Tsab ntawv xov xwm Kav Tos Liv.

1. Xyoo 1 tsab 1 (2020)ZOO TSWV ZOV YAJ

2. 1
LO LUS & KEV NQES TES UA
Huab Tais Yes Xus hais ib zaj paj lug rau cov thawj Leej Choj thiab cov pej
xeem tias : Ib tug neeg muaj ob tug tub. Nws hais rau thawj tug tias : “Me tub,
hnub no koj mus ua num tom teb txiv cawv.”
Tus tub ntawd teb tias : “Kuv tsis xav mus.” Tab sis, ib me ntsis, nws khuv xim,
ces nws cia li mus ua teb.
Leej txiv kuj hais rau lwm tus tub ib yam li rau thawj tug thiab. Tus tub ntawd
teb tias : “Huab tais, kuv yuav mus.” Tab sis nws tsis mus. (MT21:28-30)
Huab Tais Yes Xus zaj paj lug no qhia peb sawv daws txog qhov tseeb tias
‘Lo lus tam neeg kev nqes tes ua tsis tau.’
NTHUAV NTAWV MOO ZOO

3. 2
Ob tug tub lees txais leej txiv lo lus sib txawv; tus ib tsis kam txais leej txiv lo
lus, hos tus ob zoo siab mloog leej txiv hais tab sis tsis ua raws. Tus tub tim
ob tus yeeb yam mloog lus no yuav coj los tam kev nqes tes ua tsis tau, tsuas
yog nqes tes ua xwb thiaj yog yam qhia meej tseeb txog txoj kev nyiam tiag.
Thaum peb yog me nyuam me me mas peb nquag hais rau leej niam tias :
Kuv hlub kuv niam.
Leej niad yuav teb tias : Niam vam tias niam tus me nyuam yuav ua rau niam
pom txog niam tus me nyuam txoj kev hlub mog!
Huab Tais Yes Xus zaj paj lug no tsom txog tib neeg li no : Thawj tus zoo dua
tus tom qab vim thaum kawg nws ua raws li leej txiv hais; nws tus yeeb yam
‘nqes tes ua’ zoo dua nws ‘lo lus’.
Peb pom tias muaj ntau leej neeg zoo xws li tus tub no; lawv tsis yog neeg
ntseeg tiam sis lawv coj lub neej ntxim Tswv Ntuj siab, lawv ua neeg tsim txiaj.
Tus tub tim ob mloog thiab lees leej txiv tias yuav mus, tab sis nws tsis mus
li nws hais. Hais tau tias nws coj txawv li nws hais, nws hais ntawm ncauj xwb
nws siab tsis mloog. Cov neeg zoo li no mas lawv hais lust sis muaj qab hau
dab tsi li.
Kwv tij Hmoob, nyob hauv kev ua neej mas tsis muaj leej twg xav mloog tias
peb hais dab tsi; lawv tsuas ntsia tias peb tus yeeb yam yog zoo li cas xwb.
Li ntawd, peb tsum nqes tes ua kom ntau dua qhov peb hais. Vim kev hais
lus mas yooj yim heev, tab sis kev nqes tes ua thiaj yog yam qhia tias peb lo
lus muaj txiaj ntsim qab hau.
Muaj ntau zaus peb hais rau tej me nyuam kom lawv mus teev Ntuj, tab sis
peb ho tsis mus. Nej hais puas yog mas?
Muaj ntau zaus peb txwv tsis pub tej me nyuam hais lus phem, tab sis peb
ho niaj hnub hais. Nej xav saib puas yog?
Muaj ntau zaus peb hais cov me nyuam kom sib hlub, tab sis peb niaj hnub
ua rog hauv cuab yim neeg. Nej saib seb puas yog?

4. 3
Kav txij nqes tes ua ziag no, vim peb tsuas paub hnub no xwb tsis paub tag
kis. Li ntawd hnub no thiaj yog hnub tseem ceeb tshaj plaws nyob hauv kev
ua neej nyob. Txhob xav tias tos muaj tso mam pab lwm tus, tos laus tso mam
mus teev Ntuj.
Zoo siab txais Tswv Ntuj, vim Tswv Ntuj twb hu thiab caw peb tig los hloov
siab tshiab lawm. Huab Tais Yes Xus ua raws Leej Txiv siab nyiam, mloog Leej
Txiv Lo Lus mus tuag saum Ntoo Cuam. ‘Tsis yog cov uas hu kuv ua : Huab
Tais, Huab Tais, yuav tau mus hauv Ntuj lub Ceeb Tsheej. Yog cov ua raws li
kuv Txiv nyob saum ntuj lub siab nyiam.’ (MT7:21) Tsis tas li ntawd, Huab Tais
Yes Xus zoo siab tsob hwb sawv daws thiab. ‘Neeg Leej Tub tsis tuaj nyob ntiaj
teb no kom luag tsob hwb nws. Nws tuaj tsob hwb sawv daws.’ (MT20:28)
Kwv tij Hmoob, Huab Tais Yes Xus zaj paj lug no qhia peb tias leej txiv ob tug
tub no tsis muaj tus yuav zoo dua tus, vim nkawd ua rau leej txiv tu siab thiab
mob siab. Tus tub ua rau leej txiv xyiv fab mas tsum zoo siab txais leej txiv
lus, rau siab mloog leej txiv hais, thiab kub siab ua raws li leej txiv kom ua.
Thaum hais zaj paj lug no tas, Huab Tais Yes Xus hais rau sawv daws tias : Kuv
hais tseeb rau nej, cov sau se thiab cov niam ntiav xub mus hauv Ntuj lub Ceeb
Tsheej dua nej. Vim tias, Zam tuaj qhia Txoj Kev ncaj rau nej, tab sis nej tsis
ntseeg txog nws. Hos cov sau se, thiab cov niam ntiav ntseeg txog nws.
(MT21:31-32)
Txhais tias peb raug hu kom los ua raws nraim lawv tus qauv; tsis yog lub
ncauj niaj hnub hais kuv ntseeg, tiam sis peb tsum ua tawm rau luag tej pom
tias peb yog ib tus neeg ntseeg, yog ib tus ua raws li Huab Tais Yes Xus qhia.
****************************************************************

5. 4
TUS NEEG MUAJ CUAB KAV THOV NTUJ ZAM TXIM
“Kev cib yeej, kev npau taws yog tej yam phem tas nrho. Uas nyob hauv tus
neeg txhaum lub siab. Leej twg pauj rau luag mas nws yuav raug Huab Tais
pauj rau nws, vim Huab Tais sauv ntsoov tsis nruam ib qho txhaum.
Yog koj zam tej yam phem uas luag ua rau koj, ces thaum koj thov Ntuj, Ntuj
kuj yuav zam rau koj thiab.
Yog ib tug neeg npau taws tas zog rau lwm tus, mas nws yuav ua zoo li cas
thov Tswv Ntuj pab kho nws lub siab kom zoo tuaj? Nws tsis hlub ib tug neeg
zoo li nws, nws puas tsim nyog thov kom Tswv Ntuj zam nws cov txhaum? Nws
yog nqaij xwb, nws tseem cib nyeej thiab! Leej twg yuav zam txhaum rau nws?
Koj nco txog koj hnub kawg, ces koj yuav tsis ntxub ntxiv. Koj nco txog tias koj
yuav lwj, koj yuav tuag. Ces koj rau siab coj Ntuj cov lus qhia mas!
Koj nco txog cov lus qhia, tsis txhob cim nyeej rau luag. Koj nco tias Huab Tais
nyob siab tau cog lus, ces koj hla plaws txhob ntsia tej yam txhaum luag ua
rau koj.” (NXL27:30-28:7)

6. 5
Ntawv Npes Xis Las qhia tias tus neeg yuav hloov siab tshiab los txais lub Cim
Ntxuav yuav tsum yoog raws Huab Tais Yes Xus tus piv txwv thiab coj lub
neej raws li Huab Tais Yes Xus qhia. Phau ntawv no sau cia ua ntej Huab Tais
Yes Xus 190 xyoo, txhais tias Npes Xis Las lub tswv yim pom deb thiab nthuav
dav dua cov neeg tiam ntawd.
Npes Xis Las ntuas kom haiv His Xas Lais muaj lub siab khuv leej txog lwm
tus, mas lawv thiaj thov kev zam txim tau. Npes Xis Las lo lus ntuas no, mas
Huab Tais Yes Xus tuaj qhia kom txwm dua qub; Huab Tais Yes Xus hais kom
peb zam txim rau peb tus yeeb ncuab.
Peb paub tias nyob hauv Huab Tais Yes Xus thawj lo lus qhia mas yog “Nej
hnov tej lus qhia tias : Koj yuav nyiam tus nyob ze koj, koj yuav ntxub koj tus
yeeb ncuab. Tab sis, kuv hais rau nej tias : nej yuav nyiam nej cov yeeb ncuab,
nej yuav thov Ntuj rau cov tsim txom nej.” (MT5:43-44)
Kwv tij Hmoob, Huab Tais Yes Xus tsis yog qhia xwb, nws coj tus yam ntxwv
li hais tiag. Peb pom tias thaum Huab Tais Yes Xus raug luag ntsia saum Ntoo
Cuam, mas Huab Tais Yes Xus thov Leej Txiv Tswv Ntuj tias “Txiv, koj zam rau
lawv, vim lawv tsis paub lawv ua dab tsi?” (LK23:34)
Nyob hauv Mas Tais Ntawv Moo Zoo, Huab Tais Yes Xus teb Pob Zeb cov lus
nug txog kev zam txim tias “Kuv tsis hais rau koj tias xya zaus. Kuv hais rau
koj tias, xya zaus xya caum xya zaus.” Hais li ntawd tas Huab Tais Yes Xus thiaj
piav zaj paj lug ‘tus tub txib tsis hlub luag’ los qhia txog nws lo lus no.
“Thaum lawv pib txheeb, ces luag coj ib tug tub txib uas tshuav nuj nqis ib vam
nras nyiaj, tuaj rau tus vaj. Tus tub txib tsis muaj dab tsi them, ces tus vaj kom
luag muab nws thiab nws poj niam, nws cov me nyuam thiab tas nws lub cuab
tam huv si muag, los them cov nuj nqis ntawd.
Tus tub txib txhos caug ntua ntawm tus tswv ko taw, nws pe tus tswv, nws hais
tias : Thov koj ua siab ntev rau kuv, kuv yuav them kom tas rau koj.
Tus tswv hlub tus tub txib, ces nws tso tus tub txib mus thiab tseem zam cov
nuj nqis huv tib si rau nws.

7. 6
Thaum tus tub txib tawm rov qab mus, nws ntsib nws ib tug npawg, uas tshuav
nqi ntawm nws ib puas lub txiaj nyiag. Tus tub txib ntawd nthos nkaus nws tus
npawg caj dab, zawm tus npawg caj pas, thiab hais tias : Them koj cov nqi.
Nws tus npawg txhos caug ntua ntawm nws ko taw thov tias : Thov koj ua siab
ntev rau kuv, kuv yuav them rau koj.
Tab sis tus tub txib ntawd tsis kam li, nws kom luag muab nws tus npawg kaw
hauv tsev loj faj mus txog hnub tus npawg them nuj nqis tas huv tib si rau nws.
Tus tub txib cov phooj ywg pom nws ua li ntawd, lawv chim kawg, lawv mus
qhia tej ntawd rau lawv tus tswv. Ces tus vaj hu tus tub txib tuaj, nws hais rau
tus tub txib ntawd tias : Tub txib siab phem dab tsi! Cov nuj nqis uas koj tshuav
ntawm kuv, kuv twb zam tas huv si rau koj, vim koj thov kuv. Ua cas koj tsis
hlub koj tus npawg zoo li kuv tau hlub koj?
Ces tus vaj npau taws heev, nws muab tus tub txib rau cov tub hiam neeg mus
txog hnub nws them nws cov nuj nqis tas huv tib si.” (MT18:21-35)
Zaj paj lug no qhia peb tias hau kev zam txim rau lwm tus mas yog peb tsum
ras tias peb tau txais kev zam txim ntawm Tswv Ntuj ntau npaum cas; ntau
txog qhov tias peb tsis muaj peev xwm them tau. Li ntawd, peb thiaj tsum
zam txim rau lwm tus los ua nqi them Huab Tais Tswv Ntuj txoj kev nyiam
peb no.
Kwv tij Hmoob, txhua hmo ua ntej yuav pw; peb yuav rov tig los xav los
txheeb peb tus kheej tias : peb txhuav leej twg li txim, peb yuav ras txog Tswv
Ntuj lub txiaj ntsim zam txim rau peb, thiab peb yuav zam txim rau tus hla
peb tus ua txhaum rau peb.
Peb tsis txhob saib peb ua qhov loj, tab sis peb tsum muab Tswv Ntuj ua
qhov nruab nrab hauv peb kev ua neej li tus hauv paus xa lus Paj Lug hais :
Yog peb ua neej nyob, mas peb nyob tsob hwb Huab Tais; yog peb tuag, mas
peb kuj tuag rau Huab Tais. Txawm peb ua neej nyob, los peb tuag, mas peb
yog Huab Tais tug. (LM14:8)

8. 7
Tus neeg uas zam txim rau luag tsis tau, mas vim nws tseem muab nws saib
hlob, nws tseem saib nws ua qhov nruab nrab, los yog nws raug lwm tus tsim
txom hnyav. Nws tsis nco tias Huab Tais Tswv Ntuj yog tus pub kev ncaj ncees
rau peb sawv daws.
Tus neeg muaj lub siab paub zam rau lwm tus, mas nws tau txais Huab Tais
Yes Xus txoj kev nyiam thiab kev ncaj ncees lawm.
Kwv tij Hmoob, thov nej nco lo lus no mog : ‘Huab Tais nyob siab tau cog lus,
ces koj hla plaws txhob ntsia tej yam txhaum luag ua rau koj.’ (NXL28:7)
*************************************************************************

9. 8
TUS CAI TSWV NTUJ PUB RAU NEEG
Zaj paj lug cov tub zog zov teb tua neeg (MT 21:33-46), yog Huab Tais Yes
Xus ib zaj paj lug hais txog cov tub zog zov lub thaj teb siab tsis ncaj, lawv
muab tus tswv teb cov tub txib thiab tus tub tua. Daim teb txiv cawv piv li
yog cov His Xas Lais, tus tswv teb yog Huab Tais Ntuj, cov tub zog yog cov
Fas Lis Xais thiab cov Txwj Laus, cov tub txib yog cov Yaj Saub, thiab tus tub
yog Huab Tais Yes Xus.
Zaj paj lug no qhia peb sawv daws tias peb muaj cai ua Tswv Ntuj haiv neeg,
ua Tswv Ntuj ib tug me nyuam. Peb sawv daws muaj txiaj ntsim thiab muaj
sam xeeb sib luag zos nyob ntawm Tswv Ntuj xub ntiag.
Nyob hauv zaj paj lug mas tus tswv teb tawm rooj mus kev deb thiab tso thaj
teb rau cov tub zog zov, mas vim tus tswv tso siab rau lawv. Tib yam li ntawd,
Tswv Ntuj tau tso txoj hauj lwm rau peb ua thiab tu Tswv Ntuj daim teb vim
Tswv Ntuj tso siab rau peb. Li ntawd, peb thiaj muaj cai twj lij koom tes los
yog tawm tsam Tswv Ntuj, muaj cai xav ua los tsis ua txoj hauj lwm no ywj
peb siab; tej no yog tib neeg tus cai Tswv Ntuj pub.
Zaj paj lug no tseem qhia peb txog Tswv Ntuj lub siab ntev rau tib neeg cov
txhaum. Tus tswv muab sij hawm rau cov tub zog ntau zaus saib lawv puas
hloov siab tshiab. Tswv Ntuj kuj ua tib yam li ntawd rau peb, tsis tau muab

10. 9
txim rau peb tam sim no, tsuas muab sij hawm rau peb thiab vam khom tias
peb yuav hloov siab tshiab tig los nrhiav Tswv Ntuj.
Kwv tij Hmoob, Huab Tais Ntuj pub kom peb tau ua Tswv Ntuj ib tug me
nyuam lawm, peb tsum txuag thiab tuav cia kom zoo. Peb tsum kub siab rau
txoj hauj lwm tu Tswv Ntuj daim teb kom cov txiv cawv tawg paj txi txiv mog.
Kwv tij Hmoob, peb Leej Txiv Tswv Ntuj siab ntev thiab tsis khaws peb tej
txhaum cia, nws pub sij hawm rau peb ntev niaj ntau zaus. Li ntawd, peb los
tsum ua siab ntev rau lwm tus txoj kev txhaum thiab, txhob txiav txim rau
lwm tus; tab sis peb yuav sib nyiam sib zam thiab pub sij hawm rau tus ua
txhaum rau peb tau tig los yuav siab tshiab mog.
Kwv tij Hmoob, kom peb ras tias peb yog cov tub zov thaj teb, tsis yog tus
tswv teb; mas peb tsum siv lub sij hawm thiab lub txiaj ntsim tus tswv pub
rau peb los tu kom daim teb ntsu qoob loo txhua txhia hnub.
Li cas? Peb tsum rau siab ua peb txoj hauj lwm, txhob noj lwm tus zog thiab
txhob nrhiav txiaj ntsim rau peb tus kheej, tiam sis kom peb nco txog peb
cov kwv tij thiab paub faib txiaj ntsim rau lawv.
Kwv tij Hmoob, thov kom peb koom tes nrog Tswv Ntuj thiab thov kom peb
muab tus kheej ua Tswv Ntuj cov twj los txhim Tswv Ntuj lub Ceeb Tsheej
mog.
*********************************************************

11. 10
HUAB TAIS LUB NTEES TSHOOB.
Kwv tij Hmoob, Tswv Ntuj hu sawv daws tuaj koom lub ntees tshoob nyob
saum Ntuj Ceeb Tsheej. Thaum nws tuaj hu peb, mas peb puas txais lo lus
caw thiab puas hnav tsoos tsho kom phim lub ntees tshoob ntawd.
Muaj tej tus tsis tuaj, lawv tsis quav ntsej, lawv xum mus ua teb, mus ua luam.
(MT 22:5) Lawv saib Tswv Ntuj lub ntees tshoob tsis muaj qab hau rau lawv.
Muaj tej tus tuaj koom rooj tshoob tab sis lawv tsis hnav tsoos noj tshoob
tuaj, mas tus neeg ntawd kuj tsis phim koom lub ntees tshoob thiab.
Peb tau txais Tswv Ntuj lo lus caw nyob hauv lub Cim Ntxuav. Thaum peb
txais CIm Ntxuav lawm, peb tsum ua lub neej kom haum Tswv Ntuj siab,
mloog Tswv Ntuj lus thiab saib Tswv Ntuj txoj hauj lwm loj dua peb li dej num
thiab peb tej kev ntshaw.
Tswv Ntuj hu peb los koom rooj qav nyob hauv lub Cim Yug. Li ntawd niaj
hnub chiv mas peb txhob hais tias ‘Kuv tsis xyeej’,’Kuv yuav mus nrhiav noj’.
Peb tsum hnav tsoos noj tshoob. Kwv tij, tsoos noj tshoob piv rau peb kev
coj ncaj, ua neeg zoo, nyiam Tswv Ntuj, koom tes nrog Tswv Ntuj ua nws txoj
hauj lwm; yog hlub lwm tus, zam txim rau tus nyob ze peb thiab tsob hwb
lawv.
*********************************************************

12. 11
TSWV NTUJ HAU KEV & NEEG HAU KEV
Cov Fas Lis Xais lo lus nug Yes Xus tias koj sim qhia peb saib, raws li koj xav,
Txoj Cai puas kheev them se rau Xes Ntxas los tsis kheev?, yog ib lo lus lawv
cuab ntxiab rau Huab Tais Yes Xus.
Huab Tais Yes Xus paub qhov lawv lub siab xav, nws thiaj hais tias yam twg
yog Xes Ntxas tug, mas nej muab rov rau Xes Ntxas. Yam twg yog Tswv Ntuj
tug, mas nej muab rov rau Tswv Ntuj.
Yes Xus lo lus teb no qhia meej tseeb rau peb cov neeg ntseeg kom peb hwm
txoj cai lij choj hauv peb tej teb chaws, thiab kom peb nrhiav Tswv Ntuj thiab
ua raws Tswv Ntuj siab nyiam. Peb ua neej kom haum Tswv Ntuj txoj kev
thiab ntiaj teb txoj kev.
Kwv tij Hmoob, peb tsum muab kev ncaj ncees rau sawv daws. Yam twg yog
leej twg li mas peb yuav tsis muab ua peb tug.
Kwv tij Hmoob, peb tsum ua Tswv Ntuj tsaug tas mus li vim Tswv Ntuj yog
tus muab txhua yam rau peb.
Kwv tij Hmoob, peb tsum ua tus neeg me nyiam mloog Tswv Ntuj lus thiab
muab Tswv Ntuj hau kev ua qhov loj dhua txhua yam.
Li ntawd, niaj hnub peb yuav ua qhov zoo pub rau Tswv Ntuj thiab rau peb
cov kwv tij mog!
*********************************************************

13. 12
TSIM KOOB HMOOV HAUV TXOJ SIA
Yes Xus hais rau lawv tias : “Ntuj lub
Ceeb Tsheej yuav zoo xws li kaum
leej ntxhais taws teeb tawm mus tos
nraug vauv. Nyob hauv lawv, muaj
tsib leeg ruam, hos tsib leeg xyuam
xim.
Cov ruam nqa teeb, tab sis tsis nqa
roj nrog. Hos cov xyuam xim nqa teeb thiab ntim roj rau hauv hwj nrog.
Nraug vauv los lig, ces lawv qaug dab ntub. Sawv daws tsaug zog. Thaum ib
tag hmo, ib lub suab nthe tias : “Nraug vauv los txog lawm! Nej tawm los txais
nws!”
Ces tas cov ntxhais hluas sawv los npaj teeb. Cov ruam hais rau cov xyuam
xim tias : “Nej pub ib qho roj rau peb mas, peb cov teeb tuag lawm."
Tab sis cov xyuam xim teb rau cov ruam tias : “Ntshai roj yuav tsis txaus rau
nej thiab rau peb. Nej mus muas roj tom cov tub luam rau nej.”
Thaum cov ntxhais ruam mus muas roj lawm, ces nraug vauv los txog. Cov uas
tau npaj txhij tos, nrog nraug vauv chaws mus hauv chav tsev ua tshoob, ces
luag kaw qhov rooj. Thaum kawg, lwm cov ntxhais los txog thiab, lawv hais
tias : “Huab Tais, Huab Tais, thov koj qhib qhov rooj rau peb.”
Tab sis nraug vauv teb tias : “Kuv hais tseeb rau nej, kuv tsis paub nej yog leej
twg !”
Ua li mas nej zov hmo mog, vim nej tsis paub hnub twg thiab lub sij hawm
twg.” (MT25:1-13)
Huab Tais Yes Xus zaj paj lug no yog qhia kom peb ua neeg xyuam xim npaj
txhij npaj txhua ua ntej Huab Tais Yes Xus yuav tuaj hu peb. Peb yuav xyuam
xim li cas? Yog kom peb npaj cov roj sam peb lub teeb. Cov roj ntawd yog
kev tsim koob hmoov thaum peb tseem muaj txoj sia.

14. 13
Kwv tij Hmoob, kev tsim koob hmoov raws txoj kev ntaeeg tsis thooj li peb
Hmoob kev tsim koob hmoov. Peb Hmoob hais tias tuaj tsiaj txhu rau cov
laus ntau ces yuav tau koob hmoov ntau. Tiam sis peb cov neeg ntseeg Ntuj
mas kev tsim koob hmoov yog ua cov hauj lwm zoo, pab luag tej, hlub luag
tej, thiab tsob hwb Tswv Ntuj.
Yog peb tsim koob hmoov cia ces thaum Huab Tais Yes Xus tuaj txog mas
peb thiaj yuav tau nrog nws mus hauv Ntuj lub Ceeb Tsheej.
Lub caij Yes Xus tuaj yog lub ciaj peb tag sim neej, peb tso ntiaj teb no tseg
ces peb tus ntsuj plig mus txog qhov chaw txiav txim. Nyob ntawd Tswv Ntuj
yuav txiv txim peb raws li peb cov koob hmoov peb tsim cia. Koob hmoov
yog yam peb yuav qee rau lwm tus tsis tau thiab yuav thov ntawm lwm tus
los kuj tsis tau.
Kwv tij Hmoob, thaum peb ua neej nyob mas peb kav tsij nquag tsim koob
hmoov mog.
*********************************************************

15. 14
HNUB NEEG THOJ NAM TSIV TEB 2020
Tim 27 hauv lub 9 hlis xyoo no yog
‘Hnub Neeg Thoj Nam Tsiv Teb
2020’, yog li Vaj Qhia Fas Ntshis Kus
thiaj sau tsab ntawv txog cov neeg
tsiv teb ua neeg thoj nam tias lawv
tab tom muab lub sij hawm rau peb
tau ntsib Tswv Ntuj.
Tsis tas li Vaj Qhia tau nqua hu sawv
daws kom los ua txoj hauj lwm saib
xyuas thiab cawm cov neeg thoj
nam raws 6 lo lus nram no :
1. Tsum paub lawv thiaj nkag siab
lawv : Huab Tais Yes Xus qhia zaj no rau peb nyob hauv qib lus Yes Xus nrog
ob tug thwj tim mus Es Mas Ws tham. (LK24:13-35)
Thaum peb hais txog cov neeg thoj nam mas peb tsuas saib tus zauv tias
muaj ntau npaum cas, ua cas peb tsis saib tias lawv tab tom ntsib xwv txheej
dab tsi. Yog peb ntsib lawv ces peb yuav paub lawv, thaum peb paub lawv
ces peb yuav nkag siab lawv.
2. Tsum nyob ze lawv thiaj tsob hwb lawv tau : Nyob hauv zaj tus Xas Mas
Lias siab zoo hais tias ‘Tab sis ib tug Xas Mas Lias mus tawm rooj tuaj txog ze
tus raug mob, nws pom tus neeg raug mob, nws hlub. Nws txav los ntawm tus
raug mob, nws hliv roj thiab hliv cawv rau cov qhov txhab, nws muab qhwv.
Nws tsaws tus raug mob caij nws tus luj, ces nws coj tus raug mob mus txog
lub tsev txais qhua, nws tu tus raug mob ntawd.’ (LK10:33-34)
XOV XWM

16. 15
Vim kev ntshai thiab lub tswv yim tsis ncaj ncees thiaj tau cais peb tawm
ntawm cov neeg thoj nam, yog phab ntsa zeb thaiv peb txoj kev ua phooj
ywg, thiab kuam peb kom txhob khuv leej lawv hlub lawv thiab tsob hwb
lawv.
3. Tsum mloog lawv thiaj sib raug zoo tau nrog lawv : Huab Tais Tswv
Ntuj xav kom peb rov nrhiav tau nws, mas thiaj xa Leej Tub nqe los rau ntiaj
teb, kom tau hnov tib neeg lub suab quaj suab nyiav raws li neeg tau hnov.
‘Vim Tswv Ntuj nyiam lub qab ntuj neeg npaum no : nws thiaj muab nws Leej
Tub twm zeej rau, kom xwv tus ntseeg txog Leej Tub txhob tuag, tab sis kom
nws muaj txoj sia nyob mus li….., nws xa Leej Tub tuaj cawm lub qab ntuj neeg.’
(Z3:16-17)
4. Tsum pub rau lawv thiaj loj hlob tau : Kev sib faib sib pub rau lwm tus
yog lub hauv paus ntawm cov neeg ntseeg tiam ib. ‘Tas ib tsoom ntseeg coob
coob sawv daws muaj ib lub siab, ib lub tswv yim xwb. Tej yam uas yog nws li,
tsis kav tsis muaj leej twg yuav hais tias yog nws tug xwb. Nyias muab nyias
tug los ua sawv daws tug.’ (HL4:32)
Huab Tais Tswv Ntuj tsim txhua yam los rau sawv daws sib npaug, li ntawd
peb tsum paub pub rau lwm tus mas peb thiaj loj hlob taus.
5. Tsum muaj feem thiaj sib txhawb tau : Huab Tais Yes Xus pom tus poj
niam Xas Mas Lias tuaj nqa dej, ces Huab Tais Yes Xus nrog nws tham, mloog
nws hais thiab piav txog qhov tseeb; ua rau tus poj niam Xas Mas Lias tau
mus tshaj txog lub Moo Zoo rau ib zeej tsoom neeg. (Z4:1-30)
Muaj qee zaus kev pab lwm tus kuj ua rau peb hla lawv lub peev xwm. Li
ntawd, kev txhawb nqa cov neeg peb pab lawv mas yog kom lawv muaj feem
pab lwm tus thiab txhim tsa lawv rov qab los cawm lawv.
6. Tsum koom tes thiaj tsim tau : Leej Ntshiab Paj Lug hais rau cov ntseeg
hauv Kos Lis Nthos tias ‘Kwv tij sawv daws, kuv tuav txog peb tus Huab Tais
Yes Xus Pleev lub npe thov nej, kom nej sawv daws koom siab koom ntsws.

17. 16
Txhob muaj kev sib ncaim nyob hauv nej pab neeg. Nej yuav hais kom sib
haum.’ (1KLN1:10)
Kev tsim Ntuj lub Ceeb Tsheej yog sawv daws lub luag hauj lwm, li ntawd peb
sawv daws thiaj tsum sib koom tes. Txhob pub kev tsis sib haum xeeb los
rhuav peb mog!
*********************************************************
XOV TOOJ CUA ‘ZOO TSWV ZOV YAJ’
Lub tshuab tshaj xo ‘Zoo Tswv Zov Yaj’ yog Txiv Plig Nyiaj Pov txhim tsa los
tshaj Tswv Ntuj Lo Lus nyob hauv xov tooj cua rau cov kwv tij Hmoob nyob
teb chaws Koom Tshaj tau mloog : xws li Suav teb, Nyab Laj teb thiab Los
Tsuas teb.
Txiv Plig Nyiaj Pov npaj cov zaj rau Cwj Vuam Chiv (Txiv Plig Yaj Chiv) zom
nyob rau Nkws Yas teb thiab xa mus tso tawm saum huab cua nyob Fis Lis
Pees teb rau hnub tim 1 lub 12 hlis 1994, lub npe tshaj xo yog ‘Zoo Tswv Zov
Yaj’, vim Huab Tais Yes Xus yog tus zoo tswv, hos peb cov kwv tij Hmoob xws
li yog ib pab yaj poob zoo.
Zoo Tswv Zov Yaj zom nyob Nkws Yas teb tau 2 xyoos thiab Fis Lis Pees teb
2 xyoos txog hnub tim 14 lub 9 hlis 1999 Txiv Plig Nyiaj Pov thiaj los txhim
tsa lub tsev tshaj Ntuj Lus nyob hauv Thaib teb hu ua ‘Tsev Hauv Paus
Hmoob Ntseeg Ntuj’ (Hmong Catholic Mission Center).
Chiv thawj Tsev Hauv Paus Hmoob Ntseeg Ntuj cov dej num yog npaj cov zaj
tshaj xo nyob hauv ‘Zoo Tswv Zov Yaj’, luam tsab xov xwm ‘Liaj Luv Xa
Moo’ thiab ‘Tseb Nplej’, thiab sib pab txhawb nqa cov tub tshaj Ntuj Lus
nyob Suav teb, Nyab Laj teb thiab Los Tsuas teb; tsis hais kev ntseeg, nyiaj
txiag los sis lub tswv yim.
Dhau ntawd, tseem nthuav cov ‘Ntawv Hmoob Thoob Teb’ los yog ‘Ntawv
Hmoob RPA’, Hmoob tes txuj ci thiab Liv Xwm raws li Txiv Plig Nyiaj Pov thiab
cov tub soj ntsuam Hmoob tau khaws tseg.

18. 17
Tom qab Txiv Plig Nyiaj Pov tuag tas, lub tsev hauv paus thiaj poob ua lub
koom haum Os Nplav li cuab tam, muaj cov Txiv Plig Os Nplav ua tus tswj.
Lawv lam tuav xwb, lawv tsis txawj hais lus Hmoob lawm, ces zoo li lub tsev
hauv paus vau mus li lawm, tsuas tshuav lub tshuab tshaj xo Zoo Tswv Zov
Yaj lawm xwb.
Txog xyoo 2018, cov thawj tswj muab lub tshuab tshaj xo Zoo Tswv Zov Yaj
mus zwm rau xov tooj cua ‘Radio Veritas Asia’ los yog RVA thiab hloov los
tshaj tawm hauv cov kab sab social media xws li Facebook thiab Youtube.
Niaj hnub nyem no lub tshuab tshaj xo thiaj ua dej num raws li RVA txoj cai
lawm xwb.
Li ntawd, hnub tim 19 lub 9 hlis tas los no, cov Leej Choj hauv lub koom haum
Os Nplav thiaj ua hmoov tsuj xeeb Zoo Tswv Zov Yaj nyob hauv lub npe tias
‘RVA Hmong.’
*********************************************************

19. 18
TSEV TEEV NTUJ HUAB TAIS KEV KHUV LEEJ, ZOS NAB QHAB
Tim 10 lub 10 hli 2020 cov
ntseeg hauv zos Nab Qhab ua
hmoov tsuj xeeb lub me nyuam
tsev teev Ntuj Huab Tais kev
khuv leej, muaj Tswv Qhia Yos
Xes Phib Npoos tus tswj Cheeb
Koom Txoos Nas Qhoos Xas
Vaav tuaj ua tus coj lub txoos.
Cov ntseeg hauv zos Nab Qhab muaj 3 yim xwb, lawv ib txwm coj txoj kev
ntseeg puag thaum xyoo 1986 lo lawm. Thaum ntawd mas yog cov Xib Hwm
Hmoob hauv lub zos Khej Me tuaj qhia kev ntseeg rau cov kwv tij Hmoob
hauv zos Nab Qhab.
Xyoo 1995 cov ntseeg thiab cov kwv tij coj qub kev cai thiaj sib pab txhim tsa
ib lub me nyuam tsev los teev Ntuj yog lub me nyuam tsev teev Ntuj hwm
tus Tim Khawv Thaib: Nis Kos Las Npoos Kawm.
Xyoo 2005 Txiv Plig Vaj Loog thiaj tau ua lub tsev teev Ntuj tshiab thiab hloov
npe rau tias “Tsev teev Ntuj Huab Tais kev khuv leej”, zwm rau lub tsev
teev Ntuj loj hauv zos Khej Me.
Niaj hnub nyem no Txiv Plig tuaj ua Thaj Txi Ntuj rau lawv ib hlis ib lwm xwb
los, lawv tseem coj lub siab npuab Tswv Ntuj li qub.
*********************************************************

20. 19
HWM TSOOM LEEJ NTSHIAB
Kwv tij Hmoob, tim 1 lub 11 hlis tom ntej no yog hnub Koom Txoos Kav Tos
Liv ua lub ntees hwm tsoom Leej Ntshiab. Lub keeb puam yog li no : Xyoo
155 cov ntseeg tau tuaj sib txoos ua hmoov nco txog Leej Ntshiab Pos Lis
Kas Pos vim lawv nyiam nws thiab hwm nws heev. Los txog xyoo 609 ntawd,
tus vaj Npos Kas tau muab lub tsev teev hawm Npes Tis Oos los txi rau Tswv
Ntuj. Vaj Qhia Npos Nis Fas tim 4 thiaj hloov lub tsev teev hawm cov dab Los
Mas no ua ib lub tsev teev Ntuj muaj lub npes tias ‘Tsev Teev Ntuj Hwm Niam
Mab Liab Thiab Cov Tim Khawv’. Tsis tas li, Vaj Qhia kom 28 lub tsheb nees
thauj cov tim khawv li pob txha hauv Kas Tas Koos los tso rau hauv lub tsev
teev Ntuj no, ces lawv thiaj ua hmoov loj rau hnub tim 13 lub 5 hlis los hwm
niam Mab Liab thiab cov tim khawv.
Txog caij Vaj Qhia Nkes Nkos Lis tim 3 tswj lub Koom Txoos, nws tau txhim
tsa ib lub me nyuam tsev teev Ntuj nyob hauv lub tuam tsev teev Ntuj hwm
Leej Ntshiab Pob Zeb los nco txog cov Leej Ntshiab sawv daws. Vaj Qhia Nkes
Nkos Lis tim 3 thiaj hloov ‘Hnub hwm niam Mab Liab thiab cov tim khawv’
ua ‘Hnub hwm tsoom Leej Ntshiab’ thiab hloov caij nyoog los rau tim 1 lub
11 hlis.

21. 20
Nyob rau zim txwv no, hnub hwm tsoom Leej Ntshiab tsis yog peb yuav nco
txog cov Leej Ntshiab lub Koom Txoos xaiv tsa xwb, peb tseem nco txog peb
cov kwv tij uas tau tso lub ntiaj teb no mus nrog Tswv Ntuj nyob saum Ntuj
Ceeb Tsheej thiab.
Zaj nyeem hauv hnub no mas yog qhia peb tias tus neeg yuav tau ua Leej
Ntshiab mas lawv tsum taug Ntoo Cuam txoj kev txom nyem. Vim Leej Txiv
Tswv Ntuj txoj kev nyiam loj tas nrho, mas peb thiaj muaj kev vam khom tias
ib hnub peb yuav tau mus nrog Tswv Ntuj nyob, yog peb ua lub neej li Huab
Tais Yes Xus qhia raws li Mas Tais sau cia nyob hauv nws phau ntawv Moo
Zoo; cov muaj hmoov zoo.
Hnub hwm tsoom Leej Ntshiab, mas peb yuav thov cov Leej Ntshiab sawv
daws kom pab thov peb tus Huab Tais Tswv Ntuj pub kom peb tau mus poo
nrog lawv nyob saum Tswv Ntuj lub Ceeb Tsheej. Tsis tas li, peb tseem yuav
thov Tswv Ntuj kom lwm tiam nws hu peb los noj rooj qav nws npaj tseg rau
peb nyob saum nws lub Ceeb Tsheej.
Kwv tij Hmoob, Huab Tais Tswv Ntuj nyiam thiab khuv leej peb tas nrho. Li
ntawd peb thiaj yuav ua lub neej nyob hauv txoj kev nyiam Tswv Ntuj thiab
hlub lwm tus, thiab ua raws Tswv Ntuj siab nyiam mog, peb thiaj tau mus
nyob koom nrog tsoom Leej Ntshiab sawv daws.
*********************************************************

22. 21
TXIV PLIG POB ZEB TEEB YAJ TXOJ HAUJ LWM ZOV YAJ
“Tus zoo tswv zov yaj siv nws txoj sia los pab nws cov yaj.
Kuv yog tus zoo tswv zov yaj. Kuv paub kuv cov yaj, kuv cov yaj paub kuv.” (Z10:11,14)
Txiv Plig Pob Zeb Teeb Yaj (Fr. Peter Nguyen Truong Giang) yog tus Leej Choj
saib xyuas pawg ntseeg hauv Laus Kais, Nyab Laj teb. Nyob hauv Laus Kais
muaj cov neeg ntseeg Kav Tos Liv li ntawm 1,400 leej, feem coob yog haiv
neeg Hmoob nyob hauv 6 lub zos deb kev vam meej.
Pawg ntseeg hauv Laus Kais tsuas muaj 4 lub me nyuam tsev teev Ntuj qub
qub uas tseem hwv txawm tsis tau kos ntawv pov thawj rau, dhau ntawd mas
tsis muaj dab tsi li. Txawm li ntawd los, Txiv Plig Pob Zeb Teeb Yaj kuj niaj lis
piam tuaj ua thaj txi Ntuj rau cov neeg ntseeg tas txwv kom lawv txoj kev
ntseeg txhob tsuag. Txiv Plig Pob Zeb Teeb Yaj yog ib tug Leej Choj haiv neeg
Cob Tsib tab sis nws kub siab txog cov Hmoob ces nws thiaj kawm ntawv
Hmoob thiab ua thaj txi Ntuj ua lus Hmoob nrog rau lus Nyab Laj rau cov
Hmoob. Txiv Plig Pob Zeb Teeb Yaj hais tias kev ua thaj txi Ntuj 2 xeem lus
mas pab kom cov Hmoob txuag lawv cov lus thiab kuj pab kom Hmoob hais
tau lus Nyab Laj npliag ces lawv yuav tawm rooj mus qhov twg los yooj yim.
Dhau ntawm kev tshaj lub Moo Zoo, Txiv plig Pob Zeb Teeb Yaj thiab cov tub
lis dej num hauv pawg ntseeg hauv Laus Kais tsim phau ntawv txhais lus Nyab
Laj-Hmoob, thiab qhia lus Hmoob rau cov tub tshaj Ntuj Lus thiab cov Xib
Hwb thiab.
*********************************************************

23. 22
KEV NQUAM PAJ NQUAM NRUAS NYOB ZOS NTES HAS
Lub zos Ntes Has (Dehang) yog ib lub zos Hmoob nyob deb ntawm lub nroog
Cim Tsawb (Jishou), lub tsawb Xyab Xyib (Xiangxi) hauv xeev Fuj Naj (Hunan)
mus rau sab hnub poob li ntawm 24 lav kev. Ntes Has txhais tias ‘vos hav
zoo nkauj’, vim yog lub zos nyob hauv plawv hav roob hav tsua thiab muaj
dej tsaws tsag ncig.
Zos Ntes Has yog ib lub zos nto npe
txog kev nquam paj nquam nruas
los yog ntaus nruas seev cev nyob
hauv tsiab peb caug Hmoob. Li
ntawd, tim 14 lub 11 hlis 2020 no
yog hnub xaus xyoos laus tos txais
xyoo tshiab, mas thiaj muaj 11 haiv
neeg me hauv 6 lub xeev thoob Suav teb tuaj sib sau nquam paj nquam nruas
rau cov neeg ncig teb chaws saib ua kev lom zem nyob hauv lub zos no.
Raws keeb kwm hais tseg mas lub caij Ham Tshoj kav teb chaws, cov Hmoob
tau ntaus nruas dhia lom zem pauj yeem rau Ntuj ces txij ntawd los lawv thiaj
niaj xyoo ua kab ke nquam paj nquam nruas los txog niaj hnub nyem no.
Kev nquam paj nquam nruas muaj ntau yam, xws li : nquam paj ntaus nruas,
liab ntaus nruas, ntaus nruas tab, ntaus nruas nkawm, thiab dhia vij nruas.
*********************************************************