tau ua kom cov neeg ntseeg sib
ntxub, thiab muaj kev tsis sib haum xeeb
ntawm kev ntseeg hu ua “Tsov rog ntawm
kev ntseeg Kav Tos Liv thiab Plos Tes Taas”.
Kev sib tawm tsam ntau xyoo, ua rau
muaj kev piam sij thiab ntsib kev txom nyem
ntau kawg. Cov teb chaws nyob xib fab thiaj
nkag siab tias qhov tseeb tiag kev teev
hawm yog txoj cai kav tus kheej xaiv thiab
tsis tsim nyog yuav quab yuam kom ntseeg
thiab tsis ntseeg. Dhau nov lawm, kev ntseeg
tseem muaj feem cuam txog kev tseev tsim
loj kawg, vim kev ntseeg yog lub neej txoj
sia. Kev ua hauj lwm nyob xyaw tej pab neeg
coob coob, cov neeg ntseeg yuav tsum nyob
ua ke thiab ua ib yam li cov zej zog txoj cai.
Txoj cai no cov neeg ntseeg lwm txoj kev
teev hawm tuaj yeem nyob ua ke sib xyaws
tau thiab tawm tswv yim li cas kuj tau, tsis
yog qhov chaw ntxub ntxaug ntawm leej
twg. Sawv daws yuav tsum sib nkag siab
thiab sib hwm.
Vim li ntawd nyob hauv txoj
kev thov Ntuj no, yog thov kom Tswv Ntuj
pub kev kaj nqes los rau saum cov neeg
ntseeg, kom cov neeg ntseeg nrhiav tau ib
lub tswv yim los txhawb nqa sawv daws
koom ua ib lub siab, kom kev chim siab kev
cib nyeej thiab kev nkag siab yuam kev maj
mam ploj mus. Qhov no yog lub ntsiab
ntawm kev sib koom thov Ntuj ua ke uas cov

neeg ntseeg cia siab. Kev thov Ntuj tau txais
kev koom tes los ntawm cov thawj coj Plos
Tes Taas thiab cov Txiv Plig. Kev thov Ntuj
tau pib sib koom nyob hauv Leej Ntshiab
Pob Zeb cov tsab ntawv tsaib ub los txog rau
hnub tsuj xeeb Leej Ntshiab Paj Lug tig los
yuav lub siab tshiab.
Xyoo no yuav tsuj xeeb nyob
hauv lub lis piam ntawm kev thov Ntuj sib
koom ua ib tug ntawm cov neeg ntseeg, txij
hnub tim 18 txog 25 lub 1 hlis 2021. Muaj
lub ntsiab lus hais tias: Tus twg nyob hauv
kuv thiab kuv nyob hauv nws, mas nws txi
txiv ncw. (Zam 15:5–9)
Kev yus ua lub neej nyob hauv Tswv
Ntuj, mas yog yus rov qab ua zoo rau yus lub
neej, lub siab thiab lub cev. Ntau zaus uas
peb tsis taug ncaj kev, peb sib tawg tsis sib
koom ua ib tug. Vim li ntawd, Tswv Ntuj cov
lus thiaj nqua hu kom peb tig los sib koom
ua ib tug nyob hauv Tswv Ntuj. Koom nrog
Tswv Ntuj taug ib txoj kev. Qhov peb yuav
koom nrog Tswv Ntuj ua ib tug tau, mas peb
yuav tsum xyaum nrog lwm tus koom ua ib
tug ua ntej tso. Nrog cov neeg txawv peb
thiab sib tawg nyob ua ke, los yog nrog cov
neeg nrug deb ntawm Tswv Ntuj nyob ua ke.
Kev thov Ntuj kom peb txawj sib koom ua ib
tug, thiaj yog qhov hu kom peb tig rov los
cuag Tswv Ntuj. Kwv tij phooj ywg peb yuav
tsum nkag mus ze lawv thiab nkag siab txog
lawv nyob hauv tej yam sib txawv, qhov
ntawd thiaj yog kev sib koom ua ib tug nyob
hauv ntau yam uas sib txawv.
+++++++++++++++++++++++

VAJ QHIA FAS NTSHIS KUS COV LUS HAUV HNUB TSIM KEV THAJ YEEB 2021
(Thau los ntawm: http://www.cmdiocese.org)
Hnub tim 1 lub 1 hlis yog ‘Hnub Tsim
Kev Thaj Yeeb Thoob Ntuj zaum 51’, Vaj
Qhia Fas Ntshis Kus thiaj muab lus li no:
1. Nyob hauv xyoo 2020, ntiaj teb
neeg ntsib xwv txheej los ntawm tus kab
mob COVID-19 ua rau muaj neeg raug kev
txom nyem thoob ntiaj teb, tab sis nyob
hauv kev txom nyem no, peb pom ib pab
neeg ua tim khawv txog kev nyiam hlub
tshua lwm tus. Txawm li ntawd los, tseem
muaj kev tu siab vim muaj ib cov neeg tsis
hwm lwm tus los ntawm cev nqaij sib txawv,
saib tsis taus lwm haiv neeg, tsim tsov rog,
thiab nyiam kev sib cov nyom. Cov xwm no
qhia kom peb pom txog kev nkag siab lwm
tus, thiab tu txhua yam Tswv Ntuj tsim los
raws li kev ua kwv ua tij.
2. Huab Tais Tswv Ntuj yog tus tsim
ntuj tsim teb, yog tus hu tib neeg los tu lub
sim ceeb, raws li muaj sau nyob hauv ntawv
Hauv Paus tias: HUAB TAIS Tswv Ntuj coj tus
txiv neej mus nyob hauv lub vaj Es Dees kom
nws cog lub vaj thiab saib lub vaj. (HP2:15)
3. Huab Tais Tswv Ntuj kub siab rau
As Das thiab Es Vas, thiab nkawd cov me
nyuam, vim tib neeg yog Tswv Ntuj tus duab.
Huab Tais Tswv Ntuj muab Hnub Xya ua
hnub ntshiab, rau sawv daws caiv, txhob ua
hauj lwm, yog hnub sawv daws yuav tau
hwm Tswv Ntuj, tau txhim kho lub sim ceeb
thiab kub siab saib xyuas cov neeg pluag
txom nyem, ces yuav tsis muaj cov neeg
pluag txom nyem nyob hauv nej. (TCO15:4)

4. Vim Tswv Ntuj nyiam lub qab ntuj
neeg npaum no, nws thiaj muab nws Leej Tub
twm zeej rau. (Z3:16) Huab Tais Yes Xus kho
cov neeg mob, zam txim rau cov neeg
txhaum, ua tus zoo tswv zov yaj, ua tus Xas
Mas Lias siab zoo, thiab cawm ntiaj teb neeg
hauv txoj kev tuag nyob saum tus Ntoo
Cuam. Li ntawd, tsum kub siab rau Huab Tais
Yes Xus txoj hauj lwm: tshaj lub Moo Zoo rau
cov pluag, rau cov nyob txim tias lawv yuav
dim, rau cov dig muag tias lawv yuav rov
pom kev, rau cov raug luag yuam tias lawv
yuav rov tau ua neeg twj lij. (LK4:18)
5. Kub siab ua cov hauj lwm zoo rau
sab ntsuj plig thiab cev nqaiij li cov thwj tim;
lub Koom Txoos tiam Ib, lawv faib yam lawv
muaj rau lwm tus ces lawv muaj txaus lawv
siv (HL4:34-35), hos lub Koom Txoos zim
txwv no, ua cov hauj lwm pab cov neeg
pluag nyob hauv cov tsev kho mob, tsev tu
me nyuam ntsuag, ua chaw so rau cov mus
kev deb.
6. Txhawb nqa kev sib hwm, kev thooj
siab koom ntsws ua ib tug, kev koom ua yam
zoo, kev tu thiab txuag yam Tswv Ntuj tsim.
7. Thov cov nom tswv coj noj coj ua
txo tej lag luam tsim cuab yeej tua rog kom
tsawg, tig los tsim kev thaj yeeb, thiab sib
pab txhim kho tib neeg mus rau qhov vam
meej.
8. Mloog, nrog lwm tus tham, thiab
nkag siab lawv. Tej no yog pib hauv lub cuab
lub yig, tej tsev kawm, ib ncig ntawm yus,
hauv pab pawg kev ntseeg, hauv cov koom
haum.
9. Ua txoj hauj lwm coj sawv daws rov los sib
haum xeeb, paub hwm lwm tus thiab yuav
raws li lawv hais.
++++++++++++++++

NTSEEG TXOG HUAB TAIS YES XUS PLEEV
Tus sau: XH. Tuam Lis
Nyob rau hauv lub keeb puam uas
muaj sau tseg rau hauv phau ntawv Cog Lus
Qub, peb yuav pom tias tom qab Tswv Ntuj
ntiab tib neeg tawm hauv nws lub vaj Es
Dees lawm, Tswv Ntuj tseem saib xyuas tib
neeg ntxiv los yam tsis tu ncua. Tswv Ntuj
tau pab nws haiv neeg thaum lawv raug
txom nyem thiab tig los nrhiav Tswv Ntuj.
Tswv Ntuj xa nws cov Yaj Saub tuaj nplij lawv
thiab txhib lawv siab los txog ntua rau thaum
Huab Tais Yes Xus yug los, uas yog ob txhiab
xyoo dhau los no. Tswv Ntuj tau ua raws li
nws lo lus cog tseg, nws xa nws Leej Tub
Twm Zeej nqes los ua neeg, los txais lub cev
nqaij ua neeg, kom tau coj neeg rov mus
cuag Tswv Ntuj.
Nyob rau nqe no, peb yuav pom tias
Tswv Ntuj hlub tib neeg kawg kiag, vim nws
yog tus Huab Tais Tswv Ntuj nyob siab dua
ntais, nws yuav txib tug twg tuaj tshaj lub
Moo Zoo kuj tau, tiam sis nyem no, nws tuaj
yeem nqes los ua neeg thiab xa lub Moo
Zoo tuaj qhia rau ntiaj teb neeg nyob rau
ntawm nws tus kheej kiag. Thiaj ua rau yuav
hais ua lwm yam tsis tau, yog tsis yog tias
Huab Tais Tswv Ntuj hlub neeg kawg kiag.
Tsis muaj lwm lo lus yuav los piav tau dua
ntawm nws txoj kev hlub lawm.
Nyob rau nqe lus no, thiaj ua rau peb
ntseeg tias Huab Tais Yes Xus yog tus tseem
Tswv Ntuj tiag thiab yog tus tseem tib neeg
tiag, uas nws yog Huab Tais Tswv Ntuj Leej
Tub Twm Zeej, yog tus Huab Tais nyob rau
hauv lawv Peb Leeg Huab Tais. Nws koom ua
ib tug Tswv Ntuj nrog rau Huab Tais Leej
Txiv thiab Huab Tais Leej Ntuj Plig. Thiab nws
tau nqes los yug ua neeg, txawj noj, txawj
haus, txawj mob, txawj quaj thiab txawj tuag
zoo ib yam li tib neeg. Tsuas muaj tib qho
txawv xwb, yog vim nws yog Tswv Ntuj mas
nws thiaj tau yug los yam ntshiab huv thiab
tsis lo neeg lub keeb txhaum.
++++++++++++++++++

NEB RAWS KUV MUS
Tus sau: TP. Txhiaj Foom OMI (22-1-2012)
Kwv tij, Huab Tais Yes Xus xub paub
tias lub caij uas nws sawv rov los thiab mus
lawm saum Ntuj, mas yog cov thwj tim yuav
siv tas lawv lub neej los pab nws tshaj lub
Moo Zoo txuas ntxiv.
Li ntawd, Ntawv Moo Zoo thiaj qhia
peb tias thaum Yes Xus taug ntug hiav txwv
Nkas Lis Lais, nws pom Xis Moos Pob Zeb
thiab Xis Moos tus kwv As Nres, nkawd yog
tub puav ntses, ces Yes Xus thiaj hais rau
nkawd tias “Neb raws kuv mus yuad! Kuv
yuav tsa neb ua tub puav neeg.” Ces nkawd
tso plhuav cov vas puav ntses tseg tam sis
ntawd thiab nkawd thiaj raws Yes Xus mus.
Tsis tas li ntawd, Yes Xus tseem hu Yas Kos,
Zam thiab 8 leej thwj tim ntxiv.
Kwv tij, yog vim 12 tug Hauv Paus Xa
Lus tej dej num ua tim khawv txog Tswv Ntuj
lub Moo Zoo, ces thiaj muaj neeg coob heev
nyob thoob ntiaj teb tig los ntseeg Tswv Ntuj
thiab lawv vam txog Huab Tais Yes Xus ua
lub teeb ci txhim kho lawv lub siab kom
txawj ua neeg zoo. Lawv thiaj tig los thov
txais lub Cim Ntxuav thiab los ua Tswv Ntuj
cov me tub me nyuam uas zoo nyiam.
Ua li mas lub zim txwv no, kom peb
nco ntsoov tias:
1. Huab Tais tseem hu peb tsoom
ntseeg kom los pab ua tim khawv txog Yes
Xus lub Moo Zoo, yam li yog ua lub neej
haum Tswv Ntuj siab.
2. Huab Tais Yes Xus kuj hu ib cov tub
hluas Hmoob los mus ua Leej Choj tshaj lub
nws Moo Zoo.
Kwv tij, peb tsoom ntseeg yuav ua
tim khawv zoo li cas? Peb yuav tsis txhob
tso lus hem luag tej tias ”Yog tias nej tsis tig
los ntseeg Ntuj xws li peb, mas lwm hnub nej
yuav raug txim mus tas ib txhiab ib txhis.”
Ua li mas peb yuav tsis hais tej lo lus
zoo li no rau luag tej ib zaug li. Peb kuj yuav
tsis muab nyiaj mus ntxias luag tej kom tig
los ntseeg Huab Tais Yes Xus.
Huab Tais Yes Xus xav kom peb ua li
cas, los ua tim khawv txog lub Moo Zoo?
Huab Tais Yes Xus tau hu peb los ua ntau
yam hauj lwm txog kev ua tim khawv txog
lub Moo Zoo, xws li no: Yuav tsob hwb Tswv
Ntuj tib leeg xwb thiab peb txhob ntshaw
nyiaj txiag heev dhau. Huab Tais Yes Xus hais
tias: Tsis muaj leej twg tsob hwb ob tug tswv
tau, nws yuav ntxub ib tug, hos nyiam lwm
tus. Nws yuav npuab ib tug, hos thuam lwm
tus. Yog txhais tias nej ib txhij tsob hwb Tswv
Ntuj thiab nyiaj txiag tsis tau. (MT6:24)
Nej tau cog lus tias nej yuav mloog
Tswv Ntuj Lo Lus qhia ib, yam li: Koj yuav
teev Huab Tais Tswv Ntuj ib tug xwb
thiab koj yuav nyiam Huab Tais Tswv
Ntuj tshaj tas puas tsav yam.
Li ntawd, cov neeg ntseeg yuav tsis
muaj ob lub siab, sawv daws yuav pheej xeeb
rau tej lus uas nej tau cog tseg rau Tswv
Ntuj, ces thiaj ua tau tim khawv txog Huab
Tais Yes Xus lub Moo Zoo.
Cov kwv tij Hmoob, yog nej ua tim
khawv txog lub Moo Zoo, mas nej yuav ua
neeg siab loj, siab ncaj, sib nyiam sib hlub

thiab nyiam Tswv Ntuj. Yog tias nej ua li no,
mas thiaj yuav muaj neeg pom tias nej yog
ib cov neeg ntseeg Ntuj tseem ceeb thiab
coj tau lub neej tshiab uas mloog Tswv Ntuj
Lus.
Yog li no, ces thiaj xav kom sawv daws
sib haum xeeb thiab sis nyiam sis hlub raws li
Tswv Ntuj siab xav.
Tus Hauv Paus Xa Lus Paj Lug tau txhib
peb tias: Nej tsis txhob ua txuj nyiam luag tej,
nej yuav tau sib hlub tiag tiag, vim nej yog ib
cov kwv tij xwb. Ua li mas nej txhob pauj qhov
phem uas luag tau ua rau nej, nej yuav tau
nrog sawv daws nyob yam sib haum xeeb.
(LM12:9,18)
Yog cov neeg ntseeg thiab nej tsoom
Hmoob ua li no, mas luag tej thiaj yuav los
nrog peb ntseeg Tswv Ntuj thiab sawv daws
yuav los cav txog Tswv Ntuj tej ntsha txiaj
ntsim. Txhais tias nej sawv daws thiaj yog
“tub puav neeg” ntag.
Kwv tij, lub zim txwv no Huab Tais Yes
Xus kuj hu ib cov tub hluas Hmoob los
mus ua Leej Choj. Yog vim qhov ntawd, ces
nej haiv Hmoob thiaj muaj 7 tus Txiv Plig
Hmoob lawm, yam li Tswv Qhia Thoj Txwj
Choo uas nyob Los Tsuas teb, Txiv Plig Thoj
Tshaj Xwm uas nyob Thaib teb, Txiv Plig Yaj
Cwj Vuam Chiv uas nyob Fab Kis teb, Txiv
Plig Thoj Zom, Txiv Plig Thoj Chij nrog rau 2
tug Txiv Plig Hmoob ntxiv uas lawv 4 leeg
nyob Suav teb.
Tsis tas li ntawd, twb muaj 13 tug tub
hluas Hmoob tab tom kawm txuj txheej siab
npaj los ua Leej Choj. Ua li mas kuv nrog nej
tsoom Hmoob zoo siab ua Tswv Ntuj tsaug
rau tej txiaj ntsim uas Tswv Ntuj pub rau nej
haiv Hmoob.
Li ntawd, thov kom nej cov ua niam ua
txiv nco ntsoov tias yog hnub twg nej ib tug
me nyuam thov mus kawm txuj ua Leej Choj,
nws hais rau nej tias ‘Niam thiab txiv, neb
puas kam tso lus rau kuv mus kawm ua
Txiv Plig?’ mas nej yuav zoo siab rau nws
mus kawm ua Leej Choj os mog!
Thaum nej tus tub txiav siab ua Leej Choj
lawm, mas nws coj ib lub neej qee rau Tswv
Ntuj raws li tus Hauv Paus Xa Lus Paj Lug
hais tias “Tus txiv neej, uas tsis muaj poj
niam, nws nyob tab seeb, mas nws yuav
muab siab rau leg Huab Tais cov hauj lwm.”
(1 KLN7:32)
“Nej tus tub yuav yog tus neeg uas
Tswv Ntuj xa mus ua Leej Pleev tus tiam lis.
Yog zoo li Tswv Ntuj siv nws lub ncauj los
mus tshaj lub Moo Zoo.” (2KLN5:20)
Nws yuav leg Huab Tais cov hauj lwm thiab
Tswv Ntuj yuav siv nws lub ncauj mus tshaj
lub Moo Zoo rau ib zeej tsoom. Nej tus tub
ntawd, yuav yog tus coj tau lub neej tseem
ceeb tshaj plaws thiab nws txoj hauj lwm kuj
tseem ceeb dua lwm txoj hauj lwm tas huv
tib si nyob thoob ntiaj teb.
Ua li mas thov kom nej cov ua niam
ua txiv, thov Ntuj tas zog, kom xwv Tswv
Ntuj hu tej tus tub hluas Hmoob los ua Huab
Tais Yes Xus cov hauj lwm thiab coj sawv
daws mus hauv Tswv Ntuj lub Ceeb Tsheej.
Cov tub hluas ntawd yuav yog “Tub puav
neeg“ raws li Huab Tais Yes Xus hais.
+++++++++++++++++

NIAM MAB LIAB YEES TAWM NYOB LUB ZOS LUJ
(OUR LADY OF LOURDES)
Nyob hauv xyoo 1858 muaj ib yam
xwm tshwm nyob hauv lus me nyuas zo Luj,
Fab Kis qab teb. Xyoo ntawd, niam Mab Liab
tau yees tawm rau ib tug me nyuam ntxhais
hu ua Npes Nas Des xeem Xus Npis Lus As
(Bernadette Soubirous) pom txog 18 zaus,
yog thaum tim 11 lub 2 hlis mus txog tim 16
lub 7 hli.
Niam Mab Liab yees tawm thawj zaug,
yog hnub tim 11 lub 2 hlis 1858. Lub caij
ntawd Npes Nas Des muaj 14 xyoos, vim kev
txom nyem tsis muaj tsev nyob, Npes Nas
Des niam thiab txiv coj lawv mus nyob hauv
ib lub qub tsev Loj Faj. Lub tsev Loj Faj no
khaub hlab thiab txias heev, tsis muaj taws
rauv ces Npes Nas Des thiaj nrog nws tus
niam hluas hu ua Tuas Nev (Toinette) thiab
ib tug phooj ywg hu ua Zam (Jeanne
Abadie) mus khaws taws ntawm taw
tsua. Thaum lawv tuaj txog ntawm lub pob
tsuas yuav tsum hla ib tus me nyuam dej
thiaj mus txog hauv qab tsuas uas muaj taws
qhuav ntau. Npes Nas Des tus niam hluas
thiab tus phooj ywg twb ua ntej hla dhau dej
sab tid lawm. Npes Nas Des lawv qab tuaj
txog, pom muaj kwj deg ces nws thiaj hle
khau thiab hle vuam txwv (Thom khwm).
Thaum Npes Nas Des tab tom hle
vuam txwv, nws thiaj pom niam Mab Liab,
nws tham tias: “Kuv hnov nrov ib teg ces kuv
ntsia mus nram plag hav, kuv tsis pom ib tug
ntoo co li. Ces kuv thiaj rov hle khau dua, kuv
rov hnov dua ib teg thiab kuv thiaj li ntsia
mus pem lub qhov tsua Mas Xas Npes Les
(Massabielle), ua ciav kuv pom ib tug poj
niam hnav dawb. Nws hnav ib daim tiab
dawb, sia ib txoj siv xiav, ntoo ib txoj phuam
dawb thiab muaj ob lub paj ntshua npaim
daj nyob ntawm nws ob txhais ko taw uas
yog tib tsos li ntawm nws txoj saw Mab Liab.
Ua rau kuv ceeb, kuv thiaj mos tsuag tsuag
qhov muag tag rov ntsia dua ua cas tseem
pom tus poj niam ntawd zoo li qhov qub
thiab. Thaum ntawd kuv thiaj cev tes muab
kuv txoj saw Mab Liab nyob hauv kuv hnab
tshos los hais thiab kuv xav ua Ntoo Cuam
Lub Cim. Tab sis kuv nqa tsis taus kuv txhais
tev los txog ntawm kuv lub hauv pliaj, nws
pheej poob tas zog rov qab xwb. Tus poj
niam ntawd thiaj muab txoj saw Mab Liab
uas nws tuav ntawm tes los ua Ntoo Cuam
Lub Cim. Thaum ntawd kuv rov ua Ntoo
Cuam Lub Cim zaum ob ces kuv thiaj li ua
tau lawm. Tom qab kuv ua Ntoo Cuam Lub
Cim tag, qhov kuv ceeb thiab ntshai cia li
ploj lawm. Kuv thiaj txhos caug thiab hais

saw Mab Liab ntawm tus poj niam zoo nkauj
ntawd xub ntiag. Kuv pom tus poj niam zoo
nkauj ntawd txhais tes mus dhau ib lub
hlaws zuj zus ntawm nws txoj saw Mab Liab;
tab sis kuv tsis pom nws de ncauj ua zog li.
Thaum kuv hais kuv txoj saw Mab Liab tas,
tus poj niam ntawd kom kuv txav mus ze
nws. Tab sis kuv tsis muaj peev xwm ua ib
yam dab tsi li, ces ib sij huam nws cia li ploj
ntais lawm.
Tag li ntawd kuv thiaj hle kuv nkawm
khau thiab hla dej mus tim ob lub qhov tsua
uas kuv tus niam hluas thiab tus phooj
ywg tab tom khaws taws. Thaum peb khaws
taws tag, peb yuav los tsev kuv thiaj nug
nkawd tias nkawd puas pom dab tsi. Nkawd
teb rau kuv tias: Wb tsis pom dab tsi mab.
Kuv thiaj rov nug nkawd dua, nkawd
kuj teb li qub. Nkawd thiaj tig rov los nug
kuv tias: Koj nev, koj pom dab tsi lod?
Kuv thiaj teb rau nkawd tias: Yog neb
tsis pom dab tsi, kuv kuj tsis pom dab tsi
thiab.”
Zaum ob, yog Hnub Chiv tim 14 lub 2
hlis xyoo 1858, Npes Nas Des hais tias “kuv
rov qab mus tim lub qhov tsua, vim nyob rau
hauv kuv nruab siab kuv hnov zoo li muaj ib
qho dab tsi rub kom kuv mus. Kuv niam txwv
tsis pub kuv mus; tab sis thaum peb mus
teev Ntuj tag los, ob tug me nyuam ntxhais
peb thiaj rov thov kuv niam dua. Kuv niam
tsis kam, nws ntshai tsam kuv mus kuv ho
lam ntog ntawm tus dej ces rov los tsis ncav
teev Ntuj thaum tsaus ntuj. Kuv thiaj cog lus
rau kuv niam tias kuv yuav rov los kom ncav
xwb ces kuv niam thiaj tso cai rau peb mus.
Kuv coj ob tug me nyuam ntxhais nrog kuv
mus, vim kuv xav paub seb puas yog kuv
raug zeeg muag xwb los yog tseeb tiag.
Npes Nas Des hais rau ob tug ntxhais
tias: Ua ntej peb yuav mus, kuv mus nqa ib
qho dej foom hmoov zoo hauv tsev teev
Ntuj tso. Kom tau cuam mus ywg tus poj
niam yog nws rov yees tawm tuaj.
Thaum peb mus txog tom lub qhov
tsua, peb txawm txhos caug thiab pib hais
txoj saw Mab Liab. Kuv nyuam qhuav hais
tag ib yag 10 zaj koj nyob zoo Mab Liab xwb,
kuv cia li rov pom tus poj niam qub. Kuv thiaj
muaj hwj dej foom hmoov zoo uas kuv nqa
tuaj cuam mus ywg nws thiab kuv hais rau
nws tias: Yog koj tuaj ntawm Huab Tais Ntuj
tuaj no koj nyob. Hos tsis yog no koj cia li
khiav mus.

Tab sis kuv yim cuam dej rau nws, nws
yim luag ntxhi rau kuv. Ces thaum kuv cuam
hwj dej tag tib si rau nws thiab kuv hais saw
Mab Liab tag, nws cia li yaj ntshis lawm.
Niam Mab Liab yees tawm rau Npes
Nas Des pom zaum peb, yog hnub tim 18
lub 2 hlis xyoo 1858, zaum no muaj ib tug
poj niam laus nrog Npes Nas Des mus tom
lub qhov tsua. Muaj ob tug poj niam tau hais
rau Npes Nas Des kom nws nqa ntawv thiab
cwj mem nrog nws mus. Thaum lawv mus
txog ntawm chaw, Npes Nas Des pib hais
saw Mab Liab, Npes Nas Des rov pom tus
poj niam qub. Npes Nas Des thiaj hais tias
yog nws muaj dab tsis hais rau Npes Nas
Des, mas Npes Nas Des yuav muab sau tseg
rau hauv ntawv. Niam Mab Liab thiaj li luag
ntxhi thiab hais rau Npes Nas Des tias: Cov
lus kuv yuav hais mas tsis tas yuav muab sau
rau hauv ntawv.
Niam Mab Liab txawm hais ntxiv tias:
Seb koj puas kam tuaj ntawm thaj chaw no
15 hnub sib law?
Npes Nas Des thiaj teb tias: Kuv kam
kawg.
Niam Mab Liab rov hais ntxiv tias: Kuv
tsis cog lus rau koj tias koj yuav tau zoo
nyob ntiaj teb no, tab sis koj yuav nyob xyiv
fab rau lub ntuj tom ntej.
Ces txij hnub ntawd mus, Npes Nas Des
niaj hnub tuaj nrog niam Mab Liab hais saw
Mab Liab ua ke. Niam Mab Liab hais kom
Npes Nas Des thov Ntuj rau cov neeg
txhaum thiab thov Ntuj rau lub ntiaj teb uas
tab tom ntxhov hnyo.
Txij hnub tim 24 lub 2 hlis mus txog tim
1 lub 3 hlis mas niam Mab Liab ua ntsej
muag mluas thiab pheej hais tias: Them txim,
them txim, them txim. Thov Ntuj rau cov
neeg tau ua txhaum. Koj puas kam pe hauv
av kom tau them txim rau rau cov neeg
txhaum? Koj puas kam noj nyom ntawm ko
them txim rau cov neeg txhaum?
Niam Mab Liab yees tawm tuaj zaum 9,
yog hnub tim 25 lub 2 hlis. Zaum no Niam
Mab Liab hais 3 zaug sib law rau Npes Nas
Des kom mus noj cov nroj uas nyob ze
ntawm qhov tsua thiab kom nws haus cov
dej hauv qhov dej thiab muab ntxuav nws.
Npes Nas Des piav tias: Tus poj niam
hais rau kuv tias, kom kuv mus haus dej tom
luv qhov dej. Kuv ntsia tsis pom qhov dej
nyob qhov twg, kuv thiaj mus nram tus me
nyuam dej. Tab sis, tus poj niam hais rau kuv
tias tsis yog qhov ntawd. Nws thiaj li taw tes
qhia lub qhov dej rau kuv. Kuv thiaj mus ze
ntawm qhov chaw tus poj niam qhia rau kuv.
Kuv mus txog tsis pom muaj dab tsi li, tsuas
pom muaj me ntsis dej kua av xwb. Kuv thiaj
cev tes mus yawm, tab sis yawm tsis tau. Kuv
thiaj xuas tes khawb, ces kuv thiaj yawm tau
dej. Kuv yawm 3 zaug mas tsis zoo haus li,
yog tib cov dej kua av thiab muaj txo heev.
Yawm zaum 4 mas cov dej thiaj mam zoo
haus.
Tsis tas li ntawd xwb, nws tseem hais
kom kuv mus noj ib qho nyom ntawm thaj
chaw uas kuv haus dej ntawd. Thaum hais li
ntawd ces tus poj niam cia li ploj lawm.
Hnub tim 2 lub 3 hlis, niam Mab Liab
yees tawm rau Npes Nas Des pom xyeem.
Niam Mab Liab tau txib Npes Nas Des ua ib
txoj hauj lwm. Yog kom Npes Nas Des mus
hais rau cov Leej Choj kom lawv txhim tsa ib
lub me nyuam tsev teev Ntuj rau ntawm lub
qhov tsua ntawd.
Npes Nas Des thiaj li mus cuag peb tus
Txiv Plig thiab hais rau lawv. Tus Txiv plig

ntsia Npes Nas Des ib me pliag ces txawm
nug tias: Tus poj niam ntawd yog leej twg?
Npes Nas Des teb tias: Kuv tsis paub.
Txiv Plig thiaj hais tias: Koj yuav tsum
nug kom tau tus poj niam ntawd lub npe.
Ces Tag kis tom qab Npes Nas Des thiaj nug
niam Mab Liab lub npe, tab sis niam Mab
Liab tsis qhia. Niam Mab Liab ua ntsej muag
luag ntxhi rau Npes Nas Des xwb. Npes Nas
Des rov los tsev, nws mus tom Txiv Plig, hais
rau tus Txiv Plig tias: kuv twb xa koj cov lus
rau tus poj niam lawm, tab sis tus poj niam
tsis teb dab tsi li.
Txiv Plig thiaj hais rau Npes Nas Des
tias: Tus poj niam ntawd saib tsis taus koj.
Kuv txwv tsis pub koj mus tom lub qhov tsua
ntawd ib zaug ntxiv lawm.
Tim 14 lub 3 hlis, neeg tuaj kav kiab kav
khw hauv lub zos Luj coob coob, ces thiaj
muaj neeg tuaj saib lub qhov tsua txog li
7,000 leej.
Tim 25 lub 3 hlis, Npes Nas Des rov
nug niam Mab Liab 3 zaug sib law, los niam
Mab Liab tsis qhia. Npes Nas Des thiaj lam
nug ib zaug ntxiv ua zaum 4. Tus poj niam
thiaj li muab nws ob txhais tes los ua ntaj teg
zem zuag rau ntawm nws hauv siab thiab
hais tias: Kuv yog tus xeeb los ntshiab huv.
Niam Mab Liab yees tawm zaum 17 rau
Npes Nas Des pom xyeem yog hnub tim 7
lub 4 hlis. Hnub no Niam Mab Liab yees tuaj
rau Npes Nas Des pom yuav luag 1 teev
nrog rau ib pab neeg coob txog 200-300
leej. Thaum ntawd Npes Nas Des tau muab
txhais tes los thaiv tus cwm ciab nws tuav
kom cua txhob tshuab, tus cwm ciab tau kub
nws txhais tes ntev li ob peb fiab tab sis tsis
pom kub nyhiab qhov twg li.
Niam Mab Liab yees tawm zaum kawg
rau Npes Nas Des pom yog hnub tim 16 lub
7 hli, thaum no muaj neeg tuaj xyuas coob
lawm ces cov nom tswv tsis xav kom neeg
mus saib thiab ntseeg Npes Nas Des, lawv
txib peeb zeej mus zov lub qab tsuas uas
Npes Nas Des pom niam Mab Liab.
Zaum kawg no niam Mab Liab ci ntsa
iab tsis zoo li txhua zaus. Npes Nas Des hais
li no: Nws tawm tuaj nyob qhov chaw qub
uas nws niaj zaus tshwm. Thiab zaum no nws
tsis hais dab tsi rau kuv li. Kuv tsis tau pom
dua nws zoo nkauj npaum li no li.
Ces txij ntawd los, niam Mab Liab tsis
yees tawm rau Npes Nas Des pom li lawm.
Koom Txoos Kav Tos Liv thiaj soj ntsuam
txog qhov tseeb los txog xyoo 1862, Tswv
Qhia hauv Luj thiaj muab lus ua pov thawj
tias tus poj niam yees tawm rau Npes Nas
Des pom xyeem ntawm lub qhov tsua Mas
Xas Npes Les yog niam Mab Liab, thiab txhib
kom cov ntseeg txhim tsa ib lub tsev teev
Ntuj nyob ntawd, yog hnub tim 18 lub 1 hlis
xyoo 1862
++++++++++++++++

LEEJ NTSHIAB PAJ LUG HLOOV SIAB TSHIAB
(Conversion of St. Paul)
Paj Lug yug los ze ntawm xyoo tim 10,
lawv Yes Xus qab nyob Tas Xis. Tas Xis yog ib
lub nroog loj nyob Tws Kis qab teb.
Thaum Paj Lug yav hluas nws hu ua
Xauv. Nws niam thiab txiv kub siab coj Mais
Xes Txoj Cai. Xauv tsev neeg nplua nuj hauj
sim. Lawv xa tub Xauv mus kawm txuj nyob
hauv cov tsev qhia cov txuj txheej siab nyob
Tas Xis. Xauv thiaj paub lus Hes Las zoo,
thiab paub cov txuj Hes Las zoo.
Thaum Xauv tseem hluas, nws txiv xa
nws mus kawm Mais Xes Txoj Cai nyob Yes
Lus Xas Les. Xauv thawj tug Xib Hwb yog
Nkas Mas Lias.
Yog xyoo 30, ces Xauv tuaj kawm nyob
Yes Lus Xas Les. Lub caij uas Yes Xus tshaj
nws lub Moo Zoo yog xyoo 28, 29 thiab 30.
Yog thaum Yes Xus nyuam qhuav tuag
tas, ces Xauv tuaj txog Yes Lus Xas Les. Xauv
tsis tau pom Yes Xus.
Xauv ntseeg Mais Xes Txoj Cai ti txha.
Thaum Xauv hnov hais tias ib cov neeg nyob
Yes Lus Xas Les pib teev Yes Xus thiab saib
Yes Xus yog Tswv Ntuj Leej Tub, mas Xauv
xav tias cov neeg teev Yes Xus ua txhaum
thuam Mais Xes txoj cai. Lawv thuam haiv
His Xas Lais txoj kev ntseeg.
Xauv pab cov nom Yus Das uas lawv
muab cov neeg teev Yes Xus tua.Hnub uas
cov nom Yus Das muab Tes Fas Nos tua,
Xauv nrog lawv nyob ntawd.
Xauv hnov hais tias muaj ib co neeg
teev Yes Xus tsiv mus nyob hauv lub nroog
Das Mas, nyob Xis Lias teb, mas Xauv thov
kom cov nom Yus Das xa nws mus ntes cov
neeg teev Yes Xus nyob Das Mas.
Thaum Xauv caij nees yuav luag txog
Das Mas, ces ib sij huam, muaj ib qho pom
kev ci dawb vog tuaj saum nntuj tuaj ncig
nws.
Xauv ntog rau pem teb. Xauv hnov ib
lub suab hais rau nws tias “Xauv! Xauv! Vim li
cas koj hiam kuv?”
Xauv teb tias “Huab Tais, koj yog leej
twg?”
Lub suab ntawd hais tias “Kuv yog Yes
Xus, tus uas koj hiam. Koj sawv, koj mus
hauv lub nroog. Yuav muaj neeg qhia koj tias
koj yuav ua dab tsi.”
Ces Xauv mus hauv lub nroog. Nws
txais lub Cim Ntxuav ntawm As Nas Nias.
Txij thaum ntawd los Xauv thiaj hloov npe
tshia hu tias Paj Lug. Xauv pib tshaj tias Yes
Xus yog tus Huab Tais cawm ntiaj teb neeg.
+++++++++++++++++++++++

THAM TXOG HMOOB
HMOOB KEV XAM XYOO
Raws li tej laus tau muab 12 tus tsiaj los
kav lub niaj lub xyoo, kav hli, kav hnub, kav
niaj teev. Kev yuav tawm rooj mus ua noj ua
haus, ua lag ua luam yuav tau saib hnub xam
nyoog. Yuav ua qoob ua loo yuav tau saib
lub niaj lub xyoo thiaj yuav ua tau noj tau
haus.
Niaj xyoo Hmoob hais tias muaj ib tug
tsiaj los kav lub xyoo ntawd. Li ntawd,
Hmoob tau muab 12 tug tsiaj los kav lub niaj
lub xyoo. Nyob rau hauv ib xyoos twg mas
yuav muaj ib tug tsiaj los kav lub xyoo
ntawd. 12 tug tsiaj ntawd yuav sib faib ncig
kav cov xyoo. Txhia xyoo thaum lub 12 hlis
tim 30, thaum 24 teev 30 ces tus qub tsiaj
yuav tag lub zim txwv kav, yuav hloov rau
lwm tus tsiaj los kav ntxiv mus. Piv txwv li
xyoo 2021 no yog nas kav xyoo, ces xyoo
tom ntej yog nyuj kav xyoo, tsov, luav, yaj,
nab, nees, yaj, liab, qaib, dev, npua. Npua tag
mam rov qab tig los txog nas kav xyoo dua.
1. Saib Tsiaj Kav Xyoo Ua Noj Ua
Haus.
Tej laus Hmoob hais kam tias nyob qab
ntuj khwb no ib xyoo twg twb yuav muaj 3
tshav, 3 nag. Tiam sis yog tias xyoo ncaj rau
tus tsiaj uas nyiam dej ces nws yuav muab
qee, xyoo ntawd dej nag yuav hnyav, tshav
yuav tsawg. Yog tias xyoo uas ncaj rau tus
tsiaj nyiam tshav kav ces nws kuj yuav muab
qee, xyoo ntawd tshav ntau hos dej nag
tsawg. Muab piav ib xyoos zuj zus mus ces
zoo li no.
Nas xyoo: dej nag ntau, tshav tsawg.
Kev nrhiav noj nrhiav haus nyuaj nkawg
nkaus. Kab mob kev nkees los hnyav kawg.
Nyuj xyoo: tshav thiab nag sib npaug.
Kab mob kev nkees sib. Kev nrhiav noj nrhiav
haus yooj yim.
Tsov xyoo: tshav ntau nag tsawg. Kab
mob kev nkeeg tsawg, tsis muaj mob muaj
nkees. Kev nrhiav noj nrhiav haus nyuaj.
Luav xyoo: tshav ntau, dej nag tsawg.
Kab mob kev nkees sib, tsis muaj mob muaj
nkees. Kev nrhiav noj nrhiav haus nyuaj.
Zaj xyoo: dej nag yuav hlob, hos tshav
yuav tsawg. Xyoo no qoob loo zoo, tawm
rooj mas zoo. Yus txog qhov twg los yus
yuav muaj hwj chim, tab sis kev lag luam
tsawg zog. Xyoo no kab mob kev nkees sib.
Nab xyoo: tshav thiab nag sib npaug.
Kev nrhiav noj nrhiav haus nyuaj kawg kiag,
ceeb laj nrhiav zog. Xyoo no kab mob kev
nkees sib.
Nees xyoo: dej nag tsawg, tshav ntau
zog. Kev lag luam zoo. Tab sis kab mob kev
nkees hlob. Kev nrhiav noj nrhiav haus zoo.
Yaj xyoo : dej nag sib, Kab mob kev
nkees sib. Kev nrhiav noj nrhiav haus nyuaj.
Liab xyoo: dej nag sib. Kab mob kev
nkees tsis muaj. Kev nrhiav noj nrhiav haus
nyuaj heev.
Qaib xyoo: dej nag sib, tshav ntau. Kab
mob kev nkees hnyav. Kev nrhiav noj nrhiav
haus zoo ib nrab.
Dev xyoo: tshav thiab nag sib npaug.
Kab mob kev nkees sib. Kev nrhiav noj nrhiav
haus nyuaj.

Npua xyoo: tshav thiab nag sib npaug.
Kev nrhiav noj nrhiav haus zoo. Tab sis kab
mob kev nkees ntau.
Kaum ob tug tsiaj kav xyoo tau muab
txhais thiab piav qhia los raws li saum toj no,
ces niaj xyoo rov txog tus tsiaj twg kav, peb
tsoom laus Hmoob thiaj saib lub niaj lub
xyoo ua noj ua haus, ua lag ua luam.
2. Cov Tsiaj Kav Hli.
Nyob hauv 1 hlis muaj 30 hnub ntawd,
mas 12 tug tsiaj yuav los kav. Muaj 6 tus tsiaj
yuav kav 3 zaug, muaj 6 tug tsuas kav ob
zaug xwb. Raws li nram no:
Zaj xiab yog xiab 1, 13 thiab nqes 25.
Nab xiab yog xiab 2, 14 thiab nqes 26. Nees
xiab yog xiab 3, 15 thiab nqes 27. Yaj xiab
yog xiab 4, nqes 16, 28. Liab xiab yog xiab 5,
nqes 17, 29. Qaib xiab yog xiab 6, nqes 18,
30. Dev xiab yog xiab 7 nqes 19. Npua xiab
yog xiab 8 nqes 20. Nas xiab yog xiab 9
nqes 21. Nyuj xiab yog xiab 10 nqes 22.
Tsov xiab yog xiab 11 nqes 23. Luav xiab
yog xiab 12 nqes 24.
3. Cov Tsiaj Kav Hnub.
Cov tsiaj kav hnub ces xam raws lub hli
xiab los mus. Ib hnub 24 teev mas 12 tug
tsiaj yuav sib hloov kav ib leeg ib teev. Yog
tias tus tsiaj loj kav hnub, ces tus me nyuam
yuav los kav teev. Tsoom Hmoob laus tau siv
cov tsiaj kav hnub no los ua noj ua haus, ua
lag ua luam thiab tawm rooj raws li nram no:
Zaj hnub: zoo siv los rhawv qua vaj qua
tsev. Zoo sam sab rau tej laus uas puv ib
puas nees nkaum xyoo lawm. Zoo tawm rooj
mus saib kwv tij neej tsa.
Nab hnub: nab yog hom tsiaj ntshav
txias ces Hmoob tsis siv los xam hnub nyoog.
Nees hnub: Zoo siv mus ua lag ua luam
nkaus xwb.
Yaj hnub: zoo siv tawm rooj mus saib
kwv saib tij, zoo sam sab rau tej laus puv ib
puas nees nkaum xyoo.
Liab hnub: zoo siv mus hlawv teb.
Qaib hnub: tus tsiaj no siav yau thiab
txhav nkig ces luag tsis siv los xam.
Dev hnub: siv mus coj tub muab nyab.
Zoo tawm rooj tsham teb chaws.
Npuas hnub: zoo mus ua lag ua luam.
Zoo mus rhawv qua vaj qua tsev.
Nas hnub: Tus tsiaj no tsis tau siv xam
vim tias nas ua tub sab thiab txom fav, nws
tseem nyob qhov av ces tsis sis siab xam.
Nyuj hnub: zoo siv sam sab rau tej laus.
Zoo siv mus ua lag ua luam. Zoo siv mus coj
tub muab nyab thiab zoo siv mus tsham kwv
tij.
Tsov hnub: zoo siv mus ua plaub ua
ntug. Zoo siv mus tsham teb chaws. Zoo
tawm rooj mus ua liaj ua teb. Zoo sam sab
rau tej laus.
Luav hnub: zoo sam sab rau tej laus.
Zoo tawm rooj tsham kwv tij.
+++++++++++++++

HMOOB KEV CAI DAB QHUAS (1)
Tus sau: Nom Suav Hawj (1985)
Kuv yuav piav txog Hmoob kev cai dab
qhuas, los yog kev ua dab ua qhua. Mas
Hmoob kev cai ua dab ua qhua tsis yog mus
raws ib yam, vim nyias muaj nyias xeem;
nyias coj mus raws li nyias xeem uas niam
txiv poj yawm coj los, mas tsis zoo ib yam.
Kuv tsuas hais txog li ntawm kuv ua kev coj
dab coj qhua raws li kuv poj yawm txwv
koob lawv ua tseg thiab hais tseg es thiaj
khaws tau coj los ua. Kev coj dab qhuas no
mas yog yus niam yus txiv tseem nyob, mas
yus tsis coj li; kawg yog niam txiv ua tus coj
xwb. Yog niam txiv tuag tas lawm tshuav yus
xwb, mas yus thiaj yuav tsum tau los coj cov
kev cai dab qhuas no.
Hais txog kev ntseeg nyob hauv kev cai
dab qhuas yog dab tsi ua ntej. Tus ib uas
peb ntseeg mas yog ‘Tus Ncej Dab’ uas yog
tus ncej tas; yog koj muaj lub tsev mas nws
yog tus loj. Vim peb ntseeg tias tus ncej tas
no yog tus kav tus pov hwm saib xyuas peb
ib tsev neeg cov ntsuj plig tib si. Hmoob
thiab Suav thiab Co mas yeej hwm tib tug
dab ncej tas no ib yam nkaus xwb, los ua tus
pov hwm ntsuj plig. Mas thiaj tau ua tus
‘npua tai’ no los rau tus ncej tas vim tus ncej
tas no saib pov hwm lub tsev cov neeg plig
tsis pub kom muaj ib tus ploj tuag li; nws
yog tus tuav cov ntsuj plig tas nrho. Tib neeg
yug los ua neeg nyob rau yaj ceeb no, mas
tib neeg cov ntsuj plig zoo li cov tsiaj hos tus
ncej tas mas yog zoo li tus saib kom cov tsiaj
tsis txhob pub muaj tus ploj. Vim li no mas
peb thiaj li ntseeg tus ncej tas. Yog muaj ib
siab ob qig peb thiaj yuav tsum hlawv xyab
hlawv ntawv rau tus ncej tas.
Ob tuaj, peb yuav tsum ntseeg mus rau
‘Tus Dab Qhov Txos’. Vim li cas peb ntseeg
thiab hwm tus dab qhov txos, vim yog lub
tsev neeg tau hlob tuaj kuj yog vim lub qhov

txos no yug sawv daws hlob; vim yog lub
qhov txos thiab lub yias, lub tsu ua zaub
mov rau sawv daws loj hlob. Mas nws kuj
muaj ‘Dab Qhov Cub’, ‘Dab Khaub Rhuab’,
‘Dab Rooj Txag’,’Dab Rooj Txuas’, ‘Dab
Rooj Tag’.
Tus dab rooj tag no nws yog tus txhuag
lub tsev neeg cov ntsuj plig kom tsis txhob
tawm mus, mas thiaj li ua tus ‘npua rooj’.
Tus npua rooj no Hmoob, Suav thiab Co kuj
puav leej ua muaj ib yam tib si.
Hmoob lub qhov rooj tag no yog ib lub
qhov rooj tseem ceeb rau tsev neeg Hmoob;
vim kev ua dab ua qhua hu plig, yuav nyab
tshiab, los ntxhais yuav txiv; yuav tsum tawm
lub qhov rooj tag mus, thiab los yuav tsum
hla lub qhov rooj tag no los. Kev caiv thiab
hwm lub qhov rooj tag no yog tsis pub cov
poj niam cev tshiab tuaj hla lub qhov rooj
tag no li. Yog cia tuaj hla lub qhov rooj tag
no lawm ces, ua dab tsi los tsis sawv li, khwv
nyiaj khwv txiaj yeej tsis tau li. Yog ib tus
neeg nyob hauv koj tsev neeg mob yog lub
qhov rooj tag no tso lus lawm, mas koj kho
los tus mob yeej tsis sawv li; tsis hais ua neeb
los muab tshuaj yeej tsis zoo li.
Hais txog Hmoob teev ‘Tus Xwm Kab’,
mas Hmoob thiab Suav kuj puav leej muaj
tus xwm kab. Thaum ub nyob Sauv teb
Hmoob thiab Suav no puav leej ua lub thaj
rau tus xwm kab tab sis yog vim Hmoob
thiab Suav sib tua es nyem no Hmoob tsis ua
lub thaj lawm; Hmoob ua daim nyuag ntawv
xwm kab coj mus rhais rau xwb, ces cia li
muab ib lub nyuag rooj xyoob mus txhos
hauv av tuaj rau ces mus hlawv xyab txhos
rau xwb. Yog yuav txi thaum twg mam li
muab lub nyuag rooj rau xwb.
Tus xwm kab no yog teev los mus pov
hwm tag nrho rau ib puas tsav yam; zoo li
neeg, tsiaj txhu, nyiaj txiag, qoob loos tag ib
puas tsav yam tib si. Tus xwm kab no yog
dab tsi? Tus xwm kab no hu ua ‘Tus Txhiaj
Pem Xeeb’.
Tus txhiaj pem xeeb no nws yog tus
yuav ua kom koj tau nyiaj tau txiaj. Txhiaj
pem xeeb no nws nyob ze ntawm koj, koj
mus hav zoov hav tsuag los nws nyob ntawd
tib si, koj hais lus dab tsi nws nyob ntawd
nws yeej nrog koj paub tau tib si. Nws nyob
ntawm koj los koj yeej tsis pom nws li, mas
thiaj hu ua Txiaj Pem Xeeb; lub npe tiag mas
hu ua ‘Tus Txhiaj Seej’. Vim lub npe tiag
‘Txhiaj’ no mas yog ‘Nyiaj’. Hos lub ‘Seej’
mas yog ‘Tus Dab Ciaj Sia’. Muaj ib txhia
tseem lo ib daim ntawv thiab, tab sis lo daim
ntawv yog teev ‘Tus Tim Tswv Teb Tswv
Chaw’. (Nyeem txuas rau tsab ntawv tom ntej)
+++++++++++++++++++++

LIAJ LUV TSEB NPLEJ (Jan-Feb 2021)

Recomendados

Recomendados

Más contenido relacionado

La actualidad más candente

La actualidad más candente (20)

Similar a LIAJ LUV TSEB NPLEJ (Jan-Feb 2021)

Similar a LIAJ LUV TSEB NPLEJ (Jan-Feb 2021) (20)

Último

Último (11)

LIAJ LUV TSEB NPLEJ (Jan-Feb 2021)